لندن : سابق وزیراعظم نواز شریف کے بیٹے حسن نواز کے دفترپر حملہ میں تین افراد زخمی ہوگئے، پولیس نے جھگڑے کے الزام میں 3افراد کو گرفتار کرلیا ہے۔
تفصیلات کے مطابق لندن میں سابق وزیراعظم نواز شریف کے بیٹے حسن نواز کے دفتر پر نامعلوم افراد نے حملہ کردیا، جس کے نتیجے میں 3 افراد زخمی ہوگئے۔
لندن پولیس نے جھگڑے کے الزام میں 3 افراد کو گرفتار کرکے سینٹرل لندن پولیس سٹیشن منتقل کر دیا۔
پولیس کا کہنا تھا کہ واقعے کی اطلاع شام ساڑھے پانچ بجے ملی، حملے میں زخمی ایک شخص کواسپتال منتقل کردیا گیا ہے۔
کراچی: آل پاکستان مسلم لیگ کے رہنما احمد رضا قصوری نے اے آر وائی نیوز کے بیورو آفس کا دورہ کیا اور پارٹی سربراہ پرویز مشرف کی جانب سے اے آر وائی پر حملے کی مذمت کی اور گلدستہ پیش کیا۔
اے آر وائی نیوز سے بات کرتے ہوئے احمد رضا قصوری نے کہا کہ الطاف حسین پاکستان مخالف تقریر کرکے غداری کے مرتکب ہوئے ہیں، انہوں نے مطالبہ کیا کہ ایم کیو ایم قائد پر آرٹیکل چھ کے تحت غداری کا مقدمہ درج کرکے قانونی کارروائی کی جائے۔
انہوں نے کہا کہ آرٹیکل چھ کے تحت مقدمہ درج کرنا وزیراعظم میاں محمد نواز شریف کی ذمہ داری ہے، ایک سوال پر احمد رضا قصوری نے کہا کہ ایم کیو ایم میں اچھے لوگ بھی ہیں انہیں محفوظ رستہ دیا جائے۔
یاد رہے کہ 22 اگست کو اے آر وائی نیوز کے دفتر پر ایم کیو ایم کے مشتعل کارکنان نے حملہ کردیا تھا ، کارکنان نے دفتر میں توڑ پھوڑ اور ملازمین کو ہراساں کیا تھا۔
کراچی: اے آر وائی نیوز کے دفتر پر ایم کیو ایم کے مشتعل کارکنان نے حملہ کردیا، کارکنان نے دفتر میں توڑ پھوڑ کی کارکنان نے مدینہ مال کے شیشے بھی توڑ دیئےاور ملازمین کو ہراساں کیا۔
ایم کیوایم کے مشتعل کارکنوں نے صدر کے مصروف ترین علاقے کو میدان جنگ بنادیا، اے آر وائی نیوز پر حملے کے بعد پریس کلب پر دھاوا بول دیا۔
اے آروائی نیوز کے دفترپرحملہ کرنے والوں نےکمپیوٹرتوڑڈالے، گارڈ سےاسلحہ بھی چھیننے کی کوشش کی۔
تفصیلات کے مطابق قائد ایم کیوایم کے خطاب کے بعد ایم کیوایم کے کارکنوں نے ٹی وی چینلز پر حملہ کردیا، کراچی کا مصروف ترین علاقہ صدر منٹوں میں میدان جنگ کا منظر پیش کرنے لگا۔
کراچی مدینہ سٹی مال میں اے آروائی نیوز کے بیورو آفس پراپنا چہرہ ماسک میں چھپائے ایک شخص شیشے کا دروازہ توڑ کراندر داخل ہوا، سی سی ٹی وی فوٹیج میں دیکھا جاسکتا ہے کہ اس شخص نے توڑ پھوڑ شروع کردی۔
اسے کے پیچھے پیچھے ڈنڈے اٹھائے کئی خواتین بھی دفترکے اندر گھس آئیں، انہوں نے ڈنڈے برسائے، کمپیوٹرپٹخے اور اے آروائی نیوز کے استقبالیہ دفترمیں تباہی مچادی، ایم کیو ایم کے کارکنوں نے اے آر وائی نیوز کے دفتر پر حملہ کرکے اس کو آگ لگانے کی کوشش کی۔
استقبالیہ پر تباہی مچانے کے بعد یہ لوگ دفتر کے دوسری حصوں میں بھی گھس گئے۔ عملے کو ہراساں کیا۔۔ اورمارپیٹ کی۔ سی سی ٹی وی فوٹیج میں ایک شخص گارڈ سے ہاتھا پائی کرتا نظرآرہا ہے۔ وہ گارڈ سے اس کا پستول چھیننے کی کوشش کررہا تھا لیکن اس میں کامیاب نہ ہوسکا۔
ایم کیوایم کے مشتعل کارکنوں نے اے آر وائی کے دفتر پر حملے کے بعد پریس کلب کا رخ کیا۔ بے قابو افراد نے پریس کلب پر پتھراؤ کیا، اورپولیس پربھی حملے کیے گئے۔ پولیس کی شیلنگ کا جواب متحدہ کارکنوں نے پتھر مار کر دیا۔
ہنگامہ آرائی میں درجنوں افراد زخمی ہوئے جن میں سے ایک دم توڑ گیا۔ اے آروائی نیوز اور پریس کلب پر حملے کے بعد مشتعل افراد دوسرے ٹی وی چینلز کی جانب بھی بڑھ رہے تھے۔ پولیس نے متحدہ کے چھ کارکنوں کو گرفتار بھی کرلیا ہے۔
پریس کلب کے قریب پولیس اہلکاروں نے مشتعل مظاہرین کو منتشر کرنے کیلئے شیلنگ کی، جبکہ ایم کیوایم کے کارکنوں کی جانب سے بھی پولیس پر پتھراؤ کیا گیا، جس کے باعث کئی افراد کے زخمی ہونے کی بھی اطلاعات ہیں۔
اے آر وائی نیوز کا عملہ اللہ کے رحم و کرم پر تھا، مسلح افراد نے اے آر وائی نیوز کے رپورٹر کو دیکھ کر فائرنگ بھی کردی لاقانونیت اور توڑ پھوڑ کے دوران خواتین اسٹاف ڈری سہمی رہیں، ایم کیو ایم کے مسلح کارکنوں نے دفترمیں توڑ پھوڑ اور ہنگامہ آرائی کے دوران قانون نافذ کرنے والے اداروں کے اہلکار کہیں نظر نہ آئے ۔ہرشے کو تو تہس نہس کرڈالا ۔
