یروشلم : اسرائیل اور بھارت کےدرمیان تقریباً 2 ارب ڈالر کا دفاعی معاہدے طے پاگیا۔اسرائیل کی سرکاری کمپنی کا یہ معاہدہ کسی بھی ملک سے ہونے والا اب تک کا سب سے بڑا معاہدہ ہے۔
تفصیلات کےمطابق اسرائیل کی سرکاری دفاعی کمپنی اسرائیل ایرواسپیس انڈسٹریز کی جانب سے جاری بیان میں کہاگیا کہ اس نے بھارت کے ساتھ تقریباً 2 ارب ڈالر کے دفاعی معاہدے پر دستخط کیے ہیں۔
اسرائیلی سرکاری دفاعی کمپنی کےمطابق معاہدے کے تحت بھارتی فوج اور بحریہ کو میزائل ڈیفنس سسٹم فراہم کیا جائےگا۔
اسرائیلی کمپنی بھارت کو جدید ایئر ڈیفنس سسٹم فراہم کرے گا جس میں میڈیم رینج زمین سے فضاء تک مار کرنے والےمیزائل، لانچرز اینڈ کمیونیکیشنز اور کنٹرول ٹیکنالوجی شامل ہیں اور اس کی مالیت تقریباً 1.6 ارب ڈالر ہوگی۔
اس کے علاوہ بھارت کے زیر تعمیر اولین طیارہ بردار بحری بیڑے میں نیول ڈیفنس سسٹم بھی نصب کیا جائے گا جس میں طویل فاصلے تک زمین سے فضاء میں مار کرنے والے میزائلز موجود ہوں گے۔
اسرائیل اور بھارت کے درمیان ہونے والے معاہدے کی حتمی لاگت تو سامنے نہیں آسکی تاہم آئی اے آئی کا کہنا ہے کہ اس کی مالیت 2 ارب ڈالر کے قریب ہے۔
بھارت کا اسرائیل سے 2.5 ارب ڈالر کے طیارہ شکن میزائل خریدنے کا معاہدہ
واضح رہےکہ رواں سال فروری میں بھارتی وزیراعظم نریندر مودی نے اسرائیل سے جدید ترین طیارہ شکن میزائل خریدنے کے ایک معاہدے کی منظوری دی تھی جس کی مالیت 2 ارب 50 کروڑ ڈالر بتائی گئی تھی۔
