Tag: دفتر خارجہ

اسلام آباد : پاکستان نے ایران کو شاہین تھری میزائل دینے کی خبروں کو غلط قرار دیتے ہوئے کہا کہ نازک صورتحال میں غلط اور فیک نیوز سے بچنا چاہیے۔

تفصیلات کے مطابق ترجمان دفتر خارجہ ممتاز زہرہ بلوچ نے صحافیوں کو ہفتہ وار بریفنگ دیتے ہوئے کہا کہ اسحاق ڈار نےاو آئی سی ایگزیکٹو کمیٹی کے ہنگامی اجلاس میں شرکت کی، ہنگامی اجلاس ایران اور فلسطین کی درخواست پر بلایا گیا تھا، اوآئی سی ایگزیکٹو کمیٹی اجلاس میں اسرائیلی بربریت ،جارحانہ منصوبوں کی مذمت کی گئی۔

ممتاز زہرہ بلوچ نے بتایا کہ ڈپٹی وزیر اعظم نے اقوام متحدہ،عالمی رہنماؤں اور او آئی سی کو خطوط بھیجے، خط میں غزہ میں مظالم کے خاتمے ،امداد کو رسائی دینے کا مطالبہ کیا۔

ترجمان نے کہا کہ ایران کو شاہین تھری میزائل دینےکی رپورٹس غلط ہیں، نازک صورتحال میں غلط اور فیک نیوز سے بچنا چاہیے، فریقین سےگزارش ہے جعلی خبروں کو پھیلانے میں شریک نہ ہوں۔

ان کا کہنا تھا کہ اسماعیل ہنیہ کےقتل کےتناظر میں ایرانی وزیر خارجہ نےاسحاق ڈار سے رابطہ کیا، پاکستان اسماعیل ہنیہ کے قتل کی مذمت کرتا ہے اور غزہ میں محاصرہ ختم کرنےکامطالبہ کرتےہیں۔

ممتاز زہرہ بلوچ نے کہا کہ غزہ اور اپنے ہمسائیوں میں اسرائیلی جارحیت خطےکےامن کیلئے خطرہ ہے۔

ترجمان دفتر خارجہ  نے بریفنگ میں کہا کہ پاکستان کشمیری بھائیوں اوربہنوں کےلیےپرعزم ہے، 5 اگست کو ایک بار پھر اس عزم کی تجدید کی ہے، پاکستان نے کبھی بھی جموں وکشمیر کے عوام کے علاقے پراپنادعویٰ نہیں کیا، پاکستان جموں وکشمیرکےعوام کی استصواب رائےکی جدوجہدکی حمایت کرتا ہے۔

یو اے ای کے حوالے سے ان کا کہنا تھا کہ پاکستان اور متحدہ عرب امارات کے تاریخی اور کثیت الجہتی تعلقات ہیں اور یواےای کی جانب سےپاکستانی شہریوں پر کسی قسم کی کوئی پابندیاں نہیں ہیں۔

اسلام آباد : دفتر خارجہ کو ڈی کلاسفائیڈ سائفر کی کاپیاں موصول ہوگئیں ، کاپیاں سائفر کے مزید سیاسی استعمال کے روک تھام کے تحت واپس منگوائی گئی ہے۔

تفصیلات کے مطابق دفترخارجہ کو اسپیکر اسمبلی اور چیئرمین سینیٹ سے ڈی کلاسفائیڈ سائفر کی کاپیاں موصول ہوگئیں۔

ذرائع نے کہا کہ بانی پی ٹی آئی کی حکومت میں سائفر کی ڈی کلاسفائیڈ کاپیاں دونوں دفاتر کو بھجوائی گئی تھیں، اگست 2023میں وزارت خارجہ نے دونوں دفاتر کو کاپیاں واپس کرنے کیلئے خط لکھا تھا۔

ذرائع کا کہنا ہے کہ دونوں دفاتر نے سیکیورٹی پروٹوکول کے تحت ڈی کلاسفائیڈ کاپیاں وزارت خارجہ بھجوائیں، کاپیاں سائفر کے مزید سیاسی استعمال کے روک تھام کے تحت واپس منگوائی گئیں۔

گذشتہ روز اسلام آباد ہائی کورٹ نے سائفر کیس میں بانی پی ٹی آئی اور شاہ محمود قریشی کی سزا کالعدم قرار دیتے ہوئے بری کردیا تھا۔

بانی پی ٹی آئی اور شاہ محمود قریشی کے لیے سرکاری طور پر مقرر وکلا صفائی سے عدالت نے مکالمے میں کہا تھا کہ آپ نے اس سے پہلےسزائے موت کا کوئی ٹرائل کیا ہے؟ ان مقدمات کی تفصیل دیں، تو وکیل بانی پی ٹی آئی نے کہا کہ یہ کیسا چارج ہے کہ سائفر پاس رکھ لیا، گم گیا یا کسی کودے دیا، سائفر گم گیا تو پھر سائفر پاس رکھنے کا چارج کیسے لگ سکتا ہے؟

عدالت نے کہا کہ اس حوالےسےبتائیں، اگر بانی پی ٹی آئی نےگم کر دیا تو اس کے اثرات کیا ہوئے؟ جب ہم میں کوئی نہیں جانتاکہ اس کے اثرات کیا ہوئے تو پھر کیا ہو گا؟ کیس یہ ہےوہ اپنےپاس نہیں رکھتےتھےانہوں نے جان بوجھ کر اپنے پاس رکھاگم کر دیا۔

واضح رہے سائفر کیس میں عدالت نے بانی پی ٹی آئی اور شاہ محمودقریشی کو 10،10 سال قید کی سزا سنائی تھی۔