اٹک: خیبرپختونخوا کے شہر اٹک میں نامعلوم افراد کی اسکول وین پر فائرنگ سے 2 بچے جاں بحق اور 5 زخمی ہوگئے۔
تفصیلات کے مطابق اٹک کے علاقے ڈھیری کوٹ نامعلوم افراد نے اسکول وین پر فائرنگ کردی، فائرنگ کی زد میں آکر 2 بچے جاں بحق اور 5 زخمی ہوگئے۔
ریسکیو ذرائع کا کہنا ہے کہ فائرنگ سے اسکول وین کا ڈرائیور بھی زخمی ہوا ہے، زخمی بچوں اور لاشوں کو اسپتال منتقل کردیا گیا ہے، تمام بچوں کی عمریں 10 سے 12 سال کے درمیان ہیں۔
پشاور: خیبر پختونخوا کے ایک سرکاری رپورٹ میں انکشاف کیا گیا ہے کہ صوبے میں 93 فی صد شہری مضر صحت دودھ پی رہے ہیں۔
خیبر پختونخوا میں قابل استعمال دودھ نایاب ہو گیا ہے، 93 فی صد شہری مضر صحت دودھ پی رہے ہیں، کے پی فوڈ سیفٹی اتھارٹی نے تشویش ناک رپورٹ جاری کر دی۔
رپورٹ کے مطابق صوبے بھر میں صرف 7 فی صد دودھ استعمال کے قابل ہے، دودھ کے 583 میں سے 541 نمونے غیر معیاری اور مضر صحت پائے گئے، 417 نمونوں میں پانی، گلوکوز اور متعدد خطرناک کیمیکلز کی ملاوٹ پائی گئی۔
وزیر اعلیٰ خیبر پختون خوا کے آبائی شہر ڈی آئی خان میں 100 فی صد دودھ مضر صحت نکلا، بنوں میں فروخت ہونے والا دودھ بھی 100 فی صد ناقص قرار دیا گیا، ملاکنڈ میں 97، پشاور میں 94، اور کوہاٹ میں 28 فی صد دودھ مضر صحت فروخت ہو رہا ہے۔
ڈی جی فوڈ اتھارٹی کا کہنا ہے کہ صوبے میں دودھ کا معیار چیک کرنے کے لیے پہلی بار ایسا اقدام اٹھایا گیا ہے، اور اس مقصد کے لیے صوبے بھر سے 3 لاکھ 24 ہزار لیٹر دودھ سے نمونے لیے گئے تھے۔
دوسری طرف دودھ فروشوں نے سرکاری حکام کی رپورٹ مسترد کرتے ہوئے کہا کہ دودھ میں کوئی ملاوٹ نہیں ہے۔
پشاور: مشیرخزانہ خیبرپختونخوا مزمل اسلم نے کہا ہے کہ یکم مئی سے جولائی تک 90 لاکھ سیاحوں نے خیبر پختونخوا کا رخ کیا ہے۔
مشیرخزانہ خیبرپختونخوا مزمل اسلم کی زیر صدارت محکمہ سیاحت کا اجلاس ہوا، جس میں بتایا گیا کہ اس بار لاکھوں سیاح صوبے میں سیاحت کی غرض سے آئے، سیاحوں کی آمد پچھلے سال کے مقابلے میں 100 فیصد زیادہ ہے۔
مزمل اسلم نے کہا کہ پچھلے سال 45 لاکھ سیاحوں نے خیبرپختونخوا کا رخ کیا تھا، ڈھائی ہزار غیرملکی سیاح بھی کے پی کی ٹھنڈی فضاؤں سے لطف اندوز ہوئے۔
مشیرسیاحت زاہد چن زیب نے کہا کہ سیاحت میں 100 فیصد اضافہ کے پی میں امن و امان کی بہتری کا ثبوت ہے، اتنی بڑی تعداد میں اضافہ سیاحتی سہولیات کا بھی منہ بولتا ثبوت ہے۔
خیبرپختونخوا کے مشیرخزانہ نے بتایا کہ رواں سال 26 لاکھ سیاحوں نے سوات کارخ کیا ہے، 35 لاکھ سیاح گلیات کے پرفضا مقامات سے لطف اندوز ہوئے، پشاور:چترال کاغان میں 25 لاکھ سیاحوں کی آمد ریکارڈ ہوئی۔
اجلاس میں بریفنگ کے دوران بتایا گیا کہ قابل فخر ہے کہ 90 لاکھ سیاحوں کے ساتھ کوئی ناخوشگوارواقعہ بھی پیش نہیں آیا، چند ایک عوامی شکایات این ایچ اے سڑکوں سے متعلق موصول ہوئی ہیں۔
مشیرخزانہ نے کہا کہ شکایات کو این ایچ اے حکام کے سامنے اٹھایا جائے گا، ہمارا اگلا ہدف غیرملکی سیاحوں کی تعداد میں اضافہ ہے۔
پشاور : خیبرپختونخوا میں بجلی کی لوڈشیڈنگ پر صوبہ اور وفاق آمنے سامنے آگئے، معاملہ سلجھانے کے لیے وزیر توانائی نے وزیرداخلہ سے مدد مانگ لی ہے۔
تفصیلات کے مطابق خیبرپختونخوا میں بجلی کی لوڈشیڈنگ پر صورت حال سنگین ہے اور بات دھمکیوں سے آگئے بڑھ گئی، گرڈ اسٹیشنوں پر ایم پی ایز کے دھاوے کے بعد پیسکو پرچے کٹوا رہا ہے۔
معاملہ سلجھانے کے لیے وزی رتوانائی نے وزیرداخلہ سے مدد مانگ لی، وزیرتوانائی اویس لغاری نے وزیرداخلہ محسن نقوی کو خط میں لکھا کہ خیبرپختونخوامیں ذمے دار شخصیات گرڈ اسٹیشنوں پر مظاہروں کی قیادت کررہی ہیں۔۔ واقعات مردان، چارسدہ، ٹانک، بنوں اور پشاورمیں پیش آرہےہیں۔
خط میں کہا گہا کہ میئرانعام اللہ ، دریاب خان ناظم، فضل الٰہی، ایم این اے ذوالفقار، ایم پی اے ادریس اورعثمان بٹانی شریک ہیں جبکہ پولیس ذمہ داروں کیخلاف ایف آئی آرکااندراج بھی نہیں کر رہی۔
وزیرتوانائی اویس لغاری نے گرڈ اسٹیشنوں میں زبردستی گھسنے والے نامزد افراد کے خلاف مقدمےدرج کرنے کی درخواست کرتے ہوئے تمام گرڈ اسٹیشنوں پرسیکیورٹی کا مطالبہ کردیا۔
صورت حال پروزیرداخلہ محسن نقوی اوروزیراعلیٰ خیبر پختونخوا میں رابطہ بھی ہوا۔۔ علی امین گنڈاپورنے محسن نقوی کو تحفظات سےآگاہ کیا اور مشاورت پراتفاق کیا گیا۔
وزیرداخلہ محسن نقوی نے کہا غلط فہمیاں افہام وتفہیم سے دورکی جائیں گی۔۔ کوشش ہےخیبرپختونخوامیں لوڈشیڈنگ کامسئلہ جلدحل ہو۔
راولپنڈی : سیکیورٹی فورسز کے خیبرپختونخوا میں 3 مختلف آپریشنز کے دوران 23 دہشت گرد ہلاک اور7 جوان شہید ہوگئے۔
پاک فوج کے شعبہ تعلقات عامہ ( آئی ایس پی آر) کی جانب سے خیبرپختونخوا میں ہونے والے آپریشنز کی تفصیلات جاری کردی گئیں، جس کے مطابق سیکیورٹی فورسز کی جانب سے خیبرپختونخوا میں 3 مختلف آپریشنز کے دوران 23 دہشت گرد ہلاک ہوئے۔
آئی ایس پی آر نے بتایا کہ پشاورمیں انٹیلی جنس بیسڈآپریشن میں 6 دہشت گرد مارے گئے جبکہ آپریشن کےدوران کیپٹن حسین جہانگیر اور حوالدار شفیق اللہ شہید ہوئے۔
ترجمان کا کہنا تھا کہ ٹانک میں آپریشن کےدوران 10 دہشت گرد مارے گئے، خیبر کے علاقے باغ میں سیکیورٹی فورسز نےآپریشن کیا، اس دوران7دہشت گرد مارے گئے اور 2 زخمی ہوئے جبکہ فائرنگ کے تبادلے میں 5 سیکیورٹی اہلکارشہید ہوئے۔
شہدا میں نائیک محمداشفاق بٹ، لانس نائیک سیددانش افکار، سپاہی تیمور ملک ،سپاہی نادر اور سپاہی محمد یاسین شامل ہیں۔
آئی ایس پی آر کے مطابق آپریشن کے دوران بڑی تعداد میں ہتھیار، گولیاں ، دھماکا خیز مواد برآمد ہوا جبکہ ہلاک دہشت گرد سیکیورٹی فورسز پر حملوں اور بے گناہ شہریوں کے قتل میں ملوث تھے۔
پاک فوج کے ترجمان نے کہا کہ علاقے میں ممکنہ دہشت گردوں کے خاتمے کیلئے کلیئرنس آپریشنز کیے گئے، سیکیورٹی فورسز دہشت گردی کے خاتمے کے لئے پرعزم ہیں، سیکیورٹی اہلکاروں کی قربانیاں ہمارے عزم کو مزید تقویت دیتی ہیں۔
نائیک محمداشفاق بٹ شہید کی عمر 32 سال جبکہ تعلق ضلع کہوٹہ سے ہے، انھوں نے 10سال تک پاک فوج میں خدمات سرانجام دیں۔
لانس نائیک سید دانش افکار شہید کی عمر 30سال اور تعلق ضلع پونچھ سے ہے ، انھوں نے 6سال تک مادر وطن کے دفاع کیلئےفرائض انجام دیے۔
32 سال کا سپاہی تیمور ملک شہید کا تعلق ضلع لیہ سے ہے، شہید نے 11سال تک دفاع وطن کےفرائض سر انجام دیے جبکہ شہدا میں سب سے کم عمر 22 سالہ سپاہی نادر صغیر شہید ہیں، ضلع باغ کے رہائشی اور 2 سال تک پاک فوج میں خدمات انجام دیں۔
سپاہی محمد یاسین شہید کی عمر23 سال جبکہ تعلق ضلع خوشاب سے ہے ، انھوں نے ڈیڑھ سال پاک فوج میں خدمات سر انجام دیں۔
پشاور : اسکولوں میں گرمیوں کی چھٹیاں 15 جون سے کرنے کا اعلان کردیا گیا جبکہ بالائی اضلاع میں اسکول یکم جولائی سے13اگست تک بند رہیں گے۔
تفصیلات کے مطابق تعلیمی اداروں میں گرمیوں کی چھٹیوں کے حوالے سے ایک اور خبر آگئی، محکمہ تعلیم خیبرپختونخوا نے بھی گرمیوں کی چھٹیوں کا اعلان کردیا۔
محکمہ تعلیم کی جانب سے اعلامیہ جاری کردیا ہے ، جس میں کہا ہے کہ خیبرپختونخوا میں پرائمری اسکول کی چھٹیاں یکم جون سےہوں گی جبکہ مڈل،ہائی اورہائیرسیکنڈری اسکول 15جون سے31اگست تک بندرہیں گے۔
محکمہ تعلیم کے اعلامیے میں مزید کہا گیا کہ بالائی اضلاع میں اسکول یکم جولائی سے 13 اگست تک بندرہیں گے۔
یاد رہے سندھ حکومت کی جانب سے تعلیمی اداروں میں گرمیوں کی چھٹیوں کا اعلان کردیا گیا ، جس کے مطابق اسکول یکم جون سے 31 اگست تک بند رہیں گے۔
اس سے قبل پنجاب میں شدید گرمی کےباعث اسکول سات روز کیلئے بند کرنے کااعلان کیا گیا تھا اور نجی اور سرکاری اسکول پچیس سے اکتیس مئی تک بند کرنے کا نوٹیفکیشن جاری بھی کردیا تھا۔
صوبائی وزیرتعلیم کے مطابق یہ فیصلہ ہیٹ ویو کے خدشے کے باعث کیا گیا ہے تاہم جن اسکولوں میں امتحان ہورہے ہیں انہیں کھولنے کی مشروط اجازت ہوگی۔
وزیر تعلیم پنجاب رانا سکندر حیات کا کہنا تھا کہ گرمیوں کی چھٹیاں یکم جون کے بجائے 22 مئی سے دینے کا فیصلہ کیا ہے ، اس حوالے سے نجی اسکولز کی بڑی تعداد نے رابطہ کیا اور نجی اسکولز میں امتحانات کے پیش نظر رواں ہفتے کھولنے کی اجازت دی گئی
اسلام آباد : خیبرپختونخوا میں سیاسی کشیدگی کی اندرونی کہانی سامنے آگئی، گورنرکےصوبائی حکومت کیخلاف سخت بیانات میں ن لیگ کی خواہش شامل تھی۔
تفصیلات کے مطابق ذرائع نے کہا ہے کہ خیبرپختونخوا میں سیاسی کشیدگی میں مسلم لیگ ن کا بھی کردار ہے، گورنر کے صوبائی حکومت کیخلاف سخت بیانات میں ن لیگ کی خواہش شامل تھی۔
ذرائع نے بتایا کہ فیصل کریم کنڈی کو گورنر بنوانےمیں ن لیگ کی شخصیات کا بھی کردار تھا کیونکہ ن لیگ کے چند رہنما خیبرپختونخوا حکومت کےخلاف بیان بازی چاہتےتھے۔
ذرائع کے مطابق تلخی دیکھ کر اہم وفاقی وزیر اورآزاد سینیٹر نےگورنرخیبرپختونخواسےرابطہ کیا، وفاقی وزیر نے گورنر کو خیبرپختونخوا حکومت سےماحول ٹھنڈا رکھنےکا پیغام دیا، پیغام سے پہلےوفاقی وزیر کی صدر آصف زرداری سےبھی بات ہوئی تھی۔
خیال رہے گورنرکےپی اور وزیراعلیٰ علی امین گنڈاپور نےایک دوسرے کیخلاف سخت بیانات دیئے تھے.
علی امین گنڈاپور کی گورنر ہاؤس پر قبضے کی دھمکی کے بعد سے دونوں رہنماؤں کے درمیان لفظی جنگ جاری ہے۔
اسلام آباد: خیبر پختونخوا میں قومی ذیلی پولیو مہم ملتوی کرنے کا فیصلہ کیا گیا ہے، التوا کا یہ فیصلہ سیکیورٹی کی عدم دستیابی کے باعث ہوا ہے۔
ذرائع کا کہنا ہے کہ کے پی حکومت نے پولیو مہم کے لیے سیکیورٹی فراہمی سے معذرت کی ہے، کے پی پولیس ضمنی بلدیاتی الیکشن کے باعث پولیو مہم کے لیے دستیاب نہیں ہے۔
ذرائع کے مطابق پولیو مہم ملتوی کرنے کا فیصلہ خیبر پختونخوا حکومت نے کیا ہے، ایڈیشنل چیف سیکریٹری نے کے پی پولیو پروگرام کو فیصلے سے آگاہ کر دیا، خیبر پختونخوا حکومت نے وفاق کو بھی پولیو مہم کے التوا بارے آگاہ کر دیا۔
26 اضلاع میں شیڈول پولیو مہم کے پی حکومت کی درخواست پر ملتوی ہوئی ہے، ڈی آئی خان، لوئر دیر، مردان اور چارسدہ کی انتظامیہ نے پولیو مہم کے التوا کی درخواست کی تھی، خیبر پختونخوا میں ذیلی پولیو مہم 29 اپریل سے شروع ہونا تھی، لیکن اب یہ 6 مئی سے شروع ہوگی، جب کہ صوبے میں ضمنی بلدیاتی الیکشن 28 اپریل کو ہوگا۔
ذرائع کے مطابق ذیلی قومی انسداد پولیو مہم اسلام آباد اور چاروں صوبوں میں 29 اپریل تا 5 مئی شیڈول ہے، مہم دیگر صوبوں میں شیڈول کے تحت چلے گی۔
پشاور : خیبرپختونخوا میں بارشوں کے دوران حادثات میں جاں بحق ہونے والے افراد کی تعداد 32 ہوگئی اور 41 زخمی ہے جبکہ ایک ہزار 370 مکانات کو نقصان پہنچا۔
تفصیلات کے مطابق خیبرپختونخوا اور بلوچستان میں بارشوں سے تباہی کا سلسلہ جاری ہے، صوبائی ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا میں بارشوں سےنقصانات کی رپورٹ جاری کردی۔
جس میں بتایا گیا کہ خیبرپختونخوامیں مختلف حادثات میں32افرادجاں بحق ،41زخمی ہوئے، جاں بحق افرادمیں 15بچے،12 مرد،5 خواتین جبکہ زخمیوں میں 6 خواتین، 28 مرد اور 7 بچے شامل ہیں۔
پی ڈی ایم اے رپورٹ میں کہا ہے کہ دیواریں اور چھتیں گرنے سے مجموعی طور 1370مکانات کو نقصان پہنچا 160گھروں کومکمل جبکہ 1210 گھروں کوجزوی نقصان پہنچا۔
دیر،چترال لوئر،سوات،باجوڑ،شانگلہ، مانسہرہ، مہمند، مالاکنڈ میں حادثات پیش آئے تاہم انتظامیہ کوجاں بحق افرادکےلواحقین کی مالی امداد کیلئے 50 ملین روپے جاری کئے۔
ڈی جی پی ڈی ایم اے کا کہنا ہے کہ بارشوں کےباعث متاثرہ خاندان کی مدداوربحالی ہماری اولین ترجیح ہے۔
دوسری جانب بلوچستان میں بھی موسلاد ھار بارشوں سے نظام زندگی مفلوج ہے، پنجگور، پسنی،ہرنائی،چاغی میں سیلابی صورتحال ہے جبکہ چاغی میں طوفانی بارشوں سےحفاظتی بند ٹوٹ گئے، جس کے باعث متعدد گھر اور دکانیں زیر آب آگئیں۔
محکمہ موسمیات نے صوبے میں مزید بارشوں کے پیش نظر الرٹ جاری کردیا ہے، ملک بھر میں بائیس اپریل تک مزید بارشیں متوقع ہیں۔
کراچی میں بھی کل تیز بارش کی پیشگوئی کی گئی ہے، جس کے پیش نظر این ڈی ایم اے نے بھی مختلف علاقوں میں ممکنہ سیلابی صورت حال کے پیش نظر ایڈوائزری جاری کردی۔
خیال رہے پاکستان کا صوبہ بلوچستان ہو یا خیبرپختونخوا ، یو اے ای، عمان، بحرین سمیت کئی خلیجی ریاستوں میں ایک کے بعد ایک غیرمتوقع اورمعمول کے برخلاف طوفانی بارشوں کےسسٹم اثرانداز ہو رہےہیں ، جس سے بڑے پیمانے پر تباہ کاریاں بھی دیکھی جارہی ہیں۔
پشاور : خیبرپختونخوا میں 4 روز کے دوران بارشوں کے باعث مختلف حادثات کے نتیجے میں 21افرادجاں بحق اور 32افرادزخمی ہوگئے۔
تفصیلات کے مطابق طوفانی بارشوں نےخیبرپختونخوا میں قہر ڈھادیا اور بلوچستان میں بھی بارشوں کی تباہ کاریاں جاری ہیں، ملک میں بارشوں کے باعث حادثات میں اموات کی مجموعی تعداد پچاس کے قریب پہنچ گئی ہے۔
پی ڈی ایم اے خیبرپختونخوا نے 4 روز کے دوران بارشوں کے باعث صوبے میں جانی ومالی نقصانات کی رپورٹ جاری کردی، جس میں بتایا کہ
کےپی میں تیز بارش کےباعث حادثات کے نتیجےمیں21افرادجاں بحق اور 32 افراد زخمی ہوئے۔
خیبرکے علاقے باڑہ میں گھر کی چھت گرنےسےدوخواتین اورتین بچے جان سے چلے گئے جبکہ چارافراد کو بچالیا گیا، لوئردیر میں مختلف حادثات میں سات افراد کی جانیں گئیں۔
ٹانک میں اسکول وین برساتی نالےمیں بہہ گئی، اسکول ٹیچراوربچے کی لاشیں مل گئیں جبکہ دیگرتیرہ افرادریلےمیں بہہ گئے، مانسہرہ میں ندی نالوں میں طغیانی ہے۔
سوات کےعلاقے منگلور میں مکان کی چھت گرنےسے دو بچے جاں بحق ہوگئے جبکہ مٹہ میں لینڈ سلائیڈنگ سے گھرکی چھت گرنےسےچالیس سےزائدمویشی دب گئے۔
رپورٹ میں کہا گیا کہ مختلف اضلاع میں دیواریں اور چھتیں گرنے سے مجموعی طور پر 330 مکانات کونقصان پہنچا، 53گھروں کو مکمل اور 277 گھروں کو جزوی نقصان پہنچا۔
زیادہ نقصانات اپر چترال ، اپر دیر، لوئر چترال، سوات، ملاکنڈ اور باجوڑ میں ہوئے، جبکہ کئی اضلاع کا زمینی رابطہ بدستور منقطع ہے۔
جاری شدید بارشوں سے دریاؤں میں پانی کے بہاؤ میں بھی اضافہ دیکھا جارہا ہے، دریائے سوات اوردریائےپنجکوڑہ میں نچلے درجے کا سیلابی ریلہ گزر رہا ہے۔
دوسری جانب بلوچستان کےندی نالوں میں بھی طغیانی برقرارہے اور کئی علاقےتاحال زیرآب ہیں ، پسنی میں سیلابی صورتحال، اسکولوں،گھروں اور دکانوں میں پانی داخل ہوگیا جبکہ پانی شاہراہوں پرآنےسےہرنائی کاملک کے دیگرحصوں سے تین روزسےزمینی رابطہ منقطع ہے۔
دونوں صوبوں کے متاثرہ علاقوں میں پاک فوج اوردیگر اداروں کی امدادی کارروائیاں جاری ہیں۔