ناگپور: بھارتی شہر ناگپور میں ایک نوجوان لڑکی نے فون کے لیے بھائی سے جھگڑنے کے بعد اپنی زندگی کا خاتمہ کر دیا۔
بھارتی میڈیا کے مطابق ریاست مہاراشٹر کے بڑے شہر ناگپور میں ایک 19 سالہ بہن نے بھائی سے لڑنے کے بعد خود کشی کر لی، بھائی اسے اپنا موبائل فون استعمال کرنے کی اجازت نہیں دے رہا تھا۔
ناگپور پولیس کا کہنا تھا کہ لڑکی نے والدین سے بھی موبائل فون خرید کر دینے کی فرمائش کی تھی تاہم گھر والوں کی خراب مالی حالت کے پیش نظر یہ فرمائش پوری نہیں ہو سکی تھی۔
پولیس کا کہنا تھا کہ لڑکی کے بھائی کے پاس فون تھا لیکن وہ بہن کو استعمال کرنے کی اجازت نہیں دے رہا تھا۔ ہفتے کو دونوں بہن بھائی کے درمیان فون پر جھگڑا ہوا، جس کے بعد لڑکی نے مایوسی کے عالم میں زہر پی لیا، حالت بگڑنے پر اسے قریبی اسپتال لے جایا گیا لیکن وہ دوران علاج ہی مر گئی۔
موبائل فون دلانے سے انکار پر بیوی نے خودکشی کرلی
ہڈکیشور پولیس اسٹیشن میں واقعے کا مقدمہ حادثاتی موت کے طور پر درج کیا گیا۔
خیال رہے کہ بھارت کی دیگر ریاستوں کی طرح مہاراشٹر میں بھی غربت بہت بڑھ گئی ہے، دوسری طرف بھارت کی اہم اور خوش حال ریاستوں میں مہاراشٹر کو بھی شمار کیا جاتا ہے لیکن اس ‘خوش حال’ ریاست میں صرف ایک ماہ (نومبر 2019) کے دوران 300 کسانوں نے اپنی زندگی کا خاتمہ کیا تھا، جب کہ جنوری سے ستمبر 2019 تک خود کشی کرنے والے کسانوں کی مجموعی تعداد 2532 رہی۔
