آسٹریلیا کے شہر برسبین میں واقع ایک ویران اور پراسرار آسیب زدہ خوفناک گھر جو “بھوت بنگلہ” کے نام سے مشہور تھا آخر کار کئی سالوں تک خالی رہنے کے بعد نیلام کردیا گیا۔
خوفناک‘سمجھا جانے والا قدیمی گھر 3.1 ملین آسٹریلوی ڈالر میں ایک نئی فیملی کو فروخت کردیا گیا۔ یہ خوفناک گھر 30 سال سے خالی پڑا تھا، جب اس کے پچھلے مالکان اچانک اسے چھوڑ کر چلے گئے تھے۔
یہ کینٹین نما خوفناک گھر 31 پیروٹ اسٹریٹ پر واقع ہے، کہا جاتا ہے کہ اس تین منزلہ عمارت کو ایک جنگ کے دوران اسپتال کے طور پر استعمال کیا گیا تھا، گھر کا پچھلا حصہ پراسرار طور پر جھاڑیوں اور پودوں سے ڈھکا ہوا ہے، جس کی وجہ سے آس پاس کے علاقہ مکین اسے ’بھوت بنگلہ‘کے نام سے یاد کرتے ہیں۔
میڈیا رپورٹس کے مطابق اس بھوت بنگلے کے سابقہ مالکان نے 1990 کی دہائی میں اچانک اسے چھوڑ دیا تھا۔ دلچسپ بات یہ ہے کہ جب انہوں نے اس گھر چھوڑا تو ایسا لگا جیسے وہ کسی ایمرجنسی یا خوف میں سب کچھ چھوڑ چھاڑ کر بھاگے ہوں۔
کیونکہ میز پر نہ صرف کھانے کے برتن جوں کے توں رکھے تھے بلکہ الماریوں میں استعمال کی تمام چیزیں موجود تھیں، کھلونے اور پرانا فرنیچر بھی اپنی جگہ موجود تھا۔
اس خوفناک گھر کا معائنہ کرنے والی معروف یوٹیوبر اور قدیم عمارتوں کی ماہر ماریان ٹیلر نے بتایا کہ گھر کے تہہ خانے میں ایک بہت ہی پراسرار اور خوفناک جگہ بھی ہے جسے دیکھ کر لگتا ہے جیسے یہ پرانی جنگوں کے دوران کسی پناہ گاہ کے طور پر استعمال ہوئی ہو۔
اس کی نیلامی کے دن 150 افراد موجود تھے، جن میں سے صرف 15 افراد رجسٹرڈ تھے، پہلی بولی 2.75 ملین کی پیش کی گئی جس کے بعد تیزی سے اضافہ ہوتا گیا اور گھر کی حتمی قیمت3.1 ملین ڈالر طے پائی۔ قابل ذکر بات یہ ہے کہ یہ قیمت علاقے کی اوسط قیمت ($1.925 ملین) سے کہیں زیادہ ہے۔
ابتدائی تحقیق سے پتہ چلا ہے کہ یہ گھر 1912 یا اس سے بھی پہلے کا ہوسکتا ہے۔ یہ زمین 1913 سے "رابرٹسن” خاندان کی ملکیت تھی اور عمارت ممکنہ طور پر 1914 یا 15 میں تعمیر ہوئی تھی۔
یہ پراسرار گھر اب ایک مقامی خاندان نے خرید لیا ہے، جو یہاں خود رہنے کا ارادہ رکھتا ہے، یہ نیا خاندان اس تاریخی عمارت کی تزئین و آرائش کرکے اسے رہنے کے قابل بنائے گا۔