اسلام آباد: پاکستان نے بھارتی فوج کی جانب سے ایل او سی پر شہری آبادی کو نشانہ بنانے پر بھارتی ناظم الامور کو دفتر خارجہ طلب کر لیا۔
تفصیلات کے مطابق پاکستان نے لائن آف کنٹرول پر بھارتی فوج کی بلا اشتعال فائرنگ اور سیز فائر کی خلاف ورزی پر بھارتی ناظم الامور کو طلب کر کے شدید احتجاج کیا۔
بھارتی فوج کی بلا اشتعال فائرنگ کے نتیجے میں 2 سالہ بچہ شہید اور خاتون سمیت 4 افراد زخمی ہوگئے۔ساؤتھ ایشیا اور سارک کے ڈائریکٹر جنرل زاہد حفیظ چوہدری نے بھارتی ناظم الامور گورو اہلو والیا کو طلب کر کے شید احتجاج کیا۔
ڈائریکٹر جنرل سارک اور جنوبی ایشیا نے معصوم شہریوں پر بھارتی فوج کی جانب سے فائرنگ کی مذمت کرتے ہوئے کہا کہ بھارت 2003 کی جنگ بندی مفاہمت کا احترام کرے، بھارت کی طرف سے جنگ بندی کی خلاف ورزی علاقائی امن وسلامتی کے لیے خطرہ ہے۔
انہوں نے مزید کہا کہ بھارت لائن آف کنٹرول پر کشیدگی بڑھا کر مقبوضہ کشمیر میں انسانی حقوق کی بدترین خلاف ورزیوں سے دنیا کی توجہ نہیں ہٹا سکتا۔
بھارتی فوج کی ایل او سی پر اشتعال انگیزی، 2سالہ بچہ شہید
واضح رہے کہ بھارتی فوج نے ایل او سی کی ایک بار پھر خلاف ورزی کرتے ہوئے ڈھنڈنیال اور رکھ چکری سمیت مختلف سیکٹرز پر بلااشتعال فائرنگ کی جس کے نیتجے میں دو سالہ بچہ شہید جبکہ خاتون سمیت 4 افراد زخمی ہوگئے۔
