حویلی لکھا: دریائے ستلج میں کشتی ڈوبنے کا آج دسواں روز ہے، لواحقین نے دریا کنارے ڈیرے ڈال دیے ہیں۔
تفصیلات کے مطابق دریائے ستلج میں 10 روز پہلے سوجیکے کے مقام پر کشتی الٹنے سے ڈوبنے والے 5 افراد کی لاشیں اب تک نہیں ڈھونڈی جا سکیں۔
لواحقین نے دریا کنارے پر ڈیرے ڈال رکھے ہیں، جنھوں نے بھاری مشینری کے ذریعے کشتی نکالنے کا مطالبہ کیا ہے، ان کا کہنا ہے کہ لاشیں کشتی کے نیچے دبی ہو سکتی ہیں۔
کشتی اور ڈوبنے والوں کی تلاش کا آپریشن آج 10 ویں روز میں داخل ہو گیا ہے، دریا میں اب بھی 5 لاشیں لا پتا ہیں، ریسکیو ٹیموں نے آج چک درازکا میں کٹاؤ سے تلاش شروع کیا، دوسری طرف لواحقین نے وزیر اعظم سے بھاری مشینری کے ذریعے کشتی نکالنے کا مطالبہ کر دیا ہے۔
ادھر اوکاڑہ میں گزشتہ روز نہر لوئر باری دوآب میں 13 سالہ لڑکی کے ڈوبنے کا واقعہ پیش آ گیا ہے، رات میں لڑکی کی تلاش کے لیے روکا گیا ریسکیو آپریشن آج صبح پھر شروع کیا گیا، ریسکیو ٹیمیں کشتی اور پلنجر کی مدد سے سرچ آپریشن کر رہی ہیں۔
