اسلام آباد: پاکستان نے بھارتی وزیرِ دفاع کے دہشتگردوں کے ذریعے دہشتگردی ختم کرنے کے بیان پرتشویش کا اظہار کیا ہے۔
دفترخارجہ کے ترجمان قاضی خلیل اللہ نے ایک بیان میں کہا کہ دہشتگردوں سے متعلق بھارتی وزیرِ دفاع کے بیان پر تشویش ہے، وزیرِدفاع خواجہ آصف، سینٹ کی قائمہ کمیٹی برائے دفاع اور مشیر خارجہ سرتاج عزیز کی جانب سے بیان کا جواب دے دیا گیا ہے۔
انہوں نے کہا کہ پاکستان اپنے دفاع کے لئے تمام اقدامات کرے گا، افغان مہاجرین کی واپسی کے لئے بین الاقوامی مدد حاصل کرنے اور مسئلے کو مستقل طور پر حل کرنے کی کوشش کی جارہی ہے۔
اس حوالے سے افغانستان کے ساتھ مفاہمت کی کسی یادداشت پر دستخط نہیں کئے ہیں۔
واضح رہے کہ گذشتہ دنوں بھارت کے وزیرِ دفاع منوہر پاریکر نے اپنے بیان میں کہا تھا کہ دہشت گردی کا جواب بھی دہشت گردی سے دیا جائے گا، دہشت گردوں کو ختم کرنے کےلیے دہشت گردوں کو ہی استعمال کرنا چاہیے۔
جس کے بعد بھارت کے وزیرِ داخلہ راج ناتھ سنگھ نے اپنے وزیرِ دفاع کے اس بیان کی حمایت کی ہے۔
