دبئی: متحدہ عرب امارات میں مقیم ایک افریقی گروہ نے انعامی رقم کا جھانسہ دے کر عرب شہری کو لوٹ لیا۔
عرب میڈیا کے مطابق دبئی پولیس کو عرب شہری کی جانب سے موصول ہونے والی شکایت میں کہا گیا ہے کہ دبئی میں مقیم 3 افراد نے پر مشتمل افریقی گروہ نے 27 ملین ڈالر کی انعامی رقم کا جھانسہ دے کر اس سے 2 لاکھ ڈالر ہتھیالیے۔
عرب شہری نے بتایا کہ وہ سوشل میڈیا ویب سائٹ فیس بک پر ایک شخص سے بات چیت کرنے لگا جس نے اسے بتایا کہ ایک اماراتی بینک کی انعامی اسکیم میں اس کا 27 ملین ڈالر کا انعام نکلا ہے۔
عرب شہری کے مطابق مذکورہ شخص نے انعامی رقم حاصل کرنے کے لیے پاسپورٹ کی کاپی بھی بھیجنے کا کہا اور ساتھ ہی 21 ہزار ڈالر ٹرانسفر کرنے کا مطالبہ کیا تاکہ انعامی رقم حاصل کرنے کے لیے وکیل کی خدمات حاصل کی جاسکیں۔
مزید پڑھیں: دبئی: فون پر انعامات کا لالچ دینے والے 33 غیر ملکی گرفتار
رپورٹ کے مطابق کچھ دن بعد عرب شہری سے 27 ہزار ڈالر ٹرانسفر کرنے کا مطالبہ کیا گیا تاکہ بینک کی ادارتی فیس ادا کی جاسکیں جس کے بعد 43 ہزار ڈالر اور پھر 50 ہزار ڈالر طلب کیے گئے۔
واضح رہے کہ گزشتہ سال دبئی پولیس نے کارروائی کرتے ہوئے موبائل فون پر لوگوں کو انعامات کا لالچ دینے والے 33 غیرملکیوں کو گرفتار کیا تھا۔
ڈائریکٹر الرشیدیا پولیس بریگیڈیئر سعید حماد بن سلیمان کا کہنا تھا کہ ہمیں اطلاعات موصول ہوئیں کے ڈیرہ کے اپارٹمنٹ میں گروہ کام کررہا ہے جو موبائل فون کے ذریعے لوگوں کو بیوقوف بناتا ہے، ملزمان کے قبضے سے بڑی تعداد میں سمیں اور موبائل فونز برآمد ہوئے ہیں، سمیں مختلف ناموں پر رجسٹرڈ کی گئی تھیں۔