Tag: دسمبر وفیات

23 نومبر 2002ء کو میر ظفرُ اللہ جمالی نے پاکستان میں وزارتِ عظمیٰ کا منصب سنبھالا تھا۔ وہ بردبار اور دھیمے مزاج کے سیاست دان مشہور تھے۔ ان کا شمار بلوچستان کے اُن سیاست دانوں میں ہوتا ہے جنھوں نے وفاق کی سیاست کو ترجیح دی اور قوم پرست جماعتوں سے خود کو دور رکھا۔

ظفرُ اللہ جمالی کا تعلق بلوچستان کے علاقے روجھان جمالی سے تھا۔ قیامِ پاکستان کے بعد وہ اس صوبے کے پہلے منتخب وزیرِ اعظم تھے۔ وہ 76 سال کی عمر میں پچھلے سال 2 دسمبر کو وفات پاگئے تھے۔ آج ان کی پہلی برسی ہے۔ سابق وزیرِ اعظم میر ظفرُ اللہ جمالی آبائی علاقے روجھان جمالی میں آسودۂ خاک ہوئے۔

وفات سے چند روز قبل دل کا دورہ پڑنے کے باعث انھیں راولپنڈی کے ایک اسپتال منتقل کردیا گیا تھا جہاں وہ‌ خالقِ‌ حقیقی سے جا ملے۔

میر ظفرُ اللہ جمالی 1944ء میں پیدا ہوئے۔ پرائمری تعلیم کے بعد گھوڑا گلی مری میں بورڈنگ اسکول میں داخل ہوئے اور بعد میں لاہور کے ایچی سن کالج اے لیول کیا۔ پنجاب یونیورسٹی سے سیاست میں ماسٹرز کی ڈگری حاصل کی۔ وہ اردو کے علاوہ پنجابی، سندھی، پشتو اور براہوی زبانیں‌ جانتے تھے۔

ان کا گھرانا مسلم لیگی تھا۔ ان کے چچا جعفر خان جمالی کو بانیِ پاکستان محمد علی جناح اور بعد میں ان کی بہن فاطمہ جناح کے قریب رہنے کا موقع ملا۔ ظفرُ اللہ جمالی نے بھی نوجوانی میں فاطمہ جناح کے انتخابی دورے کے وقت ان کے گارڈ کے طور پر فرائض سَر انجام دیے تھے اور بعد میں ان کے پولنگ ایجنٹ بھی مقرر ہوئے۔

انھوں نے اپنے چچا کی وفات کے بعد سیاست میں قدم رکھا اور پاکستان پیپلز پارٹی میں شمولیت اختیار کی۔ 1970ء کے انتخابات میں وہ سیاسی حریف سے شکست کھا گئے اور 1977ء میں پاکستان پیپلز پارٹی کے ٹکٹ پر صوبائی اسمبلی میں‌ پہنچے، وہ مارشل لا کے زمانے میں اُن سیاست دانوں میں شامل تھے جنھوں نے جنرل ضیاءُ الحق کا ساتھ دیا۔

1985ء کے غیر جماعتی انتخابات میں انھیں قومی اسمبلی کا رکن منتخب کیا گیا اور اس بار پانی و بجلی کی وزارت ان کے حصّے میں آئی اور محمد خان جونیجو کی حکومت کی برطرفی کے بعد ظفر اللہ جمالی بلوچستان کے وزیر اعلیٰ بنے۔ 1988ء میں ایک بار پھر انھوں نے پیپلز پارٹی کا ساتھ دیا اور انتخابات میں کام یاب ہونے کے بعد صوبے کے وزیر اعلیٰ کا منصب سنبھالا۔

میر ظفرُ اللہ جمالی وفاق میں مسلم لیگ، مسلم لیگ ق اور تحریکِ انصاف میں شامل رہے۔ وہ اپنے سیاسی سفر کے دوران سینیٹ کے رکن بھی رہے۔

2004ء کو انھوں نے وزراتِ عظمیٰ کے منصب سے استعفیٰ دے دیا تھا۔ میر ظفرُ‌اللہ جمالی کھیلوں میں‌ بڑی دل چسپی رکھتے تھے اور ہاکی ان کا پسندیدہ کھیل تھا۔ انھوں نے زمانۂ طالب علمی میں خود بھی ہاکی کھیلی تھی۔ وہ پاکستان ہاکی فیڈریشن کے صدر بھی رہے۔ انھوں نے 1984ء کے لاس اینجلز اولمپکس میں پاکستانی دستے کی سربراہی بھی کی تھی۔

میر ظفرُ اللہ جمالی سادگی پسند تھے۔ انھوں نے اپنے تمام سیاسی ادوار اور وزیرِاعظم بننے کے بعد بھی شان و شوکت اپنانے کے بجائے سادہ زندگی گزاری اور کوشش کی کہ ان کی ذات سے کسی کو تکلیف نہ پہنچے۔ ان کے بارے میں‌ کہا جاتا تھا کہ سیاسی میدان میں بھی وہ کسی کو بھی اپنی بات سے رنج پہنچانے سے گریز کرتے رہے۔

سندھی نثر جی تاریخ ایک تحقیقی اور تنقیدی شاہ کار ہے جس کے مصنّف منگھا رام ملکانی تھے۔ وہ جدید سندھی نثری ادب کے معماروں میں شامل تھے۔

آج نوجوان نسل ان کے نام اور ان کے علمی و ادبی کارناموں سے شاید ہی واقف ہو، لیکن سندھی زبان و ادب میں‌ ان کا نام مذکورہ کتاب کی بدولت ہمیشہ زندہ رہے گا۔اسی کتاب پر انھیں 1969ء میں ساہتیہ اکیڈمی اعزاز برائے سندھی ادب سے نوازا گیا تھا۔

اس کتاب میں سندھی افسانے، ناول، ڈرامے اور مضمون نویسی کے ابتدائی دور سے لے کر تقسیمِ ہند تک ہونے والی ترقّی اور ہر صنفِ ادب کی ترقّی کے ساتھ ان کی جداگانہ خصوصیت کو بھی بیان کیا گیا ہے اور یہ وقیع، مستند اور نہایت جامع تصنیف ہے۔

پروفیسر منگھا رام ملکانی سندھی زبان کے نام وَر ادبی مؤرخ، نقّاد، معلّم اور ڈراما نویس تھے۔ انھوں‌ نے ڈی جے کالج، کراچی میں انگریزی کے استاد اور بعد میں جے ہند کالج بمبئی میں پروفیسر کے طور پر خدمات انجام دیں۔

وہ 24 دسمبر 1896ء کو حیدر آباد، سندھ میں پیدا ہوئے۔ منگھا رام نے ڈی جے کالج کراچی سے بی اے (آنرز) کی سند حاصل کی۔ ملازمت کا آغاز ڈی جے کالج سے انگریزی کے لیکچرار کے طور پر کیا، پھر اسی کالج میں فیلو مقرر ہوئے۔ تقسیم ہند کے بعد بھارت کے شہر بمبئی منتقل ہو گئے اور وہاں کالج میں پروفیسر مقرر ہو گئے۔

ان کے ادبی سفر کا آغاز ڈراما نگاری سے ہوا۔ یہ شروع ہی سے ان کی دل چسپی کا میدان تھا۔ اس صنف میں‌ انھوں نے انگریزی، اردو اور دوسری زبانوں سے متعدد ڈرامے سندھی زبان میں ترجمہ کرنے کے علاوہ ادب کو طبع زاد ڈرامے بھی دیے۔

منگھا رام ملکانی کے معروف ڈراموں میں اکیلی دل (اکیلا دل)، ٹی پارٹی، پریت جی پریت، لیڈیز کلب، سمندر جی گجگار (سمندر کی گرج)، کوڑو کلنک (جھوٹا کلنک)، دل ائین دماغ (دل اور دماغ)، کنھ جی خطا؟ (کس کی خطا؟) و دیگر شامل ہیں۔

وہ ڈرامہ اور ناول نگاری سے تحقیق و تنقید کی طرف راغب ہوگئے۔ انھوں نے مضامین لکھنا شروع کیے جو سندھی اخبارات اور جرائد میں‌ شایع ہونے لگے۔منگھا رام کو اسی عرصے میں ایک ایسی مستند کتاب لکھنے کا خیال آیا جو سندھی نثر اور ادب کا احاطہ کرے اور طالب علموں کی راہ نمائی کرے۔ انھوں نے اس پر کام شروع کیا اور سندھی نثر کی ڈیڑھ سو سالہ تاریخ کو اپنی کتاب میں سمیٹ لیا جو ایک شاہ کار مانی جاتی ہے۔

منگھا رام ملکانی 1980ء کو آج ہی کے دن بمبئی میں وفات پا گئے تھے۔

ٹیلی وژن اور براڈ کاسٹنگ کے شعبے میں اسلم اظہر کو لیجنڈ کا درجہ حاصل ہے۔ وہ پاکستان میں ٹیلی وژن کے بانی اور اس کے مختلف شعبہ جات میں اپنی تخلیقی صلاحیتوں اور اس میڈیم میں اپنی فنی مہارتوں کا شان دار مظاہرہ کرنے والوں میں سے ایک تھے۔

فنونِ لطیفہ اور پرفارمنگ آرٹ کے دلدادہ اسلم اظہر نے پی ٹی وی کے لیے معیاری اور مثالی کام کیا۔ ان کی خدمات کے اعتراف میں حکومت کی جانب سے ستارۂ پاکستان اور تمغہ حسنِ کارکردگی سے نوازا گیا تھا۔

اسلم اظہر 1932ء میں لاہور میں پیدا ہوئے۔ ان کے والد کو علم و فنون کی دنیا میں اے ڈی اظہر کے نام سے پہچانا جاتا تھا اور وہ ایک ادیب، شاعر اور بیدار مغز شخص تھے۔ اردو، انگریزی، فارسی، عربی، صَرف و نحو کے ماہر تھے۔ یوں علمی و ادبی ماحول میں پروان چڑھنے والے اسلم اظہر بھی شروع ہی سے تھیٹر اور فنون میں دل چسپی لینے لگے تھے۔ وہ ذہین تھے اور اچھّے طالبِ علم بھی ثابت ہوئے۔

اسلم اظہر کا زرخیز اور تخلیقی ذہن تھیٹر جیسے اس وقت کے مقبول میڈیم کے ساتھ ہندوستان میں فلم سازی اور اس کی تیکنیک میں بھی دل چسپی لے رہا تھا، لیکن وہ قانون کے طالبِ علم تھے۔ انھوں نے 1954ء میں کیمبرج یونیورسٹی سے اس مضمون میں ڈگری حاصل کی۔ وہ تعلیم کے حصول کے لیے بیرونِ ملک بھی مقیم رہے۔ قانون کی ڈگری لینے کے بعد نوکری کے سلسلے میں کچھ عرصہ چٹاگانگ میں گزرا، لیکن دل نہ لگا اور 1960ء میں کراچی چلے گئے۔

کراچی میں اس زمانے میں محکمۂ اطلاعات کے لیے دستاویزی فلمیں بنائی جارہی تھیں۔ اسلم اظہر تھیٹر پر اپنی صلاحیتوں کا مظاہرہ کر کے داد و تحسین سمیٹ چکے تھے اور ریڈیو سے بھی وابستہ رہے تھے، یہی نہیں‌ بلکہ فلم سازی کا بھی شوق تھا۔ انھیں محکمۂ اطلاعات کے لیے کام کرنے کا موقع مل گیا۔ اسی عرصے میں انھوں نے اپنے ایک دوست فرید احمد کے ساتھ کراچی آرٹس تھیٹر سوسائٹی بھی قائم کی اور اس بینر تلے تھیٹر کے لیے کئی ڈرامے تخلیق کیے۔

ایک جاپانی کمپنی سے جب حکومت نے لاہور میں ٹی وی اسٹیشن قائم کرنے کا معاہدہ کیا تو اس کمپنی نے اسلم اظہر سے رابطہ کیا اور ان کی خدمات حاصل کیں۔ انھوں نے کہا کہ وہ اس میڈیم کے حوالے سے کچھ نہیں‌ جانتے۔ مگر اس وقت کمپنی کی نظر میں کوئی اور قابل اور باصلاحیت شخص اس پروجیکٹ کے لیے نہیں تھا۔ان کے اصرار پر اسلم اظہر نے ہامی بھر لی۔ یوں ان کی سربراہی میں ٹی وی اسٹیشن کے قیام کے منصوبے پر کام شروع ہوا جسے بعد میں‌ حکومتِ پاکستان نے خرید لیا اور اسلم اظہر کو پروگرام ڈائریکٹر بنا دیا گیا۔ انھوں نے یہ ذمہ داری اس طرح نبھائی کہ باصلاحیت فن کاروں اور آرٹسٹوں سے کر تیکنیکی شعبے میں ماہرین اور قابل لوگوں کو اکٹھا کرلیا اور لاہور کے ساتھ ساتھ کوئٹہ اور کراچی میں بھی ٹی وی اسٹیشن قائم کیے۔ وہ اسٹیٹ فلم اتھارٹی کے سربراہ اور ریڈیو پاکستان کے بھی اہم عہدے پر فائز رہے۔

اسلم اظہر بذاتِ خود نہایت منجھے ہوئے براڈ کاسٹر تھے۔ صدا کاری کا فن ان کی آواز کے زیر و بم کے ساتھ اپنی مثال آپ تھا۔ وہ ایک تخلیق کار اور اختراع ساز بھی تھے جن کے زمانے میں نت نئے آئیڈیاز اور مختلف تجربات کیے گئے اور وہ کام یاب ہوئے۔

1982-83 میں پی ٹی وی کی پہلی ایوارڈ تقریب اور متعدد شان دار اور طویل دورانیے کی نشریات کو اسلم اظہر کا تاریخی کارنامہ ہیں۔

اسلم اظہر 1977ء کے انتخابات سے قبل ذوالفقارعلی بھٹو کی حکومت میں پاکستان ٹیلی وژن تربیتی اکیڈمی کے سربراہ رہے۔ ضیاءُ الحق کے زمانے میں وہ ٹی وی سے منسلک نہیں رہے اور کراچی میں دستک تھیٹر گروپ کے تحت تخلیقی کام کرتے رہے۔ بے نظیر بھٹو کے پہلے دورِ حکومت میں انھیں پاکستان ٹیلی وژن اور پاکستان براڈ کاسٹنگ کارپوریشن کا چیئرمین تعینات کیا گیا۔

پی ٹی وی کو ہر لحاظ سے ایک قابلِ تقلید اور مثالی ادارہ بنانے والے اس جوہرِ قابل کی وفات 29 دسمبر 2015ء کو ہوئی۔