اسرائیل کی بے گھر فلسطینیوں کی خیمہ بستی غزہ کے جنوبی شہر رفح میں بمباری نے بالی وڈ اداکاروں کے ضمیر بھی جگا دیے۔
غزہ کے جنوبی شہر رفح میں جاری اسرائیلی جارحیت کے خلاف سوشل میڈیا پر زور پکڑنے والی مہم ’آل آئیز آن رفح‘ کا بالی ووڈ ستارے بھی حصہ بن گئے۔
سپر اسٹار کرینہ کپور نے یونیسیف کی ایک پوسٹ اسٹوری پر شیئر کی جس میں کس طرح کیمپوں میں سے شہید اور جھلسے ہوئے بچوں کی تصاویر، کس طرح ہزاروں بچوں کو بے دردی سے شہید کرنے کے بارے میں بتایا گیا تھا۔
اداکارہ سونم کپور اس سے قبل بھی فلسطین کے معصوم بچوں کے لیے آواز بلند کرتی رہی ہیں، اب بھی انہوں نے رفح کی تازہ ترین صورتحال اور شہدا کی تعداد پر مبنی اسٹوریز شیئر کیں، ساتھ ہی ’آل آئز آن رفح‘ کی ایک ٹیمپلیٹ شیئر کی۔
اس ٹیمپلیٹ کو فلسطین کے لیے آواز اٹھانے والوں کی جانب سے سوشل میڈیا پر خوب شیئر کیا جارہا ہے جبکہ اداکارہ ملائیکہ اروڑہ اور ورون دھون نے بھی اسرائیلی جارحیت اور معصوم فلسطینیوں کے قتلِ عام کے خلاف آواز اٹھاتے ہوئے سیم ٹیمپلیٹ شئیر کی۔
واضح رہے کہ غزہ کے جنوبی شہر رفح میں پناہ گزین کیمپ پر اتوار کو اسرائیلی فضائی حملے میں بچوں سمیت درجنوں افراد جھلس کر جاں بحق ہوگئے، اس دل سوز واقعہ کے بعد سوشل میڈیا پر روح کو جھنجھوڑ دینے والی تصاویر اور ویڈیوز بھی وائرل ہیں جن میں سر کٹے معصوم بچوں کو دیکھ کر ہر آنکھ آشکبار ہوگئی۔
یہ واقعہ بین الاقوامی عدالت انصاف کی جانب سے اسرائیل کو رفح میں اپنی کارروائی روکنے کے حکم کے چند دن بعد پیش آیا، جس نے بین الاقوامی غم و غصے کو جنم دیا اور سوشل میڈیا پر ’آل آئیز آن رفح‘ کے ہیش ٹیگ سے ایک مہم زور پکڑگئی۔
اس سوشل میڈیا مہم کو وائرل کرنے میں ایک انسٹاگرام اسٹوری ٹیمپلیٹ نے اہم کردار ادا کیا جس میں رفح کے ان پناہ گزینوں خیموں کے ایرئیل ویو کی گرافک پکچر شامل کی گئی جو 26 مئی کو اسرائیلی حملوں کا نشانہ بنے اور اس تصویر پر ’آل آئیز آن رفح‘ لکھا گیا۔
آل آئیز آن رفح‘ نامی مہم نے سوشل میڈیا پر ایسا تہلکہ مچایا کہ انسٹاگرام پر ہر جانب یہی اسٹوری نظر آئی، اس مخصوص ٹیملپیٹ کو اب تک 32 ملین سے زائد انسٹاگرام صارفین اپنی اسٹوری پر شیئر کر چکے ہیں اور ان 32 ملین میں بالی وڈ ستارے بھی شامل ہیں۔
قبل ازیں عالمی عدالت انصاف (آئی سی جے) نے رفح میں انسانی صورتحال کو تباہ کن قرار دیتے ہوئے اسرائیل کو رفح پر حملہ نہ کرنے کا حکم دے رکھا ہے لیکن اسرائیل نے اپنی کارروائیاں جاری رکھی ہوئی ہیں جس پر دنیا خاموش تماشائی بنی ہوئی ہے۔
دوسری جانب امریکا، بھارت اور برطانیہ سمیت کئی مغربی ممالک غزہ اور رفح میں فلسطینوں کی نسل کشی پر خاموش ہیں۔
