دبئی : مسلم لیگ ن کے قائد نوازشریف سعودی عرب سے دبئی پہنچ گئے، جہاں سے کل پاکستان کیلئے روانہ ہوں گے، دبئی میں آج نواز شریف کی اہم ملاقاتیں بھی متوقع ہیں۔
تفصیلات کے مطابق مسلم لیگ ن کے قائد نوازشریف سعودی عرب سے دبئی پہنچ گئے ، نواز شریف کو دبئی ائیرپورٹ پر حکام کی طرف سے خصوصی پروٹوکول دیا گیا۔
مسلم لیگ (ن) کےقائد نواز شریف دبئی میں اسحاق ڈارکے بیٹے کے گھرقیام پذیر ہیں، حسین نواز اورحسنین ڈار بھی سابق وزیراعظم کے ہمراہ تھے۔
ذرائع نے بتایا کہ دبئی میں آج نوازشریف کی اہم ملاقاتیں بھی متوقع ہیں، نوازشریف کل دبئی سےپاکستان کیلئے روانہ ہوں گے، سابق وزیراعظم خصوصی طیارےسے پاکستان پہنچیں گے۔
نواز شریف نے سابق وفاقی وزیر برجیس طاہر کے صاحبزادے کودبئی طلب کر لیا ، جس کے بعد ن لیگ کے رہنما چوہدری ثاقب برجیس طاہردبئی کے لیے روانہ ہوگئے ، چوہدری ثاقب برجیس نواز شریف کےساتھ ہی دبئی سے پاکستان آئیں گے۔
گزشتہ روز نواز شریف کو دو عدالتوں سےضمانت مل گئی تھی ، سابق وزیراعظم وطن واپسی پرگرفتار نہیں ہوں گے۔
خیال رہے سابق وزیراعظم نواز شریف 21 اکتوبر کو اسلام آباد آئیں گے، اسلام آباد میں قانونی امور پر مشاورت کے بعد لاہور روانہ ہوں گے جہاں وہ مینار پاکستان پر جلسے سے خطاب کریں گے۔
