ARYNews.tv | Urdu – Har Lamha Bakhabar

Tag: دلچسپ انکشاف

  • سلمان علی آغا کا صائم ایوب سے متعلق دلچسپ انکشاف

    سلمان علی آغا کا صائم ایوب سے متعلق دلچسپ انکشاف

    لاہور: قومی ٹی 20 ٹیم کے اوپننگ بیٹسمین صائم ایوب کے حوالے سے کپتان سلمان علی آغا کا دلچسپ انکشاف سامنے آگیا۔

    پی سی بی کی طرف سے جاری کردہ دلچسپ انٹرویو میں سلمان علی آغا نے بتایا کہ صائم ایوب سے بھوک برداشت نہیں ہوتی جبکہ کھانے کا زیادہ شوقین شاداب خان ہے، اس کے علاوہ باہر جاکر کھانے کا بل زیادہ تر بابر اعظم ہی دیتے ہیں۔

    سلمان علی آغا کا کہنا تھا کہ اگر کوئی خدانخواستہ مشکل وقت آن پڑے گا تو سب سے پہلے اپنی بیگم اور پھر کرکٹرز میں سے عبداللہ شفیق کو کال کروں گا۔

    اُنہوں نے کہا کہ میرا ایک ہی شادی سے شوق پورا ہوگیا ہے، دوسری شادی نہیں کروں گا، شادی کے بعد پہلے جیسی آزادی بہت یاد آرہی ہے۔

    انہوں نے کہا کہ سوشل میڈیا پر صائم ایوب کے بارے میں ایک میم دلچسپ لگی تھی، صائم ایوب جن دنوں پرفارم نہیں کررہے تو اُس وقت کسی صارف نے ان کی ’نو لک شاٹ‘ پر لکھا تھا کہ اب تو دیکھ کر بھی شاٹ نہیں لگ رہا۔

    صائم ایوب کی ڈریم ٹی 20 ورلڈ الیون میں کون کون شامل:

    پاکستان ٹیم کے اوپنر بیٹر صائم ایوب نے اپنی ڈریم ٹی 20 ورلڈ الیون کا اعلان کردیا۔

    پی ایس ایل میں پشاور زلمی کے اوپنر صائم ایوب نے کپتان بابر اعظم کو چھوڑ کر اپنی ڈریم ٹی 20 ورلڈ الیون میں صرف ایک پاکستانی کرکٹر کو شامل کیا ہے۔

    زلمی پوڈ کاسٹ میں صائم ایوب سے کہا گیا کہ وہ اپنے ڈریم کھلاڑیوں کو چنیں اور اس میں ایک ملک کے دو سے زیادہ کھلاڑی نہیں ہونے چاہئیں۔

    انہوں نے دو پاکستانی کھلاڑیوں کے آپشن کے باوجود صرف ایک کھلاڑی فخر زمان کا نام لیا اور ان کے ساتھ اوپننگ میں آسٹریلیا کے ٹریوس ہیڈ کو شامل کیا۔

    تیسرے نمبر پر انہوں نے انگلینڈ کے جارحانہ وکٹ کیپر بیٹر جوز بٹؒر کا انتخاب کیا، اس کے بعد مڈل آرڈر میں ویسٹ انڈیز کے نکولس پوران اور جنوبی افریقا کے ہینرک کلاسن کو اپنی ٹیم کا حصہ بنایا۔

    صائم نے انگلینڈ کے بین اسٹوکس کو چھٹے نمبر پر رکھا، آل راؤنڈر میں انہوں نے بھارت کے ہاردک پانڈیا اور اسپنر میں افغانستان کے راشد خان اور کیوی اسپنر مچل سینٹں ر پر اعتماد کا اظہار کیا۔

    یہ تینوں درمیانی اوورز کو کنٹرول کرتے ہوئے شاندار بولنگ کرنے کی صلاحیت رکھتے ہیں۔

    کوہلی نے ٹیسٹ کرکٹ سے ریٹائرمنٹ کی وجہ بتادی

    فاسٹ بولرز میں صائم نے بھارت کے جسپریت بمراہ اور آسٹریلیا کے مچل اسٹارک کا انتخاب کیا۔

    صائم ایوب کی ورلڈ ٹی 20 الیون

    فخر زمان (پاکستان)، ٹریوس ہیڈ (آسٹریلیا)، جوس بٹلر (انگلینڈ)، نکولس پوران (ویسٹ انڈیز)، ہینرک کلاسن (جنوبی افریقہ)، بین اسٹوکس (انگلینڈ)، ہاردک پانڈیا (انڈیا)، راشد خان (افغانستان)، مچل سینٹنر (نیوزی لینڈ)، (آسٹریلیا)، مچل اسٹارک، (بھارت)، جسپریت بمراہ۔

  • حریم فاروق کا ڈراموں پر والدہ کے ردعمل کے بارے میں دلچسپ انکشاف

    حریم فاروق کا ڈراموں پر والدہ کے ردعمل کے بارے میں دلچسپ انکشاف

    پاکستانی اداکارہ حریم فاروق نے کہا ہے کہ ڈراموں میں جو میرے رونے دھونے والے سین ہوتے ہیں، والدہ نہیں دیکھتی، اداکارہ نے کہا کہ میں ڈرامہ شروع کرتی ہوں مگر والدہ بیچ میں روک دیتی ہیں کہ تم رو رہی ہو میں نہیں دیکھ سکتی۔

    والدہ کہتی ہیں کہ ایسے کریکٹر نہیں کیا کرو، میں نے ان سے کہا کہ اچھا ٹھیک ہے، ”میں نے کہا کہ معصومہ پر خوش ہوجائیں گی“۔۔

    اداکارہ اے آر وائی کے مارننگ شو میں بطور مہمان شریک ہوئیں، اس موقع پر انہوں نے میزبان ندا یاسر کے دلچسپ سوالات کے جواب دیئے۔

     

    View this post on Instagram

     

    A post shared by ARY Digital (@arydigital.tv)

    اداکارہ نے بتایا کہ میرے والدین ڈاکٹرز ہیں، جبکہ میں نے بالکل علیحدہ فیلڈ کا انتخاب کیا، انہوں نے کہا کہ میں جتنا شکر ادا کروں میرے لئے کم ہے، میرے ماہ باپ میرے لئے سب سے بڑی نعمت ہیں۔

    میں نے جب اُن سے کہا کہ میں نے ایکٹنگ کرنی ہیں، تو انہوں نے کہا کہ ٹھیک ہے، بالکل کرو، پہلے ڈگری مکمل کرنا، میں نے کہا کہ ڈگری نہیں مکمل کروں گی، میں ایکٹر بننے جارہی ہوں، ڈگری کیا ہوتی ہے، بلکہ ابو نے یہ بھی کہا کہ تم باہر جاکر ایکٹنگ پڑھ لو۔ ابو کے اسرار پر میں نے بیچلر کی ڈگری بھی حاصل کی۔

    معاشرے میں دھوکا دے کر دوسری شادی کرنا معمول بن چکا، حریم فاروق

    واضح رہے کہ اے آر وائی ڈیجیٹل کے ڈرامہ سیریل ’بسمل‘ میں حریم فاروق ’معصومہ‘ کا منفی کردار نبھا رہی ہیں جو ’توقیر تاثیر‘ (نعمان اعجاز) سے دوسری شادی کرلیتی ہیں، بسمل میں ان کی اداکاری کو بھرپور پذیرائی مل رہی ہے۔

  • ’جوان‘ میں شاہ رخ خان کے گنجے لُک سے متعلق دلچسپ انکشاف

    ’جوان‘ میں شاہ رخ خان کے گنجے لُک سے متعلق دلچسپ انکشاف

    بالی ووڈ کے سپر اسٹار اداکار شاہ رخ خان کی میک اپ آرٹسٹ پریتشیل سنگھ ڈیسوزا نے فلم جوان میں اداکار کے لُک سے متعلق دلچسپ انکشاف کیا ہے۔

    بالی ووڈ اداکار شاہ رخ خان بالی ووڈ کے سب سے زیادہ پسند کیے جانے والے اداکاروں میں سے ایک ہیں، 2023 میں بالی ووڈ میں ان کی واپسی نے شاہ رخ خان کے لیے ایک نئے دور کا آغاز کیا، اداکار نے اپنی جاندار اداکاری سے بتایا کہ انہیں بالی ووڈ کا کنگ کیوں کہا گیا ہے۔

    2023 میں ان کی 3 فلمیں ریلیز ہوئی جس نے بالی ووڈ کی باکس آفس پر اچھا بزنس کیا، اپنی میگا بلاک بسٹر فلم ’جوان‘ میں شاہ رخ مختلف لُک میں نظر آئے تھے۔

    فلم ’جوان‘ کے ٹیزر اور ٹریلر لانچ میں جب مداحوں نے انہیں ’گنجے‘ لُک میں دیکھا تو یہ سب سے زیادہ زیر بحث پہلوؤں میں سے ایک بن گیا لیکن اس کی دلچسپ بات یہ ہے کہ ’جوان‘ میں شاہ رخ  کا ’گنجا‘ لُک فلم کے پلان میں شامل ہی نہیں کیا گیا تھا۔

    ٹائمز آف انڈیا کے ساتھ ایک انٹرویو میں فلم کی میک اپ آرٹسٹ پریتشیل سنگھ ڈیسوزا نے انکشاف کیا کہ شاہ رخ کا یہ لُک ایک ٹیسٹ سیشن کے دوران حادثاتی طور پر بنایا گیا تھا، انہوں نے وضاحت کی کہ ٹیم ابتدائی طور پر شاہ رخ خان کے کردار پر مختلف وِگ آزما رہی تھی۔

     

    View this post on Instagram

     

    A post shared by Shah Rukh Khan (@iamsrk)

    میک اپ آرٹست پریتشیل سنگھ نے کہا کہ میک اپ ٹیم نے سیاہ اور سفید ڈاڑھی کے ساتھ گنجا نظر آنے والی وگ لگائی تو ہم نے دیکھا کہ  شاہ رخ ایک ایسی ڈاڑھی اور گنجے لُک میں پرفیکٹ نظر آرہے ہیں۔

    ’’ جب ہم نے شاہ رخ خان پر یہ لُک باقاعدہ آزمایا تو وہ راک اسٹار لگ رہے تھے، اس وقت ہمیں احساس ہوا کہ یہ لُک بالکل درست ہے اور موقع پر ہی اسے ’جوان‘ میں ان کے کردار وکرم راٹھور میں شامل کرنے کا فیصلہ کیا گیا‘‘

    میک اپ آرٹست پریتشیل سنگھ نے مزید بتایا کہ شاہ رخ کے گنجے لک کا  فیصلہ بالکل اچانک کیا گیا تھا لیکن مداحوں اور ناقدین دونوں نے اسے خوب پسند کیا۔

    واضح رہے کہ فلم ’جوان‘ کیلئے اداکار شاہ رخ خان کی تبدیلی صرف ان کی شکل تک محدود نہیں تھی بلکہ انہوں نے جسمانی طور پر بھی اپنے آپ کو تبدیل کیا تھا۔

  • چیونٹیاں بہترین سرجن بھی ہوتی ہیں، ویڈیو میں دلچسپ انکشاف

    چیونٹیاں بہترین سرجن بھی ہوتی ہیں، ویڈیو میں دلچسپ انکشاف

    ہمارے گھروں، گلی محلّوں اور دیواروں کے کناروں پر پائی جانے والی چیونٹیوں سے متعلق ایک دلچسپ حقیقت سامنے آئی ہے جس میں انکشاف کیا گیا ہے کہ یہ بہترین معالج بھی ہوتی ہیں۔

    جی ہاں ! ایک تحقیق میں یہ بات سامنے آئی ہے کہ چیونٹیاں حیرت انگیز طور پر انسانوں کی طرح اپنے زخمی ساتھی کا علاج بخوبی کرسکتی ہیں بلکہ یہ ان میں کامیاب آپریشن کرنے کی بھی صلاحیت ہوتی ہے۔

    غیرملکی خبر رساں ادارے کی رپورٹ کے مطابق سائنسی جریدے ’کرنٹ بائیولوجی‘ میں شائع ایک تحقیقی رپورٹ میں اس بات کا انکشاف کیا گیا ہے کہ چیونٹیاں اپنے زخمی ساتھیوں کے جسم میں انفیکشن پھیلنے سے روکنے کے لیے ان کے زخمی عضو، جیسے ٹانگ کو کاٹ کر ان کی ان کے جسم سے الگ کرلیتی ہیں، ایسا کرنے سے ان کے ساتھی کی جان بچ جاتی ہے۔

    رپورٹ کے مطابق تاریخ میں پہلی بار انسانوں کی طرح سرجری (آپریشن) جیسا عمل کسی اور جاندار میں پایا گیا ہے، چیونٹیوں کی اس قسم کو’فلوریڈا کارپینٹر آنٹ‘ کا نام دیا گیا ہے اور یہ امریکا میں پائی جاتی ہیں۔

    مشاہدے سے یہ بات سامنے آئی کہ زخمی چیونٹیوں کے زخموں کو صاف کرکے انہیں ٹھیک کرنے کی کوشش کی جاتی ہیں، یا ضائع ہونے والی ٹانگ کو کاٹ کر جسم سے علیحدہ کر دیا جاتا ہے۔

    Ants

    جرمنی کی یونیورسٹی آف ورزبرگ کے پروفیسر اور محقق پروفیسر ایرک فرانک کے مطابق انہیں یقین ہے کہ جانداروں میں انسانوں کے بعد ان چیونٹیوں کا یہ طبی نظام سب سے ترقی یافتہ ہے۔

    سماجی رابطے کی ویب سائٹ ایکس پر اپنے پیغام میں پروفیسر ایرک فرانک نے لکھا کہ ان چیونٹیوں نے آپریشن کے کئی طریقے وقت کے ساتھ ساتھ سیکھے ہیں، چیونٹیوں نے زخمی ہونے کی صورت میں جب اپنے ساتھی کی ٹانگ ان کی ران کی ہڈی سے اوپر سے کاٹی تو ایسی صورت میں ایسی چیونٹیوں کے بچنے کا اوسط امکان 95 فیصد تک پہنچ گیا۔

    محققین کے مطابق یہ پہلا موقع ہے کہ سائنسدانوں نے انسانوں کے علاوہ جانداروں میں زخموں کو ٹھیک کرنے کے لیے میڈیکل طریقہ کار استعمال کرتے ہوئے دیکھا ہے۔

    واضح رہے کہ اس سے قبل محققین نے دیمک کا شکار کرنے والی چیونٹیوں پر تحقیق کی تھی جس میں انکشاف کیا گیا تھا کہ یہ چیونٹیاں ساتھیوں کے زخموں کو بیکٹیریا سے بچانے کے لیے جسم کے ایک غدود سے خاص رطوبت جاری کرتی ہیں جو اینٹی بائیوٹک ہوتی ہے جس کے نتیجے میں ہلاکتوں کی تعداد بہت کم ہوتی ہے۔