کوہاٹ: درہ آدم خیل میں کوئلہ کان کی حد بندی کے تنازع پر فائرنگ سے 16 افراد قتل ہو گئے۔
تفصیلات کے مطابق کوہاٹ کی قبائلی تحصیل درہ آدم خیل میں دو گروپوں میں خوفناک تصادم کے دوران فائرنگ سے 16 افراد کی جان چلی گئی، 3 زخمی ہو گئے۔
پولیس نے بتایا ہے کہ سنی خیل اور اخوروال کے مکینوں میں اراضی کی حد بندی اور کوئلے کی کان کا دیرینہ تنازع چل رہا تھا، جرگے بھی منعقد ہو چکے تھے، اور پہلے بھی کئی جانیں ضائع ہو چکی ہیں۔
پیر کی سہ پہر فریقین کے مسلح افراد کا شہباز نیکی پہاڑ پر آمنا سامنا ہوا، دونوں جانب سے اندھادھند فائرنگ کی گئی، جس سے دونوں طرف سے لاشیں گریں۔
پولیس نے علاقے میں پہنچ کر صورت حال کو قابو کیا، لاشوں اور زخمی افراد کو اسپتال پہنچا دیا گیا ہے، پولیس تھانہ درہ آدم خیل نے مقدمہ درج کر کے تفتیش شروع کر دی۔
