Tag: دریائے ستلج

بہاولنگر:دریائے ستلج میں درمیانے درجے کا سیلاب ہے جبکہ متاثرہ 50 ہزار سے زائد افراد مختلف علاقوں سے نقل مکانی کرچکے ہیں۔

اے آر وائی نیوز کے مطابق ہیڈ سلیمانکی پر پانی کابہاؤ 95 ہزار 238 کیوسک ہے، جبکہ سیلاب سے دریائی بیلٹ کے 86 مواضعات متاثر ہوئے ہیں۔

پی ڈی ایم اے کا کہنا ہے کہ سیلابی پانی نے دریائی بیلٹ کے مواضعات میں عارضی حفاظتی بند توڑ دئیے ہیں، اس کے علاوہ دریائی بیلٹ کو مرکزی شاہراہ سے ملانے والی سڑکوں میں متعدد مقامات پر شگاف پڑچکے ہیں۔

100 سے زائد آبادیوں کے زمینی راستے منقطع ہونے کی اطلاعات سامنے آرہی ہیں، جبکہ ہزاروں ایکڑ پر کھڑی فصلیں زیر آب آچکی ہیں اور سیلابی پانی گھروں میں داخل ہوچکا ہے۔

ریسکیو حکام کے مطابق ریسکیو ٹیموں نے پانی میں پھنسے 12 ہزار 236 افراد کو محفوظ مقامات پر منتقل کردیا ہے جبکہ انتظامیہ کی جانب سے متاثرین کو 30 فلڈ ریلیف کیمپس پر سہولیات فراہم کی جارہی ہیں۔

پی ڈی ایم اے کا کہنا ہے کہ گنڈا سنگھ والا قصور کے مقام پر سیلاب درمیانے سے نچلے درجے پر آچکا ہے، جبکہ گنڈاسنگھ والا قصور کے مقام پر پانی کا بہاؤ 74390 کیوسک ہے،اس کے علاوہ ہیڈ اسلام کے مقام پر پانی کا بہاؤ 77022 کیوسک ریکارڈ کیا گیا ہے۔

اوکاڑہ: بھارت کی جانب سے آبی جارحیت کا سلسلہ جاری ہے، دریائے ستلج میں اٹاری کے مقام پر اونچے درجے کا سیلابی ریلہ گزر رہا ہے۔

اے آر وائی نیوز کے مطابق ڈپٹی کمشنر اوکاڑہ نے کہا ہے کہ سیلاب سے107 کے قریب گاؤں متاثر ہوئے ہیں۔

ڈپٹی کمشنر ذیشان حنیف نے بتایا کہ ایک لاکھ 25 ہزار افراد سیلاب سے متاثر ہوئے ہیں، ہزاروں ایکڑ پر کھڑی تیار فصلیں دریا برد ہوچکی ہیں۔

ریسکیو اور پاک فوج کے دستوں نے 12 ہزارا فراد کو محفوظ مقامات پرمنتقل کردیا ہے، جبکہ دریائے ستلج کے قریب 11 فلڈ ریلیف کیمپ کام کررہے ہیں۔

ڈپٹی کمشنر کا کہنا ہے کہ متاثرین کیلئے کھانے پینے کی اشیا اور رہائش کیلئے عارضی خیمہ بستی قائم کی گئی ہے، متاثرین کی بحالی کے لئے کوششیں جاری ہیں۔

پاکپتن: بھارت کی جانب سے آبی جارحیت کا سلسلہ جاری ہے، دریائے ستلج میں سیلابی ریلے کے باعث متعدد دیہات زیر آب آگئے۔

اے آر وائی نیوز کے مطابق سیلابی ریلے سے متعدد بند ٹوٹ گئے، جس کے باعث کئی دیہات کا زمینی رابطہ منقطع ہوگیا، سیلابی ریلے کے باعث علاقہ مکین اپنی مددآپ کے تحت نقل مکانی کرنے پر مجبور ہوچکے ہیں۔

متاثرین اپنی مدد آپ کے تحت بند باندھنے کی کوششوں میں مصروف ہیں، بابا فرید پل، موضع ببلانہ، فیروزپور چشتیاں، پیرغنی کے علاقے زیادہ متاثر ہوئے ہیں۔

شاہو بلوچ، باقرکی،ماڑی انب، کوٹ بخشا، بھینی نور جہانیاں اور دیگر علاقے بھی سیلاب کی زد میں ہیں، جبکہ سیکڑوں ایکڑ اراضی زیرآب آنے سے کسان شدید پریشان ہیں۔

یاد رہے کہ گزشتہ دنوں بھارت کی جانب سے پانی چھوڑے جانے کے باعث ایک افسوس ناک واقعہ پیش آیا تھا جب گنجو شاہ کے قریب 3 بچیاں دریائے ستلج کے سیلابی ریلے میں ڈوب گئیں تھیں۔

دریائے ستلج میں آیا ہوا سیلابی ریلا بہاولنگر کے علاقے گنجو شاہ کے قریب تین بچیوں کو بہا کر لے گیا تھا، ریسکیو حکام کے مطابق 2 بچیوں کو بچا لیا گیا تھا، جب کہ 11 سالہ بچی کی تلاش جاری ہے۔

بتایا جا رہا ہے کہ بچیاں دریا کے کنارے کھیل رہی تھیں، اس دوران دریا کے پانی میں اتر گئیں، لیکن چانک پانی کا ایک تیز ریلا آ گیا اور انھیں بہا کر لے گیا۔