زندگی میں جانے کتنی طوائفوں سے داغ کے مراسم رہے ہوں گے لیکن ان کا کوئی دیر پا نقش داغ کے روز و شب پر نظر نہیں آتا۔ یہ دیر پا نقش صرف کلکتے کی منی بائی حجاب نے چھوڑا جسے وہ ہمیشہ اپنے دل میں بسائے رہے۔

حجاب کو داغ نے آخری بار 3 جولائی 1882ء کو کلکتے میں الوداع کہا تھا۔ پھر وہ کچھ ایسے حالات سے دوچار رہے کہ حجاب سے ملاقات کی کوئی صورت نہیں نکال سکے۔ 1899ء میں انہوں نے نظام حیدرآباد کے ساتھ کلکتے کا سفر بھی کیا لیکن غالباً نظام کے معمولات کی پابندی کی وجہ سے انہیں حجاب سے ملاقات کی مہلت نہیں ملی۔ اس وقت تک کوئی حسّے صاحب حجاب کو پردہ نشیں بھی بناچکے تھے۔ داغ کے اس سے مل نہ سکنے کی ایک وجہ یہ بھی رہی ہو گی۔

داغ کی حجاب سے ملاقات چاہے نہ ہو سکی ہو لیکن حجاب تک یہ خبریں ضرور پہنچی ہوں گی کہ داغ والیِ دکن کے ساتھ کلکتے آئے ہیں اور رئیسانہ ٹھاٹ باٹ کے ساتھ آئے ہیں۔ اس کے دل میں بھی پرانی یادوں نے انگڑائی لی ہوگی۔ چنانچہ اس نے داغ کے ساتھ مراسلت کا رابطہ قائم کیا اور ان کے ایما پر حسّے صاحب سے طلاق لے کر داغ کے پاس حیدرآباد جانے کا فیصلہ کرلیا۔

دسمبر 1898ء میں داغ کی اہلیہ فاطمہ بیگم کا انتقال ہوگیا تھا۔ عجب نہیں کہ انہوں نے حجاب سے یہ وعدہ بھی کیا ہو کہ وہ اس سے نکاح کر لیں گے۔ اس خیال کی تائید اس سے بھی ہوتی ہے کہ دہلی دربار( جنوری 1903ء) سے داغ، جو نظام کی ہمراہی میں تھے، واپس ہوئے تو ان کے ورودِ حیدر آباد کے فوراً بعد کسی نے ان سے پوچھا کہ آخر اب آپ کیوں حجاب سے نکاح کرنا چاہتے ہیں، آپ کی بتیسی مصنوعی ہے، سر اور داڑھی کے بال خضاب سے رنگے جاتے ہیں۔ تو داغ نے کہا کہ مجھے اپنی کبر سنی کا احساس ہے، لیکن میری مسہری آج بھی ایک نو عروس کی مسہری معلوم ہوتی ہے۔ رنگین جالی کے پردے ہیں، جن پر گوٹا لگا ہوا ہے اور انگوری بیل کی جھالر بھی لہرا رہی ہے۔ یہ سب روا ہے تو منی بائی حجاب میرے لیے کیوں ناجائز کر دی جائے۔ اس سے پہلے داغ نے اپنے بے تکلف دوستوں کی ایک محفل میں یہ سوال بھی اٹھایا تھا کہ کیا حسّے صاحب سے طلاق کے بعد حجاب کو عدت میں بیٹھنا ہوگا؟

یہ بھی پڑھیے:

داغ دہلوی کی "حجاب پرستی”

داغ نے 3 جولائی 1883ء کو حجاب کو کلکتے میں خدا حافظ کہا تھا۔ اٹھارہ انیس برس کے بعد انہوں نے 18 یا 19 جنوری 1903ء کو اسے حیدرآباد میں خوش آمدید کہا۔ انہوں نے حجاب کے قیام کے لیے ایک مکان کا انتظام کر دیا اور اس کی ماہانہ تنخواہ بھی مقرر کردی جو سیّدہ جعفر کے بیان کے مطابق ابتدا میں ساٹھ روپے تھی، پھر سو روپے کر دی گئی۔
(داغ دہلوی، حیات اور کارنامے، دہلی اردو اکادمی، صفحہ 56)

حجاب کا ہاتھ کھلا ہوا تھا۔ یہ رقم اس کی ضرورتوں کی کفالت کے لیے ناکافی تھی۔ وہ مزید رقم کا مطالبہ کرتی ہو گی۔ داغ نے اپنے ایک عزیز شاگرد میر حسن علی خاں کو ایک بار لکھا تھا: "حجاب کی ضرورتیں پوری نہیں ہوتیں، آئے دن سر گرداں رہتی ہے۔”
(خطوطِ داغ، مرتبہ رفیق مارہروی)

حجاب حیدر آباد پہنچی تو اس پر مذہب کا رنگ چڑھ چکا تھا اور وہ صوم و صلٰوۃ کی پابند تھی۔ رمضان کے علاوہ بھی روزے رکھنے لگی تھی اور اوراد و وظائف سے بھی شغف پیدا ہوگیا تھا۔ میر یٰسین علی خاں نے، جنہوں نے اس وقت حجاب کو دیکھا تھا، اس کا حلیہ یوں بیان کیا ہے: "کوئی 40، 45 کا سن ہوگا۔ رنگ صاف، آنکھیں بڑی بڑی، ناک اونچی، بالوں پر خضاب چڑھا ہوا، پتلے پتلے لب، میانہ قد، اونچی پیشانی، مانگ پھٹی پھٹی سی، تنگ اطلس کا پاجامہ، مغزی ٹکا ہوا لانبا کرتا اور اس پر سفید اوڑھنی۔ پاؤں میں دہلی کی جوتی اور دونوں ہاتھوں کی پتلی پتلی انگلیوں میں انگوٹھیاں۔”
(بحوالہ: نگار، جنوری 1953ء)

حجاب یہی توقع لے کر آئی تھی کہ داغ اس سے نکاح کریں گے۔ اس نے آنے سے پہلے ہی داغ کو لکھ دیا تھا کہ "جب تک نکاح نہیں کر لوں گی، تمہارے سامنے نہیں آؤں گی۔ میں نے یہ تمام جھگڑا اس لیے نہیں کیا کہ شرعی باتوں کی خلاف ورزی کروں۔ تم اس بھروسے میں نہ رہنا کہ میں تمہارے سامنے آؤں۔”

داغ کے روزنامچہ نگار کا بیان ہے،”ایک طوائف کی ایسی دنیا بدلی ہے کہ کوئی وقت وظیفے سے خالی نہیں ہے۔ مرزا صاحب فرمارہے تھے کہ دوچار برس میں ولیہ ہوجائیں گی۔” (مؤرخہ 22 جنوری 1903ء)

لیکن داغ حجاب کو اس رنگ میں دیکھنا نہیں چاہتے تھے۔ انہوں نے جا نماز اور تسبیح بھجوانے کا حجاب کا مطالبہ پورا کرتے ہوئے یہ بھی کہلا بھیجا کہ”جب تک تمہارے اورادو وظائف نہیں چھوٹیں گے، اس وقت تک تم انسان نہیں بن سکتیں اور جب تک انسان نہ بن سکو، اس وقت تک میرے کام کی نہیں ہوسکتیں۔”

حجاب نے کچھ دن انتظار کیا کہ داغ اس کی راہ پر آجائیں۔ ادھر داغ نے بھی نباہنے کی اپنی سی کوشش کی مگر دونوں ہی ناکام رہے۔ داغ سے مایوس ہو کر حجاب اگست 1904ء میں کلکتے واپس چلی گئی۔

تمکین کاظمی "معاشقۂ حجاب و داغ” میں لکھتے ہیں:
"یہ صرف وضع داری اور دل لگی تھی۔ اس جذبۂ تفریح کو محبت سے دور کا بھی واسطہ نہ تھا۔ دونوں طرف سے ایک ہی جذبہ کارفرما تھا۔ داغ اپنی دولت و ثروت اور عزّت و امارت کا نقش حجاب کے دل پر بٹھانا چاہتے تھے اور حجاب کی نظر داغ کی دولت پر تھی۔”

لیکن کم از کم داغ کے دل میں حجاب کے لیے نرم گوشہ ضرور تھا۔ حجاب کے کلکتے چلے جانے کے بعد داغ زیادہ زندہ نہیں رہے، لیکن جب تک رہے، اسے ماہانہ کچھ بھجواتے رہے۔

حجاب اگست 1904ء میں داغ سے خفا ہو کر کلکتے واپس چلی گئی تھی۔ اس کے جانے کے لگ بھگ سات مہینے بعد 16 فروری 1905ء کو داغ نے داعیِ اجل کو لبیک کہا۔

(بلبلِ ہند، فصیح الملک نواب مرزا داغؔ نے اردو غزل کو ایک شگفتہ اور رجائی لہجہ دیا اور ساتھ ہی اسے بوجھل فارسی تراکیب سے باہر نکال کے قلعۂ معلّیٰ کی خالص ٹکسالی اردو میں شاعری کی، وہ حسن پرست اور رنگین مزاج تھے، یہ اقتباسات اس استاد شاعر سے متعلق مخمور سعیدی کی کتاب کے ایک مضمون سے لیے گئے ہیں)

انسان کی طرح شہروں کی بھی ایک شخصیت ہوتی ہے جس سے شہر امتیاز حاصل کرتا ہے اور لوگوں کے دلوں میں گھر بناتا ہے۔

دہلی کے ابتدائی دور کے شاعر مضمونؔ نے کہا تھا…

دل لیا مضمونؔ کا دلّی نے چھین
جا کہو کوئی محمد شاہ سوں

اور حالیؔ نے اسی شہر کی محبت میں وطن کو بھلا دیا:

حالیؔ بس اب یقین ہے دلّی کے ہو رہے
ہے ذرّہ ذرّہ مہر فزا اس دیار کا

نظیرؔ اکبرآبادی آگرہ کی زلفوں میں اسیر تھے۔ امیرؔ مینائی اور بہت سے دوسرے شعرا لکھنؤ پر جان دیتے تھے۔ ریاضؔ خیرآبادی کو گورکھپور پسند تھا۔ اس طرح بعض مقامات بعض شاعروں کے تصور کو مہمیز کرنے اور ان کی جذباتی زندگی کا مرکز بن جانے کی وجہ سے شعر و ادب کی دنیا میں بھی احترام کے مستحق بن جاتے ہیں۔ اگر اس حیثیت سے دیکھا جائے تو داغؔ کا تعلق رام پور سے جذباتی نہ تھا۔ وہ دہلی میں پیدا ہوئے اور رام پور اور حیدرآباد میں ملازمت کی اور کلکتہ ان کے جذبات کا مرکز بنا۔ اس طرح ان کا واسطہ دہلی، رام پور، کلکتہ اور حیدرآباد چار شہروں سے رہا۔

بچپن کا کچھ حصہ نواب یوسف علی کے عہد میں دارُالسّرور رام پور میں بسر ہوا۔ حالانکہ رام پور اس وقت اپنی شان و شوکت کے لحاظ سے اپنی دل کشی اور رنگینی کے لحاظ سے دارُالسرور نہیں بنا تھا۔ پھر بھی داغ کا بچپن فراغت سے بسر ہوا۔ پھر جب داغؔ کی ماں چھوٹی بیگم مغل ولی عہد سے شادی کرکے دہلی کے لال قلعہ میں داخل ہو گئیں تو داغؔ بھی شہزادوں کی زندگی گزارنے لگے اور 1857 کے انقلاب تک کم وبیش یہی حالت رہی۔ انقلاب کے بعد دہلی کی تباہی پر داغؔ نے جو شہر آشوب لکھا ہے وہ دہلی سے ان کی وابستگی کا کھلا ہوا نشان ہے۔ لیکن جب وہاں قیام کا ٹھکانا ہی نہ رہا تو داغؔ نے بھی ایک ذریعہ تلاش کر کے رام پور کی راہ لی۔

وہ اس شہر سے پہلے ہی مانوس تھے حالانکہ اب بہت فرق ہو چکا تھا۔ اب وہ ایک اچھے شاعر کی حیثیت رکھتے تھے اور دربار رام پور میں جس طرح دہلی اور لکھنؤ کے بعض شعرا کی سرپرستی ہو رہی تھی، اس کے پیش نظر انہیں بھی یہی خیال پیدا ہوا کہ وہ درباری شعرا کے زمرے میں داخل ہو جائیں۔ لیکن ابتدا انہیں اس میں کام یابی نہیں ہوئی۔ امیرؔ مینائی نے اپنے تذکرہ ’’یادگارِ شعرا‘‘ میں وہاں کے کئی سو چھوٹے بڑے شاعروں کا ذکر کیا ہے۔ اور دوسرے قرائن سے بھی یہ اندازہ ہوتا ہے کہ دہلی اور لکھنؤ کی درباری زندگی پر زوال آیا تو رام پور میں شعر و سخن کی محفل جمی۔ خاص کر نواب یوسف علی خاں اور ان کے جانشین نواب کلب علی خاں نے رام پور کو ایک بڑا علمی اور تہذیبی مرکز بنا دیا لیکن شروع میں داغؔ کو وہاں کام یابی حاصل نہیں ہوئی۔

یوں تو داغؔ رام پور برابر آتے جاتے رہے لیکن انہیں وہاں باقاعدہ ملازمت 1866 میں ملی اور وہ بھی داروغۂ اصطبل کی حیثیت سے۔ حالانکہ وہاں شاعر کی حیثیت سے جانے جاتے تھے۔ 1865 میں وہ نواب کلب علی خاں کی تخت نشینی کے موقع پر نظم کہہ چکے تھے اور بعض شاعروں میں غزلیں سنا کر داد بھی وصول کر چکے تھے۔ چنانچہ ان کے خاص شاگرد احسنؔ مارہروی کہتے ہیں کہ رام پور میں پہلی غزل انہوں نے صاحبزادہ محمد رضا خاں کے یہاں ایک مشاعرے میں پڑھی جس کا مطلع مشہور مطلع تھا،

بھولے بھٹکے جو ترے گھر میں چلے آتے ہیں
اپنی تقدیر کے چکر میں چلے آتے ہیں

رام پور سے داغؔ کا تعلق کئی حیثیتیں رکھتا ہے۔ لالہ سری رام نے خمخانۂ جاوید میں لکھا ہے کہ وہ تقریباً چالیس سال رام پور میں رہے اور احسن مارہروی نے چالیس پینتالیس بتایا ہے۔ میرا خیال ہے کہ اس میں وہ ساری مدت شامل کر لی گئی ہے جب انہوں نے بچپن ہی میں رام پور آنا جانا شروع کیا، ورنہ وہ باقاعدہ زیادہ سے زیادہ بیس سال رام پور میں رہے اور اس دوران میں بھی تھوڑے تھوڑے دنوں کے لیے اِدھر اُدھر جاتے رہے۔ کبھی دہلی گئے کبھی لکھنؤ۔ پٹنہ اور کلکتہ سے یہ سلسلہ 1888 تک جاری رہا، جب کہ وہ حیدرآباد چلے گئے اور وہاں تقریباً سترہ سال تک عزت اور وقار کی زندگی بسر کرنے کے بعد اپنی شہرت کے بام عروج پر پہنچ کر انتقال کیا۔

داغؔ اس حیثیت سے بڑے خوش قسمت تھے کہ جب قلعۂ معلیٰ سے نکلے تو انہیں دربار کی کم و بیش ویسی ہی فضا رام پور میں مل گئی۔ نواب کلب علی خاں نے انہیں ایسا آرام پہنچایا کہ رام پور ان کے لیے واقعی دارُالسّرور بن گیا۔ ایک طرف نواب کی مصاحبت دوسری طرف شعرا میں عزت، عوام میں قدر دانی اور تیسری طرف زندگی کی وہ چہل پہل جس سے ان کے مزاج کو مناسبت تھی۔ ان کے لیے یہ ساری باتیں رام پور میں یکجا ہو گئی تھیں۔

نواب کلب علی خاں نے تخت نشین ہوتے ہی ’’بے نظیر‘‘ کا مشہور میلہ شروع کیا جس کی رونق اور چہل پہل، رنگینی اور جشن آرائی دور دورسے صاحبان کمال کو کھینچ لاتی تھی۔ رام پور سے وابستہ بہت سے شاعروں نے اس میلے پر نظمیں لکھی ہیں۔ لیکن داغؔ کے لیے یہ میلہ ایک تفریح گاہ سے بڑھ کر آفت جان بن گیا۔ اسی میلے میں انہیں منی بائی حجاب کلکتہ کی مشہور گانے والی اور شاعرہ سے تقریباً پچاس سال کی عمرمیں عشق ہوا اور مرتے دم تک یہ دکھ ان کے ساتھ رہا۔ یہاں اس کی تفصیلات بیان کرنے کی ضرورت نہیں ہے۔ بس اتنا کہنا ہے کہ یہ زبردست چوٹ انہوں نے رام پور ہی میں کھائی جس کی یادگار ان کی مشہور مثنوی فریاد داغؔ ہے۔

جب یہ افتاد پڑی تو رام پور دارُالسّرور ان کے لیے جہنم بن گیا اور حجاب سے ملنے کی آرزو انہیں لکھنؤ، پٹنہ، عظیم آباد اور کلکتہ لے گئی اور حقیقت یہ ہے کہ اگر ان کا کوئی شہر تھا تو کلکتہ، جہاں ان کی جان بستی تھی۔ دہلی نے انہیں پیدا کیا، جوان بنایا اور شاعری سکھائی، وہ زبان دی جس پر انہیں بجا طور پر ناز تھا۔ رام پور نے انہیں سہارا دے کر زندگی کے جھمیلوں سے بچا لیا اور حیدرآباد نے انہیں وہ عزت بخشی جو کسی شاعر کو آسانی سے نصیب نہیں ہوتی لیکن کلکتہ جہاں وہ صرف ایک بار گئے، ان کی تمناؤں اور خوابوں کا مرکز بن گیا۔ بہرحال یہ زندگی کا خوش گوار حادثہ رام پور ہی میں پیش آیا جہاں کلب علی خاں انہیں ہر طرح کا آرام اور اعزاز بخش رہے تھے۔

اس زمانے میں رام پور میں بہت سے اہم شعراء یکجا ہو گئے تھے۔ جیسے میرؔ، امیرؔ، جلالؔ، منیرؔ شکوہ آبادی، جانؔ صاحب، رساؔ اور ذکیؔ وغیرہ۔ ان کے مقابلے میں داغؔ کی شاعری چمکی اور امتیازی خصوصیات پیدا کر کے منفرد ہو گئی۔ خواص اور عوام دونوں ان کے گرویدہ تھے۔ مشاعرے میں غزل پڑھتے ہی عام ہو جاتی تھی اور لوگ سڑکوں پر گاتے پھرتے تھے۔

(اردو کے ممتاز نقّاد، ادیب اور شاعر سید احتشام حسین کے قلم سے)