اسلام آباد: پاکستان کے وفاقی وزیر دفاع خواجہ محمد آصف نے کہا ہے کہ کالعدم تحریک طالبان پاکستان (ٹی ٹی پی) آج بھی حملوں کیلئے افغان سر زمین استعمال کر رہی ہے۔
وفاقی وزیر دفاع خواجہ آصف نے وائس آف امریکا کو انٹرویو دیا جس میں ان کا کہنا تھا کہ کالعدم ٹی ٹی پی آج بھی حملوں کیلئے افغان سرزمین استعمال کررہی ہے ہم یہ معاملہ کابل کے نوٹس میں لے کر آئے ہیں۔
وزیر دفاع خواجہ آصف نے کہا کہ افغانستان کا جب دورہ کیا تھا تو طالبان سے اس حوالے سے تفصیلی بات ہوئی، افغان طالبان قیادت نے تعاون کیلئے رضامندی کا بھی اظہار کیا تھا۔
وفاقی وزیر دفاع خواجہ آصف نے انٹرویو میں مزید کہا کہ طالبان نے یقین دہانی کرائی کہ سرزمین کسی اور ملک کیلئے استعمال نہیں ہونے دینگے، افغان طالبان نے اس مسئلے سے نمٹنے کے عزم کا اظہار کیا تھا۔
انہوں نے کہا کہ افغان طالبان کیساتھ ہمارے کافی اچھے تعلقات ہیں، افغان طالبان نےکہا تھا اپنی زمین کسی ملک کیخلاف استعمال نہیں ہونے دینگے۔
وزیردفاع خواجہ آصف کا مزید کہا کہ ٹی ٹی پی کے پاس امریکا کے افغانستان میں چھوڑے جدید آلات ہیں، بھارت آج بھی طالبان کی مدد کر رہا ہے، افغان رہنماؤں سے بات کر کے تاثر ملا کہ وہ ٹی ٹی پی سے فاصلہ اختیار کرنا چاہتے ہیں۔
