Tag: خودکشی

ہانگ کانگ: پاکستانی پولیس افسرنےہم وطن کوخودکشی سےروک لیا

ہانگ کانگ : پاکستانی پولیس افسر نے ہانگ کانگ میں ہم وطن کو20میٹربلند کرین سےکود کرخودکشی کرنے سے روک لیا۔

تفصیلات کےمطابق ہانگ کانگ پولیس کے20سالہ پاکستانی افسر افضل ظفر نے یاو ماتائی کے علاقے میں تعمیراتی سائٹ پر صبح دس بجےایک شخص کودیکھا جو 20میٹر بلند کرین پر چڑھ کر خودکشی کرنے کی کوشش کررہاتھا۔

پولیس افسر ظفر کواعلیٰ افسران کی جانب سے ہدایات دی گئی کہ وہ اس مشکل صورت حال میں اس شخص کی مدد کرے۔

پولیس افسر کا کہناتھاکہ میں نے عنان سے اردو زبان میں بات کی اور اسے منانے کی کوشش کی کے وہ کرین سے اتر کرنیچے آجائےاور میں اس کوشش میں کامیاب رہا۔

پولیس کمانڈر چیونگ لیونگ کا کہناتھاکہ ظفر کی جانب سے ان کی ہدایات کے تحت کسی کو خودکشی کرنے سے روکنے کا یہ پہلا واقعہ تھا۔

انہوں نے میڈیا سے بات کرتے ہوئے بتایا کہ خودکشی کرنے والے شخص عنان نے جب پولیس افسر ظفرسے اپنی زبان میں بات کی تواسے اچھا محسوس ہواکیونکہ دونوں ایک زبان بولتےہیں۔

ہانگ کانگ پولیس میں فرائض انجام دینے والے بیس سالہ ظفر’جیم اسٹون‘ پروجیکٹ کے گریجویٹ ہیں جس کا مقصد لسانی رکاوٹوں پر قابو پانے کےلیے اپناکردار ادا کرناہے۔

واضح رہےکہ ظفر’جیم اسٹون‘ پروگرام کے پانچویں غیر چینی گریجویٹ ہیں اوروہ سرکاری طور پر گزشتہ سال اپریل میں ہانگ کانگ پولیس میں شامل ہوئے تھے۔

مارچ 14, 2017
بھارتی شہری خودکشیوں میں سرفہرست

عالمی ادارہ صحت ڈبلیو ایچ او کا کہنا ہے کہ دنیا بھر میں ذہنی تناؤ کے باعث سب سے زیادہ خودکشیاں بھارت میں ہوتی ہیں۔

عالمی ادارہ صحت نے ڈپریشن اور دیگر عام ذہنی امراض کے حوالے سے تازہ ترین رپورٹ جاری کردی۔ رپورٹ کے مطابق دنیا بھر میں 30 کروڑ 22 لاکھ افراد ذہنی تناؤ یا اس سے ملتی جلتی بیماریوں کا شکار ہیں جو کہ دنیا کی کل آبادی کا 4.3 فیصد حصہ ہے۔

ذہنی امراض کا شکار ان افراد میں سے ڈپریشن کے تقریباً 50 فیصد مریض بھارت، چین اور جنوب مشرقی ایشیا میں موجود ہیں۔

رپورٹ میں بتایا گیا کہ ڈپریشن کی 2 نہایت عام اقسام ہیں جنہیں ڈپریسو ڈس آرڈر اور اینگزائٹی (بے چینی) کہا جاتا ہے۔

ڈپریسو ڈس آرڈر میں مریض اداسی اور پشیمانی کا شکار ہوجاتا ہے۔ اس مرض میں نیند میں خلل اور بھوک میں کمی واقع ہوجاتی ہے۔

اینگزائٹی ڈس آرڈر میں مریض میں بے چینی اور خوف پیدا ہوجاتا ہے۔ اس مرض میں مبتلا افراد جسم کے مختلف حصوں میں درد کی شکایت کرتے ہیں جبکہ یہ مختلف فوبیائی امراض کا بھی شکار ہوجاتے ہیں۔

ڈبلیو ایچ او کے مطابق یہ دونوں امراض نہایت عام ہیں اور قابل تشخیص اور قابل علاج ہیں۔

رپورٹ میں مزید بتایا گیا کہ سنہ 2015 میں 7 لاکھ 88 ہزار افراد نے خودکشیاں کر کے اپنی زندگیوں کا خاتمہ کیا جب کہ خود سوزی کرنے والوں کی تعداد اس سے کہیں زیادہ ہے۔ ان خودکشیوں کی 20 بڑی وجوہات میں سے ایک ڈپریشن بھی تھی۔

سنہ 2014 میں دنیا بھر میں کی جانے والی خود کشیوں میں سے 78 فیصد غریب ممالک یا ترقی پذیر ممالک میں کی گئیں اور 2012 میں سب سے زیادہ خود کشیاں کرنے والے ممالک میں بھارت سر فہرست تھا۔

ڈپریشن اور دیگر ذہنی امراض سے متعلق مزید مضامین:

دماغی امراض کے بارے میں مفروضات اور ان کی حقیقت

ڈپریشن کی وہ علامات جو کوئی نہیں جانتا

ڈپریشن کم کرنے کے 10 انوکھے طریقے

ڈپریشن کا شکار افراد کی مدد کریں

مارچ 2, 2017
اسلام آباد، طالب علم کی درخت سے لٹکی لاش برآمد

اسلام آباد : دارالحکومت میں میرہ بیری کے علاقے میں مدرسے کے طالب علم کی درخت سے لٹکی ہوئی لاش ملی ہے، پولیس کا کہنا ہے کہ نوجوان طالب علم کی موت خود کشی کا واقعہ لگتا ہے۔

تفصیلات کے مطابق اسلام آباد کے علاقے میرہ بیری میں مدرسے کے طالب علم کی لاش بر آمد ہوئی ہے،تاحال موت کی وجہ کا تعین نہیں ہوسکا ہے پولیس کا خیال ہے کہ طالب علم نے خود کشی کی ہے۔

ذرائع کے مطابق 11 سال کے طالبعلم کے گلے میں پھندا ڈلا ہوا تھا امکان ظاہر کیا جارہا ہے کہ نوجوان طالب علم نے درخت سے لٹک کر خود کشی کی۔

پولیس نے بچے کی لاش قریبی اسپتال منتقل کردی گئی ہے،جہاں لاش کا پوسٹ مارٹم کیا جانا تھا لیکن ہلاک ہونے والے طالب علم کے والد نے پوسٹ مارٹم کروانے سے انکار کرتے ہوئے بیٹے کی میت آبائی علاقے خوشاب لے گئے۔

پولیس کو دیے گئے بیان میں طالب علم کے والد امیر عالم کا کہنا تھا کہ ہماری کسی سے دشمنی نہیں ہے اور ہی کسی پہ قتل کا شک ہے،جو اللہ کو مرضی تھی ہو گیا میں اس کی رضا میں راضی ہوں۔

دوسری جانب پولیس نے مدرسے کے نگراں کو تحقیقات کے لیے پولیس اسٹیشن تھانہ شالیمار بلا لیا ہے جب کہ میرہ بیری کے علاقہ مکینوں کے بیانات بھی قلم بند کر لیے ہیں۔

پولیس کا کہنا ہے کہ تحقیقات جاری ہیں اور جلد ہی اس کیس کو منطقی انجام تک پہنچا کر ملزمان کو قرار واقعی سزا دلوائی جائے گی۔

نومبر 8, 2016
اسپین کے قونصلر اتاشی نے خودکشی کرلی

اسلام آباد : اسپین کے سفارت خانے کے قونصلراتاشی نے اسلام آباد میں خود کو گولی مار کر خودکشی کرلی۔

تفصیلات کے مطابق دارالحکومت اسلام آباد میں اسپین کے قونصلر اتاشی نے خود کو گولی مار کر خودکشی کرلی۔قونصلراتاشی اسلام آباد میں تھانہ کوہسار کی حدود ایف سیون میں رہائش پذیر تھے۔

اسپین کے قونصلر اتاشی جون جینز پچھلے34 سالوں سےپاکستان میں مقیم تھےوہ سانس کی بیماری میں مبتلا تھے اور ان کا نجی اسپتال میں علاج ہورہاتھا۔

ایس پی سٹی شیخ زبیر کا کہنا ہے کہ آج صبح جب خانسامہ ان کے کمرے کی طرف گیا تو ان کے کمرے کا دروازہ اندر سے بند تھا جس پر کمرے کا دروازہ توڑا گیا تو قونصلر اتاشی مردہ حالت میں پائے گئے اور ان کے پاس سے 36بور کا پستول برآمد ہوا۔

پولیس حکام کا کہنا ہے کہ قونصلراتاشی کی لاش اسپتال منتقل کردی گئی اور اسپین کے سفارتخانے کوساری صورت حال سے آگاہ کردیاگیا ہے۔

اسپین کے قونصلر اتاشی کا پوسٹ مارٹم اسلام آباد پولی کلینک اسپتال میں ہوا جس کےمطابق جان جینز نے خودکشی کی ہے۔انہوں نےاپنے منہ کے اندر پستول کی نالی ڈال کر فائر کردیا جس کے نتیجے میں گولی دماغ کے پچھلے حصے پر لگی اور ان کی موت واقع ہوگئی۔

اکتوبر 13, 2016
جرمنی میں دہشتگردی کےالزام میں گرفتارقیدی کی خودکشی

برلن : برلن ایئر پورٹ پر حملے کی منصوبہ بندی کے الزام میں گرفتار قیدی نےلایپزیگ شہر کی جیل میں خودکشی کر لی۔

تفصیلات کےمطابق جرمن حکام کاکہناہےکہ برلن ائیرپورٹ پردہشت گردی کی منصوبہ بندی کے الزام میں گرفتار جابر البکرنامی شامی شہری جیل کے سیل میں خودکشی کرلی۔چوبیس گھنٹےنگرانی میں موجود جابر البکربھوک ہڑتال پرتھا۔

پولیس جبار کی کئی ماہ سے نگرانی کر رہی تھی اور انٹیلیجنس حکام کو ایسی اطلاعات ملی تھیں کہ وہ ممکنہ طور پر کسی حملے کی منصوبہ بندی کر رہا ہے جس پر حکام نے مشرقی ریاست زاکسن میں پولیس کو الرٹ کیاتھا۔

خیال رہے کہ ہفتے کے روز جابر البکرکی گرفتاری کےلیےاس کےفلیٹ پرچھاپہ ماراگیا تھا جہاں سے 1.5 کلوگرام گھریلو سطح پر تیار کیے جانے والا دھماکہ خیز مواد ملا تاہم وہ فرارہونے میں کامیاب ہوگیا تھا پیر کے روز جابرکو گرفتار کرلیا گیا تھا۔

واضح رہے کہ بائیس سالہ شامی پناہ گزین جابرالبکرکوگزشتہ سال جرمنی میں پناہ دی گئی تھی۔

اکتوبر 13, 2016
خودکشی کی روک تھام کا عالمی دن: پاکستان میں منفی رجحان میں اضافہ

اسلام آباد: آج پاکستان سمیت دنیا بھر میں خودکشی کی روک تھام کا عالمی دن منایا جارہا ہے۔ عالمی ادارہ صحت ڈبلیو ایچ او کے مطابق دنیا بھر میں ہر سال 10 لاکھ افراد اپنی زندگی کے خاتمہ کی کوشش کرتے ہیں۔

خودکشی کی روک تھام کے عالمی دن کو منانے کا مقصد خودکشی کے واقعات کی روک تھام کے لیے عوامی شعور اجاگر کرنا ہے۔ ایک رپورٹ کے مطابق ہر روز دنیا بھر میں 3 ہزار افراد خودکشی کی کوشش کرتے ہیں۔ خودکشی کرنے والوں میں 15 سے 44 سال کی عمر کے لوگوں کی زیادہ تعداد شامل ہے۔

خود کشی کے خلاف کام کرنے والی عالمی تنظیم انٹرنیشنل ایسوسی ایشن فار سوسائڈ پریوینشن ۔ آئی اے ایس پی کا کہنا ہے کہ دنیا بھر میں ہر سال 10 لاکھ سے زائد لوگ خود کشی کرتے ہیں اور ان کی تعداد جنگوں، دہشت گردی کے واقعات اور قتل کے نتیجہ میں ہلاک ہونے والوں کے مقابلے میں زیادہ ہے۔

خود کشی کی کئی وجوہات ہوتی ہیں۔ ماہرین نفسیات کے مطابق خودکشی کے 90 فیصد واقعات کا تعلق ڈپریشن سے ہوتا ہے۔

ایک محتاط اندازے کے مطابق پاکستان میں سال بھر میں 5 ہزار سے زائد لوگ خود کشی کرتے ہیں اور اس رجحان میں اضافہ ہورہا ہے۔

پاکستانی ماہرین نفسیات کے مطابق بڑھتی ہوئی سماجی و معاشی مشکلات نے صورتحال کی سنگینی میں مزید اضافہ کردیا ہے جبکہ ان مسائل پر قابو پانے میں حکومت کی ناکامی لوگوں میں مایوسی کو بڑھاتی ہے جو بالآخر ڈپریشن میں تبدیل ہوجاتی ہے۔

ماہرین کا کہنا ہے کہ مایوسی خود کشی کے عوامل میں سے ایک ہے کیونکہ انسان جتنا ذہنی دباؤ کا شکار ہوتا ہے اس میں مایوسی اور نا امیدی اتنی ہی بڑھ جاتی ہے۔

ایک طبی ماہر کے مطابق خود کشی کے رجحان کے سدباب کے لیے لوگوں کے علم اور آگاہی میں اضافہ کرنے اور ان افراد کی مدد کرنے کی ضرورت ہے جو خود کشی کی کوشش کرچکے ہیں یا جو گھر کے کسی فرد کی خود کشی سے متاثر ہوئے ہیں۔

ستمبر 10, 2016
کراچی : سول اسپتال میں میڈیکل آفیسر کی ہلاکت معمہ بن گئی

کراچی : سول اسپتال میں میڈیکل آفیسر ڈاکٹر انیل کمار پراسرار طور پر اسپتال کے کمرے میں مردہ پائے گئے،پولیس کا کہنا ہے واقعہ خودکشی کا ہے.

تفصیلات کے مطابق سول اسپتال میں ڈاکٹر انیل کمار پر اسرار طور پر اسپتال کے کمرے میں مردہ پائے گئے،ڈاکٹر سول اسپتال میڈیکل یونٹ نمبر ٹو میں تعینات تھے.

ترجمان کراچی پولیس کا کہنا ہے کہ ڈاکٹرانیل نے خودکشی کی،ان کی لاش کمرے سے ملی جہاں وہ رہائش پذیر تھے.

پولیس حکام کے مطابق لاش پوسٹ مارٹم کےلیے منتقل کر دی گئی ہے اور پوسٹ مارٹم رپورٹ آنے کے بعد ہی حقائق سامنے آئیں گے تاہم واقعے کی تحقیقات شروع کر دی گئی ہیں.

واضح رہے کہ ڈاکٹر انیل کا موبائل فون پولیس نے قبضے میں لے لیا ہے جس کا ریکارڈ چیک کیا جا رہا ہے.

جولائی 29, 2016
’’پوکے مون گو‘‘ نے برطانوی نوجوان کو خودکشی کرنے سے بچالیا

لائیسٹر: بائیس سالہ برطانوی نوجوان کو’’پوکے مون گو‘‘ نے خودکشی کرنے سے بچالیا،نوجوان شدید ڈپریشن میں مبتلا تھا اور پہلے بھی ایک بار اپنی جان لینے کی کوشش کرچکا تھا.

تفصیلات کے مطابق برطانوی نوجوان جیک کلبورن کو ’’پوکے مون گو‘‘ نے خودکشی کرنے سے بچالیا،شدید ڈپریشن میں مبتلا ہونے کی وجہ سے وہ اپنے دوستوں کے علاوہ اپنی نوکری سے بھی محروم ہوچکا تھا.

برطانوی نوجوان کی ڈپریشن کی بیماری میں اس قدر شدت آگئی تھی کہ رواں سال اس نے خودکشی کے ارادے سے عمارت کی چھت پر سے چھلانگ لگانے کی بھی کوشش کی تھی.

جیک کلبورن کے مطابق اسے محسوس ہورہا تھا جیسے وہ گھر میں قید ہوکر رہ گیا ہے اور وہ اب کبھی بھی چار دیواری سے باہر نہیں نکل سکے گا،لیکن جب اس نے ’’پوکے مون گو‘ ‘ ڈاؤن لوڈ کرکے کھیلنا شروع کیا تو اس گیم کی وجہ سے اسے گھر میں ادھر ادھر بھاگنے دوڑنے کے علاوہ گھر سے باہر بھی نکلنا پڑا.

*ورزش سے ڈپریشن میں کمی ہوتی ہے، تحقیق

کلبورن کا کہنا ہے کہ اس گیم کی وجہ سے وہ اب تک 75 میل تک دوڑ چکا ہے اور اس وجہ سے اس کی ڈپریشن کی بیماری میں بڑی حد تک کمی واقع ہوئی اور وہ دوبارہ اپنی نارمل زندگی کی طرف واپس آرہا ہے.

*پوکیمون گو گیم جیتنے کیلئے نوجوان نے نوکری سے استعفیٰ دیدیا

یاد رہے کہ گزشتہ ہفتے نیوزی لینڈ سے تعلق رکھنے والے ایک نوجوان نے ورچوئل ریئلٹی پر مبنی’پوکےمون گو ‘گیم جیتنے کےلیے ملازمت سے استعفیٰ دے دیا تھا

جولائی 25, 2016
تامل فلموں کی معروف اداکارہ پوجا نے خودکو آگ لگا کر خود کشی کرلی

ممبئی : بھارت کی مقامی تامل اداکارہ پوجا نے سسرالیوں کی جانب سے فلموں میں کام کرنے سے روکنے پر دل بر داشتہ ہو کر خود کو آگ لگا کر خودکشی کر لی۔

بھارت کی مقامی علاقے تا مل کی فلم انڈسٹری ” ٹالی ووڈ ” کی اداکارہ پوجا ایچ نے مبینہ طور پر سسرالیوں کے رویے سے دل برداشتہ ہو کر خود کو آگ لگا لی تھی جنہیں نہایت تشویشناک حالت میں اسپتال منتقل کیا گیا تھا جہاں چار روز تک موت و زندگی کی کشمکش میں مبتلا تامل اداکارہ زندگی کی بازی ہار گئیں۔

ذرائع کے مطابق تامل فلم انڈستری کی مقبول اداکارہ پوجا ایچ شادی شدہ تھیں اورانہیں سسرال کی جانب سے فلموں میں کام کرنے پر تنقید کا نشانہ بنایاجاتا تھا اور انہیں طعنے دیے جاتے ہیں روز روز کے جھگڑوں کے بعد جب سسرالیوں نے انہیں فلم میں کام کرنے سے روکا تو انہوں نے دل بر داشتہ ہو کر خود کو آگ لگالی تھی۔

اسی سے متعلق : بھارتی ٹی وی اداکارہ پرتُیوشا بنرجی نے خود کشی کر لی

ڈاکٹروں کا کہنا تھا کہ تامل اداکارہ کو جھلسی ہو ئی حالت میں اسپتال میں لایا گیا تھا،اُن کا جسم 90 فی صد تک جھلس چکا تھا اور اُن کی حالت نہایت نازک تھی، انہیں ما ہر معالجین نے طبی امدا فراہم کر رہے تھے تا ہم چار دن تک موت سے لڑنے کے بعد اداکارہ خالق حقیقی سے جا ملیں۔

دوسری جانب اداکارہ کے انتقال کے بعد پوجا کے والدین نے سسرال والوں پر قتل کا الزام عائد کرتے ہوئے مقدمہ درج کرادیا ہے جس کے بعد کولکتہ پولیس نے تفتیش شروع کردی ہے اور سسرالیوں کو گرفتار کر لیا ہے۔

جولائی 24, 2016
پشاوراورکراچی میں دو طالب علموں نے مبینہ طور پرخودکشی کرلی

پشاور/ کراچی : پشاوراورکراچی میں دو طالب علموں نے مبینہ طور پر خودکشی کرلی

آغاخان یونیورسٹی کے شعبہ نرسنگ کا طالب علم وسیع اللہ اپنے کمرے میں پنکھے سےلٹکا ہوا پایا گیا جبکہ پشاور میں اسکول کےطالب علم نےگولی مارکرخودکشی کرلی۔

تقصیلات کے مطابق متوفی وسیع اللہ آغاخان یونیورسٹی کے کمیپس ہوسٹل میں رہاہش پذیر تھا۔ وسیع اللہ کچھ دنوں سے پریشان اور کلاسز سے بھی اکثرغیرحاضررہتا تھا۔ بدھ کی رات 10 بجے پُراسرارحالت میں کمرے میں پنکھے سے لٹکا ہوا پایا گیا۔

اس واقعے کے بعد انظامیہ نے پولیس کو طلب کیا، پولیس نے قانونی کارروائی کے بعد طالب علم کی لاش کو آغاخان سرد خانے بھیج دیا۔

وسیع اللہ کے ساتھی طالب علموں کا کہنا ہے کہ وہ ایک ہونہار طالب علم ہونے کے ساتھ ساتھ ایک خوش اخلاق اورملنسار انسان تھا ۔

خودکشی کے واقعے کے بعد یونیورسٹی میں نرسنگ کے امتحانات کو ملتوی کردیا گیا اور تمام تعلیمی سرگرمیوں کوآغا خان میڈیکل کالجز اورنرسنگ اسکول میں معطل کر دیا گیا۔

پشاورمیں بھی آج خودکشی کا ایک اورواقعہ سامنے آیا ہے جس میں 14 سالہ طالب علم سلیمان نے گارڈ کی بندوق سے خود کو گولی ما رلی۔ تاہم اسے فوراً لیڈی ریڈنگ اسپتال لے جایا گیا جہاں ڈاکٹرز نے اس کی موت کی تصدیق کردی۔

گذشتہ ایک دن کے دوران خودکشی کا یہ دوسرا واقعہ پیش آیا جس میں طالب علم نے خودکشی کی۔

یاد رہے اس سے قبل 6 اپریل 2010 کو اسی طرج کا ایک واقعہ پیش آیا تھا جب آغاخان یونیورسٹی کا سیکنڈ ائیر کا طالب علم پُراسرار حالت میں پنکھے سے لٹکا ہوا پایا گیا۔ طالب علم کا تعلق چترال سے تھا۔

اپریل 21, 2016