کراچی : شہر قائد پھر گولیوں کی تڑتڑاہٹ سے گونج اٹھا، ایک گھنٹے میں فائرنگ کے تین واقعات پیش آئے، جس میں ایک شخص جاں بحق اور پانچ زخمی ہوگئے، رینجرز نے مختلف علاقوں سے ٹارگٹ کلر سمیت دس ملزمان گرفتار کرلیے۔
تفصیلات کے مطابق کراچی کے مختلف علاقوں میں گولیاں چل گئیں، کورنگی ویٹا چورنگی پرفائرنگ سے ایک شخص جاں بحق ہوگیا، ملزمان واردات کے بعد باآسانی فرارہونے میں کامیاب ہوگئے۔
اورنگی ٹاؤن کے علاقے بجلی نگر میں فائرنگ سے چار افراد زخمی ہوگئے حملہ آور موٹر سائیکل پر سوار تھے۔ نارتھ کراچی میں خواجہ اجمیر نگری کے قریب فائرنگ سے ایک شخص زخمی ہوگیا۔
دوسری جانب جرائم پیشہ افراد سرگرم ہوئے تو قانون نافذ کرنے والے بھی حرکت میں آگئے، رینجرز نے چھاپہ مار کارروائیوں میں مختلف علاقوں سے دس ملزمان گرفتار کرلیے۔
ترجمان رینجرز کے مطابق عوامی کالونی زمان ٹاؤن سے بھتہ خورمعیدالدین اور محمداقبال جبکہ ٹارگٹ کلرعمران خان کو گرفتار کرلیا۔
گرفتار ملزمان بھتہ خوری، غیرقانونی اسلحے کی ترسیل میں ملوث ہیں، کراچی پولیس نے سائٹ کے علاقےسے اسٹریٹ کرائم میں ملوث تین ملزمان گرفتار کرکے اسلحہ، موبائل فون اور شناختی کارڈزبرآمد کرلیے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
