نئی دہلی: بھارتی ریاست تلنگانہ میں انٹرمیڈیٹ کے امتحانات کے نتائج کا اعلان کردیا جس میں 24 گھنٹے کے دوران کم نمبر حاصل کرنے پر دل برداشتہ ہوکر 8 طلبا نے خودکشی کرلی۔
بھارتی میڈیا رپورٹ کے مطابق خودکشی کرنے والے 8 طلبا میں سے 5 کا تعلق حیدرآرباد سے تھا، پولیس کا کہنا ہے کہ اس واقعے کی تحقیقات کی جارہی ہے۔
بھارتی پولیس نے بتایا کہ خودکشی کرنے والے طلبہ میں سے کچھ نے گلے میں پھندا لگا کر جب کہ کچھ نے عمارت سے چھلانگ لگا کر اپنی زندگی کا خاتمہ کیا۔
رپورٹ میں بتایا گیا کہ اس سے قبل پچھلے ماہ جب ریاست آندھرا پردیش میں بھی انٹرمیڈیٹ امتحانات کے نتائج آئے تھے تو 9 طلبا نے خودکشی کرلی تھی۔
بھارت کے ماہر تعلیم کا اس حوالے سے کہنا ہے کہ بھارت میں طلبہ میں خودکشی کے واقعات کی اہم وجہ یہ ہے کہ انہیں ابتدا سے ہی تعلیم کی اہمیت سمجھنے کے بجائے امتحانات میں پرچہ لکھنے اور زیادہ سے زیادہ مارکس لینے پر زور دیا جاتا ہے۔
