جرمنی کے شہر کولون میں دوسری جنگ عظیم کے 3 خطرناک بم ملنے کے بعد خوف و ہراس پھیل گیا حکام نے 20 ہزار سے زائد افراد کو فوری علاقہ خالی کرکے کا حکم دے دیا۔
امریکی ادارے سی این این کی رپورٹ کے مطابق جرمن شہر کولون سے 2بم20ٹن اور ایک10ٹن کا امریکی بم برآمد کیا گیا تھا تینوں بم گزشتہ روز ایک شپ یارڈ سے دریافت ہوئے تھے۔
3 خطرناک بم کی خبر ملتے ہی مقامی انتظامیہ نے حفاظتی اقدامات کے تحت شہر کے تمام مقامی اسپتال، ریٹائرمنٹ ہومز اور اہم ریلوےاسٹیشن سمیت کئی عمارتیں خالی کرالی تھیں تاکہ بموں کو ناکارہ بنایا جاسکے۔
امریکی میڈیا کے مطابق میوزیم، اسکولز اور مشہور ثقافتی مقامات بھی خالی کرالیے گئے، جس کے بعد بموں کو ناکارہ بنانے کے عمل کا باقاعدہ آغاز کیا گیا۔
اس سے قبل حکام نے شہریوں کو سخت وارننگ جاری کی تھی کہ انخلا سے انکار پر پولیس لوگوں کو زبردستی ان کے گھروں سے باہر نکال سکتی ہے۔
بعد ازاں جرمن شہر کولون سے 20 ہزار 500 افراد کا انخلا مکمل کیا گیا جو کہ دوسری جنگ عظیم کے بعد شہر کی سب سے بڑی انخلا کی کارروائی تھی، حکام نے تینوں بڑے بم انتہائی مہارت کے ساتھ بغیر پھٹے کامیابی سے ناکارہ بنا دیے۔
واضح رہے کہ کولون پر دوسری جنگ عظیم کے دوران 262 فضائی حملے کیے گئے تھے جس میں 20ہزار افراد کی ہلاکتیں ہوئی تھیں، قبل ازیں جرمن شہر کولون میں گزشتہ سال اکتوبر اور دسمبر میں بھی بم ملنے پر لوگوں سے علاقہ خالی کرالیا گیا تھا۔
رپورٹ کے مطابق دوسری عالمی جنگ کے دوران گرائے گئے یہ تینوں بم امریکی ساختہ ہیں۔ اسی تناظر میں کولون شہر میں دریائے رائن کے کنارے واقعے ڈوئیٹس کے علاقے سے بیس ہزار افراد کا انخلا مکمل کیا گیا تھا۔
