Tag: خیبر

خیبر : باڑہ تحصیل کمپاؤنڈ کے پولیس اسٹیشن میں دہشت گردوں نے حملہ کردیا، حملے میں 3 پولیس اہلکار شہید اور 4اہلکار زخمی ہوئے۔

تفصیلات کے مطابق صوبہ خیبر پختونخوا میں ضم شدہ قبائلی ضلع خیبر کے تحصیل باڑہ بازار میں دھماکا اور فائرنگ ہوئی ، ریسکیوذرائع نے بتایا کہ دھماکا باڑہ بازار تحصیل کمپاؤنڈ میں پولیس اسٹیشن کے قریب ہوا۔

ریسکیو ذرائع کا کہنا تھا کہ دھماکے کے بعد شدید فائرنگ بھی کی گئی، دھماکے کے نتیجے میں 4 افراد زخمی ہوگئے تاہم ریسکیو1122 نے دھماکے میں زخمیوں کو ایچ ایم سی علاج کے لئے منتقل کردیا ہے۔

پولیس نے بتایا ہے کہ ابتدائی طور پر حملہ خودکش ہوسکتا ہے تاہم دھماکے کے بعد باڑہ بازار کو بند کردیا گیا اور علاقے کوگھیرے میں لے لیا ہے۔

پولیس کا کہنا تھا کہ باڑہ تحصیل کمپاؤنڈ کے پولیس اسٹیشن میں دہشت گردوں نے حملہ کیا ، دہشت گرد حملے میں 3 پولیس اہلکار شہید اور 4اہلکار زخمی ہوئے۔

حکام کا کہنا تھا کہ پولیس اہلکاروں نےبروقت کارروائی کرکےدودہشتگردوں کو گیٹ پرروکا، دونوں حملہ آوروں کی جانب سے فائرنگ اور دھماکے کئے گئے، فائرنگ کے تبادلےمیں اہلکار زخمی ہوئے ، جس میں ایک کی حالت تشویشناک ہے‌۔

پولیس نے بتایا کہ دھماکےکی وجہ سے عمارت اور گیٹ کو نقصان پہنچا، بادی النظر حملہ آوروں نے اندر جانے میں ناکامی پر خود کو اڑا دیا۔

یاد رہے گزشتہ رات پشاور پولیس اسٹیشن ریگی ماڈل ٹاون کے انٹری چیک پوسٹ پر نامعلوم افراد کی فائرنگ سے دو پولیس اہلکار شہید جبکہ دو اہلکار زخمی ہوگئے تھے۔

پولیس کے مطابق سبحان شیر ناکہ بندی پر حملے میں شرپسندوں کی تعداد معلوم نہ ہوسکی، جہاں سے فائرنگ کی گئی وہاں مکمل آندھیرا تھا۔

راولپنڈی : سیکیورٹی فورسز کے ضلع خیبر میں دہشت گردوں کیخلاف آپریشن کے دوران میجر عبداللہ بہادری سے لڑتے ہوئے شہید ہوگئے جبکہ تین دہشت گرد اور سہولت کار کو گرفتار کرلیا گیا۔

پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا ہے کہ سیکیورٹی فورسز نے ضلع خیبر کے علاقے شکاس میں دہشت گردوں کی موجودگی کی اطلاعات پر انٹیلی جنس پر مبنی آپریشن کیا۔

آئی ایس پی آر کا کہنا تھا کہ میجر عبداللہ کی قیادت میں سیکیورٹی دورسز نے ناکہ بندی کرکے دہشت گردوں کے فرار کے راستے مسدود کردیئے، دہشت گردوں نے اس دوران شدید فائرنگ کردی، جس کے نتیجے میں وطن کے بہادر سپوت کوہاٹ کے 33 سالہ میجر میاں عبداللہ شاہ بہادری سے لڑتے ہوئے شہید ہوگئے۔

ترجمان نے بتایا کہ آپریشن کے دوران تین دہشت گردوں اور ان کے سہولت کاروں کو گرفتار کر لیا گیا ہے اور علاقے میں ممکنہ دہشت گردوں کے خاتمے کے لئے کلیئرنس آپریشن بھی کیا گیا۔

پاک ترجمان نے اس عزم کا اعادہ کیا کہ سیکیورٹی فورسز دہشت گردی کی لعنت کے خاتمے کے لئے پرعزم ہیں اور جوانوں کی یہ قربانیاں ہمارے عزم کو مزید مضبوط کرتی ہیں۔

گذشتہ روز شمالی وزیرستان کے علاقے میران شاہ میں گاڑی میں سوار خودکش حملہ آور نے خود کو اُڑا لیا تھا ، دھماکے میں تین اہلکار شہید جبکہ تین شہری شدید زخمی ہوگئے تھے۔

آئی ایس پی آر کے مطابق شہدا میں میانوالی کے اکتالیس سالہ نائب صوبیدار صاحب خان، ڈیرہ اسماعیل خان کے چالیس سالہ نائیک محمد ابراہیم اور مردان کے چوبیس سالہ سپاہی جہانگیر خان شامل تھے۔

ترجمان کا کہنا تھا کہ خودکش حملہ آور کا ہدف سکیورٹی فورسز کی چوکی تھی تاہم ڈیوٹی پر موجود جوانوں نے مشکوک حملہ آور کو بروقت روک لیا، جس سے بڑی تباہی ٹل گئی۔