ARYNews.tv | Urdu – Har Lamha Bakhabar

Tag: خیبر پختونخوا

  • گردوں، جگر، بون میرو ٹرانسپلانٹ سمیت 8 بیماریوں کے مفت علاج کا اعلان

    گردوں، جگر، بون میرو ٹرانسپلانٹ سمیت 8 بیماریوں کے مفت علاج کا اعلان

    پشاور: خیبر پختون خوا حکومت نے گردوں، جگر، بون میرو ٹرانسپلانٹ اور تھیلیسیمیا سمیت آٹھ بیماریوں کے مفت علاج کا اعلان کیا ہے۔

    تفصیلات کے مطابق مستحق لوگوں کے مفت علاج کے لیے وزیر اعلیٰ محمود خان نے انقلابی قدم اٹھا لیا، صوبے میں کڈنی، لیور، بون میرو ٹرانسپلانٹ، تھیلیسیمیا سمیت 8 بیماریوں کا مفت علاج ہوگا۔

    یہ فیصلہ وزیر اعلیٰ خیبر پختون خوا محمود خان کی زیر صدارت اجلاس میں کیا گیا، مذکورہ بیماریوں کا علاج صحت کارڈ پلس اسکیم کے تحت ہو یا اس کے لیے الگ پروگرام کا اجرا کیا جائے، اس امر پر بھی اجلاس میں غور کیا گیا، وزیر اعلیٰ نے دونوں آپشنز پر ہوم ورک کر کے تجاویز پیش کرنے کی ہدایت جاری کی۔

    محمود خان نے عزم کا اظہار کیا کہ مستحق لوگوں کو مہنگی بیماریوں کے علاج کی مفت سہولت فراہم کرنی ہے، حکومت کی ذمہ داری ہے کہ کمزور طبقوں کا خصوصی خیال رکھے۔

    اجلاس میں صحت کارڈ اسکیم کے علاوہ فوڈ کارڈ اسکیم اور ایجوکیشن کارڈ اسکیم سے متعلق بھی گفتگو کی گئی، وزیر اعلیٰ نے کہا کہ مجوزہ فوڈ کارڈ اسکیم کے تحت مستحق خاندانوں کو ماہانہ مفت راشن فراہم کیا جائے گا، جب کہ ایجوکیشن کارڈ اسکیم کے تحت مستحق طلبہ کے تعلیمی اخراجات حکومت ادا کرے گی۔

    وزیر اعلیٰ کے پی نے متعلقہ حکام کو 2 سے 3 ماہ میں مذکورہ اسکیموں کے اجرا کو حتمی شکل دینے کی ہدایت کرتے ہوئے کہا کہ ایجوکیشن کارڈ، فوڈ کارڈ اور کسان کارڈ اسکیموں پر عمل درآمد یقینی بنائیں گے۔

  • آئندہ عام انتخابات کے لیے اے این پی کا بڑا فیصلہ

    آئندہ عام انتخابات کے لیے اے این پی کا بڑا فیصلہ

    پشاور: آئندہ عام انتخابات کے لیے عوامی نیشنل پارٹی نے بڑا فیصلہ کرتے ہوئے کسی بھی دوسری پارٹی کے ساتھ اتحاد نہ کرنے کی حکمت عملی بنا لی۔

    تفصیلات کے مطابق اے این پی کے صوبائی صدر ایمل ولی خان نے کہا ہے کہ آنے والے انتخابات میں پارٹی کسی جماعت سے انتخابی اتحاد نہیں کرے گی۔

    ایمل ولی کا کہنا تھا کہ عوامی نیشنل پارٹی اپنے منشور کے ساتھ آئندہ عام انتخابات کے لیے تیار ہے، اور صوبہ بھر میں اے این پی کے امیدوار کھڑے کیے جائیں گے۔

    صوبائی صدر نے کہا کہ حکمراں جماعت پاکستان تحریک انصاف شکست سے بچنے کے لیے بلدیاتی انتخابات سے بھاگ رہی ہے، اے این پی قومی وسائل پر عوام کے اختیار اور ان کے حق حکمرانی پر یقین رکھتی ہے۔

    ایمل ولی نے کہا ملک میں مہنگائی اور بے روزگاری کا جن بے قابو ہو چکا ہے، عوام دو وقت کی روٹی کے لیے خوار ہو رہے ہیں، اور حکومت عوام کو ریلیف پہنچانے کی بجائے لانے والوں کے ریلیف کے لیے کام کر رہی ہے۔

  • خیبر پختون خوا: کل سے بارشیں شروع ہونے کا امکان

    خیبر پختون خوا: کل سے بارشیں شروع ہونے کا امکان

    پشاور: خیبر پختون خوا کے بعض اضلاع میں کل شام سے بارشوں کا نیا سلسلہ شروع ہونے کا امکان ہے۔

    محکمہ موسمیات کے مطابق کل شام سے کوہستان، شانگلہ، مانسہرہ، ایبٹ آباد، ہری پور، مردان، چارسدہ، نوشہرہ، دیر، چترال، پشاور، کوہاٹ اور وزیرستان میں وقفے وقفے سے بارش کا امکان ہے۔

    پی ڈی ایم اے خیبر پختون خوا نے ضلعی انتظامیہ اور متعلقہ اداروں کو مراسلہ جاری کر دیا، جس میں ڈائریکٹر جنرل شریف حسین کی جانب سے تیز بارشوں کے پیش نظر پیشگی اقدامات کرنے اور الرٹ رہنے کی ہدایات کی گئی ہیں۔

    محکمہ موسمیات کے مطابق بدھ سے جمعے تک دیر، کوہستان، مانسہرہ اور ایبٹ آباد میں وقفے وقفے سے تیز بارش ہو سکتی ہے، بارشوں کے باعث گرمی کی شدت میں کمی کا امکان ہے، بعض علاقوں میں بارشوں کا سلسلہ ہفتہ کے روز تک وقفے وقفے سے جاری رہے گا۔

    بارشوں کا نیا اسپیل ، کراچی والے ایک بار پھر تیار ہوجائیں

    ترجمان پی ڈی ایم اے تیمور خان نے ہدایت جاری کی ہے کہ سیاح دوران سفر خصوصی احتیاطی تدابیر اختیار کریں اور موسمی صورت حال سے باخبر رہیں۔

    ترجمان کا کہنا تھا پی ڈی ایم اے کا ایمر جنسی آپریشن سینٹر مکمل فعال ہے، عوام کسی بھی ناخوش گوار واقعے کی اطلاع ہیلپ لائن 1700 پر دیں۔

  • خواتین کے لیے مختص پنک بسوں کا منصوبہ ناکام

    خواتین کے لیے مختص پنک بسوں کا منصوبہ ناکام

    پشاور: خیبر پختون خوا حکومت کا خواتین کے لیے مختص پنک بسوں کا منصوبہ کامیاب نہ ہو سکا۔

    تفصیلات کے مطابق پنک بسوں کا منصوبہ ناکامی کے بعد کے پی حکومت نے پنک بسیں ہائیر ایجوکیشن کے حوالے کر دیں، محکمہ ہائیر ایجوکیشن کا کہنا ہے کہ 14 بسوں میں سے صوبے کے 12 بسیں گرلز ڈگری کالجز اور 2 بسیں مردان ویمن یونیورسٹی کو دی جا رہی ہیں۔

    مختلف کالجز کے پرنسپلز کو معاون خصوصی ہائیر ایجوکیشن و اطلاعات کامران بنگش نے بسوں کی چابیاں حوالے کیں۔

    کامران بنگش نے میڈیا سے گفتگو کرتے ہوئے کہا دو اضلاع میں خواتین کو سفری سہولیات کے لیے بسیں چلانے کا منصوبہ شروع کیا گیا تھا، لیکن کچھ وجوہ پر یہ کامیاب نہ ہو سکا۔

    انھوں نے کہا گرلز کالجز میں طالبات کو ٹرانسپورٹ کے مسائل تھے جس کو حل کرنے کے لیے ہم نے بسیں کالجز کو دینے کا فیصلہ کیا۔

    پنک بسوں کا منصوبہ 2018 میں جاپان حکومت کے تعاون سے خواتین کے لیے شروع کیا گیا تھا، 14 پنک بسیں صرف خواتین کی سفری سہولیات کے لیے لائی گئی تھیں، مردان اور ایبٹ آباد میں پنک بسیں کچھ مہینے کے لیے چلائی بھی گئیں لیکن یہ سلسلہ کامیاب نہ ہو سکا۔

    یہ منصوبہ ناکامی کے بعد بسیں تین سالوں تک مختلف اسٹینڈز میں کھڑی رہیں، جس کے باعث بسوں کی حالت خراب ہونے لگی تھی، محکمہ اعلیٰ تعلیم کی درخواست پر ان بسوں کو ٹرانس پشاور سے محکمہ ہائیر ایجوکیشن کے حوالے کیا گیا، اب یہ بسیں مختلف گرلز کالجز میں طالبات کی سفری سہولت کے لیے استعمال ہوں گی۔

    کامران بنگش نے بتایا کہ اب ڈی آئ خان، مردان، اور نوشہرہ سمیت دیگر اضلاع کے کالجز ان بسوں سے مستفید ہوں گے، اور ایک ہفتے کے اندر یہ بسیں چلتی نظر آئیں گی۔

    ان کا کہنا تھا کہ 45 بسوں کا آرڈر دے چکے ہیں، جو قبائلی اضلاع میں چلیں گی، بندوبستی اضلاع میں سال 20-21 میں 40 پروفیشنل کالجز بنانے جا رہے ہیں، صوبے میں 7 وکالت کے کالجز بھی بنیں گے، جس پر 80 کروڑ کی خطیر رقم خرچ کی جائے گی۔

    انھوں نے بتایا کہ صوبے میں 30 کالجز کو ماڈل کالج بنا رہے ہیں، اور کسی کالج کی نج کاری نہیں کر رہے، کالج کی نج کاری کے حوالے سے حکومت کے خلاف پروپیگنڈا کیا جا رہا ہے۔

  • پشاور: مشین اور میٹر کے بغیر ٹیکسیوں کو ایک ماہ کی مہلت

    پشاور: مشین اور میٹر کے بغیر ٹیکسیوں کو ایک ماہ کی مہلت

    پشاور: خیبر پختون خوا میں مشین اور میٹر کے بغیر ٹیکسیوں کو قانون کے دائرے میں آنے کے لیے ایک ماہ کی مہلت دے دی گئی۔

    تفصیلات کے مطابق خیبر پختون خوا حکومت نے یلو کیب ٹیکسی گاڑیوں کو قانون کے دائرے میں لانے کا فیصلہ کر لیا ہے، اس سلسلے میں یلو کیب ٹیکسیوں کے مالکان کو گاڑیوں میں مشینیں اور میٹرز لگانے کے احکامات جاری کر دیے گئے۔

    محکمہ ٹرانسپورٹ خیبر پختون خوا کی جانب سے جاری اعلامیے میں وضاحت کی گئی ہے کہ ٹیکسی میں میٹرز لگانے سے سواریوں کو فی کلو میٹر فاصلہ معلوم ہو سکے گا۔

    محکمے نے حکم دیا ہے کہ ٹیکسی ڈرائیور فاصلے اور کلومیٹر کے حساب سے کرایے وصول کریں گے، اور سواریوں کو کرایوں کی مشینوں کے ذریعے رسید دی جائے گی۔

    اعلامیے کے مطابق محکمہ ٹرانسپورٹ نے تمام ٹیکسی گاڑیوں کے مالکان کو ایک ماہ کی ڈیڈ لائن دے دی ہے، ایک ماہ بعد پشاور سمیت بڑے شہریوں میں بغیر مشین اور میٹرز ٹیکسیوں کے داخلے پر پابندی ہوگی۔

    یاد رہے کہ 2015 میں محکمہ ٹرانسپورٹ اینڈ ماس ٹرانزٹ خیبر پختون خوا نے عوام کی سہولت کے لیے یلو کیب ٹیکسی کو پشاور اربن ایریا میں چند ایک قانونی قواعد و ضوابط کے ساتھ فریش روٹ پرمٹ جاری کرنے کا فیصلہ کیا تھا۔

  • بارشوں کا نیا سلسلہ، اگلے ایک ہفتے کے لیے سیاحوں کو اہم ہدایت جاری

    بارشوں کا نیا سلسلہ، اگلے ایک ہفتے کے لیے سیاحوں کو اہم ہدایت جاری

    پشاور: خیبر پختون خوا کے بعض اضلاع میں کل شام سے بارشوں کا نیا سلسلہ شروع ہونے کا امکان ہے۔

    تفصیلات کے مطابق محکمہ موسمیات نے کے پی کے میں کل شام سے بارشوں کے نئے سلسلے کا امکان ظاہر کیا ہے، پی ڈی ایم اے خیبر پختون خوا نے ضلعی انتظامیہ اور متعلقہ اداروں کو اس سلسلے میں پیشگی اقدامات کے لیے مراسلہ جاری کر دیا۔

    ترجمان پی ڈی ایم اے نے موسم کے پیش نظر سیاحوں کے لیے ہدایت جاری کی ہے کہ وہ دوران سفر خصوصی احتیاطی تدابیر اختیار کریں، اور موسمی صورت حال سے خود کو باخبر رکھیں۔

    رپورٹ کے مطابق کل سے کوہستان، شانگلہ، مانسہرہ، ایبٹ آباد، ہری پور، مردان، چارسدہ، نوشہرہ، دیر، چترال، پشاور، کوہاٹ اور وزیرستان میں وقفے وقفے سے تیز ہواؤں اورگرج چمک کے ساتھ بارش کی پیش گوئی ہے۔

    ڈائریکٹر جنرل پی ڈی ایم اے شریف حسین نے تیز بارشوں کے پیش نظر ضلعی انتظامیہ اور متعلقہ اداروں کو پیشگی اقدامات کرنے اور الرٹ رہنے کی ہدایت جاری کر دی ہے۔

    محکمہ موسمیات کے مطابق بارشوں کا سلسلہ بدھ کے روز تک وقفے وقفے سے جاری رہے گا، بارشوں کے باعث گرمی کی شدت میں کمی کا امکان ہے، محکمے کا کہنا ہے کہ پشاور سمیت خیبر پختون خوا کے بعض اضلاع میں گزشتہ کچھ دنوں سے سخت گرمی پڑ رہی ہے۔

    ترجمان پی ڈی ایم اے نے خبردار کیا ہے کہ سیاح دوران سفر خصوصی احتیاطی تدابیر اختیار کریں اور موسمی صورت حال سے باخبر رہیں، پی ڈی ایم اے کا ایمرجنسی آپریشن سینٹر مکمل فعال ہے، عوام کسی بھی ناخوش گوار واقعے کی اطلاع ہیلپ لائن 1700 پر دیں۔

  • محکمہ جنگلات کے شہید اہل کار کے لیے پیکج کا اعلان

    محکمہ جنگلات کے شہید اہل کار کے لیے پیکج کا اعلان

    پشاور: خیبر پختون خوا حکومت نے محکمہ جنگلات کے شہید اہل کار جمشید اقبال کے لیے شہید پیکج کا اعلان کر دیا۔

    تفصیلات کے مطابق صوبائی وزیر جنگلات اشتیاق ارمڑ نے آج شہید فارسٹر جمشید اقبال کے گھر جا کر لواحقین سے تعزیت کی اور شہید کو خراج تحسین پیش کیا۔

    صوبائی وزیر نے محکمہ جنگلات کے فارسٹر کے لیے شہید پیکج کا اعلان کیا اور کہا کہ گاؤں کے ہائی اسکول اور سڑک کو بھی شہید کے نام سے منسوب کیا جائے گا۔

    وزیر جنگلات نے کہا کہ شہید پیکج کے تحت جمشید اقبال کے چھوٹے بھائی کو محکمہ جنگلات میں نوکری دی جائے گی، میں وزیر اعظم اور وزیر اعلیٰ کی ہدایت پر یہاں آیا ہوں۔

    صوبائی وزیر جنگلات اشتیاق ارمڑ

    اشتیاق ارمڑ کا اس موقع پر یہ بھی کہنا تھا کہ اب لوگوں کو علم ہوگیا ہے کہ درخت ماحول کے لیے کتنے اہم ہیں۔ یاد رہے کہ جمشید اقبال چمرکن کے جنگلات میں لگی آگ بجھاتے ہوئے شہید ہو گئے تھے۔

    محکمہ جنگلات کا ملازم جنگل میں لگی آگ بجھاتے ہوئے شہید، وزیر اعظم کا خراج عقیدت

    چند روز قبل شہید کے والد نے حکومت سے مطالبہ کیا تھا کہ جمشید اقبال کی فیملی کو شہدا پیکج دیا جائے، جمشید اقبال کے سوگواران میں 2 بچے اور بیوہ شامل ہیں، جمشید گزشتہ 9 سال سے محکمہ جنگلات میں فرائض انجام دے رہے تھے۔

    جمشید اقبال کے ساتھ کام کرنے والے محکمہ جنگلات کے اہل کاروں نے بتایا تھا کہ جمشید کو درختوں سے محبت تھی اور انھوں نے درختوں کو آگ سے بچاتے ہوئے جان دے دی۔

    وزیر اعظم عمران خان نے جمشید اقبال کی فرائض کی انجام دہی کے دوران موت پر دکھ کا اظہار کرتے ہوئے اپنے ٹویٹ میں لکھا کہ جمشید نے ادائیگی فرض کے دوران آگ بجھاتے بجھاتے جام شہادت نوش کیا، یہی وہ مردان کار ہیں جو پاکستان کی شادابی کے لیے ہمارے جنگلات کی حفاظت کا فرض نبھا رہے ہیں۔

  • خیبر پختونخوا میں بلدیاتی الیکشن آئندہ سال تک ملتوی

    خیبر پختونخوا میں بلدیاتی الیکشن آئندہ سال تک ملتوی

    اسلام آباد : خیبر پختونخوا حکومت نے بلدیاتی الیکشن آئندہ سال تک ملتوی کردیئے، جس پر الیکشن کمیشن نے صوبائی حکومت کی تجویز پر رضامندی کا اظہار کردیا ہے۔

    تفصیلات کے مطابق خیبر پختونخوا میں بلدیاتی الیکشن آئندہ سال تک ملتوی کردیئے گئے ، حکومتی ذرائع کا کہنا ہے کہ افعانستان کی موجودہ صورتحال، کورونا روکاوٹ ہیں ، صوبے کے ضم اضلاع میں حلقہ بندیاں ابھی تک نہیں ہو سکیں۔

    حکومتی ذرائع نے کہا کےپی حکومت آئندہ سال تک بلدیاتی الیکشن نہیں کرا سکتی،الیکشن کمیشن نے صوبائی حکومت کی تجویز پر رضامندی کا اظہار کردیا ہے۔

    یاد رہے جون میں خیبرپختونخوا حکومت نے بلدیاتی انتخابات سے متعلق سفارشات مرتب کی تھیں ، جس میں کہا گیا تھا کہ ستمبر کے اختتام سے اکتوبر کے وسط تک بلدیاتی الیکشن ساز گار رہے گا، ضم شدہ قبائلی علاقوں میں بلدیاتی الیکشن علیحدہ کرائیں جائیں۔

    سفارشات کے مطابق بقیہ اضلاع میں بلدیاتی انتخابات ایک ہی دن میں کرائے جائیں۔

  • خیبر پختون خوا، مزدوروں کے لیے بڑا قدم

    خیبر پختون خوا، مزدوروں کے لیے بڑا قدم

    پشاور: خیبر پختون خوا حکومت نے صوبے میں مزدوروں کی فلاح کے لیے سوشل سیکیورٹی ادارہ قائم کرنے کا فیصلہ کر لیا۔

    اے آر وائی نیوز کے مطابق خیبر پختون خوا کی اسمبلی میں مزدوروں کے لیے سوشل سیکیورٹی ایکٹ پیش کر دیا گیا، جس میں کہا گیا ہے کہ ایمپلائز سوشل سیکیورٹی ایکٹ کے تحت سوشل سیکیورٹی ادارہ قائم کیا جائے گا۔

    مجوزہ بل کے تحت خواتین مزدوروں کی 3 ماہ میٹرنٹی چھٹی اور معاوضہ سوشل سیکیورٹی ادارہ دے گا۔

    بیماری اور زخمی ہونے کی صورت میں مزدوروں کی طبی امداد کے اخراجات بھی سوشل سیکیورٹی بورڈ کے ذمے ہوگی، اور دوران ڈیوٹی موت واقع ہونے پر لواحقین کو معاوضہ سوشل سیکیورٹی بورڈ ادا کرے گا۔

    مجوزہ بل میں کہا گیا ہے کہ قانون کے تحت سوشل سیکیورٹی ادارہ کارخانوں سے مزدوروں کی فلاح کے لیے مخصوص فنڈز لے گا۔

    ادارے کی گورننگ باڈی کے چیئرمین وزیر محنت ہوں گے، جب کہ محکمہ لیبر، صنعت، صحت اور خزانہ کے ارکان شامل ہوں گے، صوبائی محکمہ محنت کے سیکریٹری اس ادارے کے کمشنر ہوں گے۔

    مجوزہ بل کے مطابق ادارہ کا ایمپلائز سوشل سیکیورٹی فنڈ کے نام سے اپنا فنڈ بھی قائم کیا جائے گا۔

  • پیپر کے لیے نکلنے والی نہم کلاس کی طالبہ سیلابی ریلے میں بہہ گئی

    پیپر کے لیے نکلنے والی نہم کلاس کی طالبہ سیلابی ریلے میں بہہ گئی

    لوئر دیر: خیبر پختون خوا میں کلاس نہم کی طالبہ سیلابی ریلے میں بہہ کر جاں بحق ہو گئیں۔

    تفصیلات کے مطابق خیبر پختون خوا کے ضلع لوئر دیر میں افسوس ناک واقعہ پیش آیا ہے، پرچہ دینے کے لیے نکلنے والی نہم کلاس کی طالبہ سیلابی ریلے کا شکار ہو گئیں۔

    مقامی پولیس کا کہنا ہے کہ طالبہ مریم بی بی پیپر دینے جا رہی تھیں کہ سیلابی ریلے کی زد میں آ کر بہہ گئیں، طالبہ کی لاش زیمدارہ کے قریب برساتی نالے سے ملی۔

    پولیس کا یہ بھی کہنا ہے کہ سیلابی ریلے کی شکار 16 سالہ طالبہ کا تعلق چمیاری بلوخان سے ہے، ایک ماہ میں 12 افراد دریائے پنجکوڑہ اور برساتی نالوں میں بہہ کر جاں بحق ہوئے ہیں۔

    یاد رہے کہ گزشتہ روز مردان میں جلالہ برساتی نالے میں ضعیف العمر شخص ڈوب کر جاں بحق ہو گئے تھے، ڈوبنے والے 75 سالہ گل محمد کا تعلق مہاجر کیمپ جلالہ سے تھا، ریسکو 1122 کے مطابق اطلاع موصول ہونے پر ریسکیو کی غوطہ خور ٹیم نے سرچ آپریشن بھی کیا۔

    جمعرات کو لوئر دیر کے علاقے خونی ڈھنڈ اوچ کے برساتی نالے میں 2 بچے شایان اور زوہیب ڈوب کر جاں بحق ہو گئے تھے۔