سِکل سیل (sickle cell) ایک قسم کی طبی پیچیدگی ہے جو خون کے سرخ ذرات میں موجود ہیموگلوبن کو نقصان پہنچاتی ہے اور یوں خون کے خلیات کے ذریعے پورے بدن کو آکسیجن پہنچانے کا عمل متاثر ہوسکتا ہے۔
ہیموگلوبن وہ پروٹین ہے جو خون کے سرخ خلیوں میں موجود ہوتا ہے اور یہ جسم کو آکسیجن پہنچانے کا ذریعہ ہے۔ یہ قدرتی طریقے سے کام کرتے ہوئے ہمارے پھیپھڑوں سے آکسیجن لے کر پورے جسم کے ٹشوز کو پہنچاتا ہے۔ اس عمل سے ہمارے خلیات اپنا کام صحیح طرح سے انجام دے پاتے ہیں۔
جب ہمارے جسم کو سِکل سیل جیسی بیماری متاثر کرتی ہے تو جسم تک آکسیجن پہنچانے میں دشواری اور رکاوٹ پیدا ہوتی ہے اور یہ مسئلہ رفتہ رفتہ خطرناک صورت اختیار کر جاتا ہے۔
اس طبی پیچیدگی کو مختصرا ایس سی ڈی (SCD) بھی کہا جاتا ہے۔ طبی ماہرین اسے موروثی اور خون کی خطرناک پیچیدگی مانتے ہیں۔ اس کا شکار عموما بچے ہوتے ہیں۔
طبی ماہرین کے مطابق سِکل سیل یا ایس سی ڈی میں مبتلا لوگوں کو شدید درد ہوتا ہے اور دورے پڑتے ہیں۔ اس طبی مسئلے کے سبب ایسے انفیکشن ہوسکتے ہیں جو زندگی کے لیے خطرناک ثابت ہوں۔ عام طور پر اس مسئلے کی صورت میں متاثرہ فرد خون کی کمی کا شکار ہوجاتا ہے۔ اسے شدید نقاہت کم زوری کے ساتھ کئی ایسے مسائل کا سامنا کرنا پڑتا ہے جن کی وجہ جسم کا آکسیجن کی مناسب اور ضروری مقدار حاصل نہ کرپانا ہے۔
ایس سی ڈی کی تشخیص ابتدائی عمر میں ہو جائے تو اس کے فوری علاج پر توجہ دی جاتی ہے۔ اس میں حفاظتی ٹیکوں اور اینٹی بائیوٹکس سے بھی مدد لی جاسکتی ہے۔
