ARYNews.tv | Urdu – Har Lamha Bakhabar

Tag: دلیپ کمار

  • دلیپ کمار کی طبیعت کیسی ہے؟ اہلیہ کا بیان سامنے آگیا

    دلیپ کمار کی طبیعت کیسی ہے؟ اہلیہ کا بیان سامنے آگیا

    نئی دہلی: بالی ووڈ کے معروف اداکار دلیپ کمار کی طبیعت کے حوالے سے ان کی اہلیہ سائرہ بانو کا بیان سامنے آگیا۔

    بھارتی میڈیا کے مطابق 98 سالہ دلیپ کمار کی طبیعت ناسازی سے متعلق مختلف افواہیں گردش کر رہی تھیں تاہم اب ان کی اہلیہ سائرہ بانو نے ان افواہوں کا جواب دیتے ہوئے بتایا کہ ان کے شوہر خیریت سے ہیں۔

    سائرہ بانو کا کہنا تھا کہ لیجنڈری اداکار کو عمر کی مناسب سے کمزوری محسوس ہورہی ہے، باقی وہ بالکل ٹھیک ہیں۔ ایسی کوئی بات نہیں کہ ان کی قوت مدافعت ختم ہو رہی ہے۔

    خیال رہے کہ رواں برس دلیپ کمار کے 2 بھائی اسلم خان اور احسان خان کرونا وائرس کے باعث جان کی بازی ہار گئے۔

    دلیپ کمار کے دونوں بھائیوں میں 16 اگست کو کرونا وائرس کی تشخیص ہوئی تھی جس کے بعد نہیں لیلاوتی اسپتال میں داخل کروایا گیا تھا۔

    اسپتال میں دوران علاج دونوں بھائیوں کی حالت بگڑنے لگی اور پہلے اسلم خان کرونا کے باعث دم توڑ گئے بعد ازاں احسان خان بھی انتقال کر گئے تھے۔

  • پشاور شہر کے وہ باسی جو پرفارمنگ آرٹ کی دنیا میں‌ نام ور ہوئے

    پشاور شہر کے وہ باسی جو پرفارمنگ آرٹ کی دنیا میں‌ نام ور ہوئے

    وسطی اور جنوبی ایشیا کی اہم گزر گاہوں پر واقع پشاور شہر نسلی اور لسانی اعتبار سے متنوع اور تہذیب و ثقافت کے حوالے سے نہایت اہمیت رکھتا ہے کہ اس نے گندھارا تہذیب سے لے کر سکھ، مرہٹہ، مغل، پشتون اور پھر برطانوی راج دیکھا اور آج یہ شہر پاکستان کے‌ صوبہ خیبر پختونخوا کا صدر مقام ہے۔

    تھیٹر، ٹیلی ویژن، سنیما کے مختلف شعبوں‌ اور پرفارمنگ آرٹ کی بات کی جائے تو کئی فن کارو‌ں نے عزت، شہرت، نام و مرتبہ حاصل کیا جن کا تعلق پشاور سے ہے۔

    یہاں ہم پشاور کے ان فن کاروں کا ذکر کررہے ہیں‌ جو‌ تقسیمِ ہند سے پہلے اور بٹوارے کے بعد فلم اور پرفارمنگ آرٹ کے مختلف شعبوں میں‌ اپنی صلاحیتوں‌ کی بنا پر ممتاز ہوئے اور خوب نام کمایا۔

    اگر بات کی جائے سنیما اور فلم سازی کے ابتدائی دور کی تو تقسیمِ ہند سے قبل بننے والی ناطق فلموں‌ میں‌ سے ایک "عالم آرا” تھی جو 1931 میں ریلیز ہوئی۔

    اس فلم کی کاسٹ میں زیادہ تر مسلمان فن کار شامل تھے۔ ان میں زبیدہ، ڈبلیو ایم خاں، علی زر، محبوب خاں اور پرتھوی راج شامل ہیں اور ان سب کا تعلق پشاور سے تھا۔ اسی فلم کا پہلا گیت ریکارڈ کرانے کا سہرا بھی ایک پشاوری فن کار کے سَر جاتا ہے۔

    پشاور شہر نے پاک و ہند کی فلمی صنعت اور پرفارمنگ آرٹ کے مختلف میڈیا کو سیکڑوں باکمال اور باصلاحیت‌ آرٹسٹ دیے جنھوں‌ نے بولی وڈ، لولی وڈ، پشتو فلم انڈسٹری، ٹیلی ویژن اور تھیٹر پر بے مثال کام کیا۔ بولی وڈ کی طرف دیکھیے تو برسوں سے وہاں‌ "خان” چھائے رہے ہیں جن کا تعلق پشاور شہر سے ہے۔

    لاہور میں‌ ایورنیو اسٹوڈیوز بنانے والے آغا جی اے گل کا تعلق پشاور سے تھا جہاں‌ ان کا تصویر محل سنیما بھی تھا، آغا صاحب پاکستان کی فلم انڈسٹری کے معماروں میں سے ایک تھے۔

    شہنشاہِ جذبات یعنی یوسف خاں کا ذکر بھی ہوجائے جو دلیپ کمار کے نام سے مشہور ہیں، اسی شہر پشاور کے باسی تھے۔ بالی وڈ کے مشہور اداکار امجد خان اور راج کپور نے بھی اسی شہر میں‌ آنکھ کھولی تھی۔

    سینئر فن کاروں کی طرف چلیں تو پشاور کے آغا پیر جان، اشرف خاں، اداکار اکبر پشاوری، اداکار خلیل خاں کے علاوہ اداکار و ہدایت کار اور فلم ساز اختر نواز، اداکار اور ڈائریکٹر اور فلم سازی میں‌ مشہور مظہر خاں، ہدایت کار محبوب خاں، ہدایت کار جی آر درانی وہ نام ہیں‌ جو اپنی صلاحیتوں اور فن کی بدولت پرفارمنگ آرٹ کی دنیا میں پہچانے گئے اور اپنے شہر پشاور کا نام روشن کیا۔

  • لینڈ مافیا کی دھمکیاں، دلیپ کمار کی اہلیہ نے مودی سے مدد مانگ لی

    لینڈ مافیا کی دھمکیاں، دلیپ کمار کی اہلیہ نے مودی سے مدد مانگ لی

    ممبئی: بالی ووڈ لیجنڈری اداکار دلیپ کمار کی اہلیہ سائرہ بانو نے لینڈ مافیا کی جانب سے سنگین نتائج کی دھمکیاں موصول ہونے کے بعد بھارتی وزیراعظم سے مدد مانگ لی۔

    تفصیلات کے مطابق سائرہ بانو کے دو پلاٹوں پر لینڈ مافیا نے قبضہ کر کے بنگلے تعمیر کردیے اور وہ کسی صورت زمین چھوڑنے کے لیے بھی تیار نہیں ہیں۔

    دلیپ کمار کے اہل خانہ نے لینڈ مافیا کے کارندوں سے جگہ خالی کرنے کی استدعا کی تو انہوں نے سائرہ بانو کو سنگین نتائج کی دھمکیاں دیں اور زمین چھوڑنے سے صاف انکار کردیا۔

    بھارتی میڈیا کی رپورٹس کے مطابق 96 سالہ لیجنڈری اداکار کے بنگلے باندرا کے پوش علاقے پالی ہلز میں ہیں۔

    مزید پڑھیں: کنگ خان کی لیجنڈ اداکار دلیپ کمار کے گھر آمد

    اتوار کے روز سائرہ بانو نے دلیپ کمار کے اکاؤنٹ سے ٹویٹر پر بھارتی وزیراعظم کے نام ایک پیغام شیئر کیا جس میں اُن کا کہنا تھا کہ ’میں سائرہ بانو خان التماس کرتی ہوں کہ نریندر مودی میری درخواست سنیں اور لینڈ مافیا کے خلاف کارروائی کریں‘۔

    انہوں نے قبضہ مافیا کے کارندوں کے نام بتاتے ہوئے کہا کہ ’سمیر بھوجوانی نامی شخص حال ہی میں جیل سے رہا ہوا جس نے میرے پلاٹ پر قبضہ کر کے بنگلے تعمیر کیے‘۔

    اُن کا کہنا تھا کہ قبضے کے بعد وزیراعلیٰ کو بھی شکایت کی مگر لینڈ مافیا نے پیسوں کا استعمال کر کے سرکار کو بھی اپنی طرف کھینچ لیا اور ہمیں سنگین نتائج کی دھمکیاں بھی دیں‘۔

    یہ بھی پڑھیں: امیتابھ بچن کا سائرہ بانو سے رابطہ

    قبل ازیں رواں برس سائرہ بانو نے سمیر بھوجوانی کے خلاف ممبئی کے تھانے میں مقدمہ درج کروایا تھا، پولیس نے بلڈر کے خلاف قبضے اور جعلی کاغذات بنانے کے الزام میں ایف آئی آر درج کی تھی۔

    پولیس کی تحقیقات میں بھی یہ بات سامنے آئی کہ بھوجوانی نے سائرہ بانو کے پلاٹ پر قبضہ کررکھا ہے مگر اُس کے خلاف کوئی کارروائی عمل میں نہیں لائی گئی اور نہ ہی تاحال پلاٹ اصل حقداروں کے حوالے نہیں کیا گیا۔

  • دلیپ کمار 96ویں برس کے ہوگئے

    دلیپ کمار 96ویں برس کے ہوگئے

    ممبئی: پاکستان کے علاقے پشاور میں پیدا ہونے والے بھارتی لیجنڈ دلیپ کمار آج اپنی 96ویں سالگرہ منا رہے ہیں، آپ 11 دسمبر 1922 کو خیبرپختونخواہ کے علاقے قصہ خوانی میں پیدا ہوئے۔

    تفصیلات کے مطابق 6 دہائیوں سے زائد پر محیط ہندی سینما کی تاریخ کا سب سے بڑا ستارہ اور ٹریجڈی کنگ دلیپ کمارآج 96 برس کے ہوگئے۔ یوسف خان عرف دلیپ کمار پشاور کے علاقے قصہ خوانی میں 11 دسمبر 1922 کو پیدا ہوئے۔

    آپ کے والد لالہ غلام سرور پھلوں کی تجارت سے وابستہ تھے وہ 1935 میں اپنے اہل خانہ کے ہمراہ  ہندوستان کے شہر ممبئی منتقل ہوئے اور وہاں سے اپنا کاروبار جاری رکھا۔

    مزید پڑھیں: دلیپ کمار روبہ صحت، اسپتال سے گھر منتقل

    ممبئی منتقلی کے بعد 1943 میں دلیپ کمار کی ملاقات بمبئی ٹاکیز کے مالکان سے ہوئی جنہوں نے انہیں اپنی فلم میں مرکزی کردار کی پیش کش کی، دلیپ کمار کی منظوری کے بعد فلم ’’جواربھاٹا‘‘ کی شوٹنگ کا آغاز کیا گیا۔

    یوسف خان کی پہلی فلم 1943 میں ریلیز ہوئی جس میں انہوں نے دلیپ کمار کا کردار ادا کیا ‘ عوامی مقبولیت کے بعد آپ کا اصل نام کہیں کھو گیا تاہم فلمی نام دلیپ کمار کے نام سے انڈسٹری میں پہچان ملی۔

    سن 1949 میں راج کپوراورنرگس کے ساتھ پیارکی تکون پر مشتمل کلاسک فلم انداز نے دلیپ کمار کو سپراسٹار بنا دیا جب کہ یکے بعد دیگرے آنے والی فلموں نے انہیں بے مثال کامیابی دی۔

    دلیپ کمار کی مشہور فلموں میں کرانتی ،کرما،سنگ دل، امر، اڑن کھٹولہ، آن، انداز، نیا دور، مدھومتی، یہودی، کوہ نور، آزاد، گنگا جمنا اور رام اور شیام سمیت متعدد فلمیں شامل ہیں تاہم 1960 میں تاریخی فلم “مغلِ اعظم” میں شہزادہ سلیم کا کرداران کی زندگی کایادگارکرداربن گیا۔

    یہ بھی پڑھیں: دلیپ کمار اپنی موت کی جھوٹی خبروں سے پریشان

    عوامی مقبولیت اور  اپنی اداکاری کی صلاحیتیں منوانے والے یوسف خان کو بہترین اداکاری پر کئی ایوارڈز سے نوازا گیا جبکہ آپ کو فلمی انڈسٹری میں سب سے زیادہ ایوارڈ جیتنے کا اعزاز حاصل ہے جس کی بنیاد پر آپ کا نام گینز بک آف ورلڈ ریکارڈ میں شامل کیا گیا ہے۔

    دلیپ کمارکی فنی خدمات کے اعتراف میں بھارتی حکومت کی جانب سے انہیں پدما بھوشن اور دادا صاحب پھالکے ایوارڈزبھی دیے گئے جبکہ گزشتہ برس یوسف خان کو لائیو ٹائم اچیومنٹ ایوارڈ سے بھی نوازا گیا تھا۔

    سالگرہ کی مبارک مباد

    پاکستان گلوکار اور اداکار علی ظفر نے دلیپ کمار کو سالگرہ کی مبارک باد پیش کی

    سرکاری ٹیلی ویژن کی جانب سے بھی مبارک باد دی گئی

    علاوہ ازیں‌ بالی ووڈ‌ کے تمام فنکاروں‌ اور مداحوں‌ نے دلیپ کمار کو سالگرہ پر مبارک باد پیش کرتے ہوئے اُن کی عمر خضر کے لیے نیک خواہشات کا اظہار بھی کیا.

  • دلیپ کمار روبہ صحت، اسپتال سے گھر منتقل

    دلیپ کمار روبہ صحت، اسپتال سے گھر منتقل

    ممبئی: بالی ووڈ کے لیجنڈری اداکارہ دلیپ کمار کو طبیعت میں بہتری کے بعداسپتال سے چھٹی دے کر گھر منتقل کردیا گیا۔

    تفصیلات کے مطابق بھارت کے ممتاز اداکار یوسف خان (دلیپ کمار) کو 8 اکتوبر کی صبح طبیعت ناساز ہونے کے بعد ممبئی کے لیلاوتی اسپتال میں داخل کرایا گیا تھا۔

    ڈاکٹرز نے انہیں انتہائی نگہداشت وارڈ میں داخل کر کے مرض کی تشخیص کے لیے کچھ ٹیسٹ کروائے تھے جن کی رپورٹس میں یہ بات سامنے آئی تھی کہ اداکار کو نمونیا کا مرض لاحق ہوگیا جس کے باعث اُن کے سینے میں انفکیشن اور بخار کی شکایت ہے۔

    لیلا وتی اسپتال کے نائب صدر اور ترجمان ڈاکٹر اجے کمار کا کہنا ہے کہ ’دلیپ کمار کی طبیعت کے حوالے سے گھبرانے کی ضرورت نہیں کیونکہ وہ اب پہلے سے بہتر ہیں  مگر انہیں ابھی نگہداشت کے لیے اسپتال میں رکھا جائے گا‘۔

    مزید پڑھیں: دلیپ کمار کی طبیعت سنبھل گئی، ڈاکٹر کی تصدیق

    یوسف خان کے ترجمان اور قریبی رشتے دار فیصل فاروق نے سوشل میڈیا پر دلیپ کمار کی ہی آئی ڈی سے مداحوں کو خوشخبری سنائی کہ لیجنڈری اداکار کو اسپتال سے چھٹی دے کر گھر منتقل کردیا گیا، اُن کی طبیعت بہتر ہے مگر ڈاکٹرز نے انفیکشن کی وجہ سے چند روز مکمل آرام کرنے کی ہدایت کی جس پر وہ عمل کریں گے۔

    انہوں نے دعاؤں میں یاد رکھنے پر تمام مداحوں، رشتے داروں کا شکریہ بھی ادا کیا۔

    دوسری جانب دلیپ کمار کی اہلیہ سائرہ بانو نے بھی مداحوں کا شکریہ بذریعہ ٹویٹ ادا کیا۔

    واضح رہے کہ 8 اکتوبر کو لیجنڈری اداکار کے قریبی رشتے دار فیصل فاروق نے سماجی رابطے کی ویب سائٹ ٹویٹر پر دلیپ کمار کی ہی آئی ڈی سے اُن کی طبیعت خراب ہونے کی اطلاع دی تھی۔

    یاد رہے کہ 95 سالہ اداکار کو صحت کے مسائل کا سامنا ہے، انھیں ایک برس قبل  بھی طبیعت ناساز ہونے پر ممبئی کے لیلاوتی اسپتال میں داخل کرایا گیا تھا، جس کے بعد وہ روبہ صحت ہو کر گھر لوٹ آئے تھے۔

    یہ بھی پڑھیں: دلیپ کمار اپنی موت کی جھوٹی خبروں سے پریشان

    6 دہائیوں تک بالی ووڈ فلم نگری پر راج کرنے والے دلیپ کمار نے بے شمار فلمیں کیں، “مغلِ اعظم” میں شہزادہ سلیم کا کردار ان کی زندگی کا یادگار کردار بن گیا جبکہ اُن کی آخری فلم ’’قلعہ‘‘ 1998 میں ریلیز کی گئی تھی۔

  • دلیپ کمار کی طبیعت سنبھل گئی، ڈاکٹر کی تصدیق

    دلیپ کمار کی طبیعت سنبھل گئی، ڈاکٹر کی تصدیق

    ممبئی: بالی ووڈ کے لیجنڈری اداکار دلیپ کمار کی طبیعت سنبھل گئی تاہم وہ اب بھی ڈاکٹر کی نگہداشت میں موجود ہیں۔

    تفصیلات کے مطابق بھارت کے ممتاز اداکار یوسف خان (دلیپ کمار) کو ایک روز قبل طبیعت ناساز ہونے کے بعد ممبئی کے لیلاوتی اسپتال میں داخل کرایا گیا تھا۔

    ڈاکٹرز نے انہیں انتہائی نگہداشت وارڈ میں داخل کر کے مرض کی تشخیص کے لیے کچھ ٹیسٹ کروائے جن کی رپورٹس آنے پر یہ بات سامنے آئی کہ اداکار کو نمونیا کا مرض لاحق ہوگیا جس کے باعث اُن کے سینے میں انفکیشن اور بخار کی شکایت ہے۔

    مزید پڑھیں: دلیپ کمار اپنی موت کی جھوٹی خبروں سے پریشان

    لیلا وتی اسپتال کے نائب صدر اور ترجمان ڈاکٹر اجے کمار کا کہنا ہے کہ ’دلیپ کمار کی طبیعت کے حوالے سے گھبرانے کی ضرورت نہیں کیونکہ وہ اب پہلے سے بہتر ہیں  مگر انہیں ابھی نگہداشت کے لیے اسپتال میں رکھا جائے گا‘۔

    قبل ازیں بالی ووڈ کی معروف اداکارہ اور یوسف خان کی اہلیہ سائرہ بانو نے بھی بھارتی میڈیا سے بات کرتے ہوئے طبیعت پر اطمینان کا اظہا کیا تھا۔

    واضح رہے کہ ایک روز قبل لیجنڈری اداکار کے قریبی رشتے دار فیصل فاروق نے سماجی رابطے کی ویب سائٹ ٹویٹر پر دلیپ کمار کی ہی آئی ڈی سے اُن کی طبیعت خراب ہونے کی اطلاع دی تھی۔

    یہ بھی پڑھیں: دلیپ کمار کو طبیعت بگڑنے پر اسپتال میں‌ داخل کرا دیا گیا

    یاد رہے کہ 95 سالہ اداکار کو صحت کے مسائل کا سامنا ہے، انھیں ایک برس قبل  بھی طبیعت ناساز ہونے پر ممبئی کے لیلاوتی اسپتال میں داخل کرایا گیا تھا، جس کے بعد وہ روبہ صحت ہو کر گھر لوٹ آئے تھے۔

    6 دہائیوں تک بالی ووڈ فلم نگری پر راج کرنے والے دلیپ کمار نے بے شمار فلمیں کیں، “مغلِ اعظم” میں شہزادہ سلیم کا کردار ان کی زندگی کا یادگار کردار بن گیا جبکہ اُن کی آخری فلم ’’قلعہ‘‘ 1998 میں ریلیز کی گئی تھی۔

  • دلیپ کمار کو طبیعت بگڑنے پر اسپتال میں‌ داخل کرا دیا گیا

    دلیپ کمار کو طبیعت بگڑنے پر اسپتال میں‌ داخل کرا دیا گیا

    ممبئی: بالی وڈ کے لیجنڈ اداکار دلیپ کمار کو طبیعت بگڑنے پر اسپتال میں داخل کروا دیا گیا۔

    تفصیلات کے مطابق شہنشاہ جذبات کہلانے والے بھارت کے ممتاز اداکار یوسف خان المعروف دلیپ کمار کی طبیعت بگڑ گئی ہے۔

    دلیپ کمار کو سینے کے انفیکشن کی وجہ سے اسپتال میں داخل کروایا گیا، جہاں ابتدائی ٹیسٹ کیے جارہے ہیں۔

    یاد رہے کہ 95 سالہ اداکار کو صحت کے مسائل کا سامنا ہے، انھیں کچھ عرصے قبل بھی اسپتال میں ایڈمٹ کرایا گیا تھا، البتہ وہ صحت یاب ہو کر گھر لوٹ آئے تھے۔

    دلیپ کمار کے اہل خانہ کی جانب سے ان کے اسپتال میں داخل ہونے کی تصدیق کرتے ہوئے دعاؤں کی اپیل کی گئی ہے۔

    مزید پڑھیں: کنگ خان کی لیجنڈ اداکار دلیپ کمار کے گھر آمد

    واضح رہے کہ دلیپ کمار کا شمار بھارت کے عظیم اداکاروں میں ہوتا ہے،بعد میں آنے والے اداکاروں میں فقط امیتابھ بچن ہی ان کے مدمقابل کھڑے ہوسکے۔

    دلیپ کمار کا بالی وڈ کے خانز پر بھی گہرا اثر ہے، بالخصوص شاہ رخ خان کی رومانوی اداکاری پر ان کا گہرا اثرا ہے۔

  • کنگ خان کی لیجنڈ اداکار دلیپ کمار کے گھر آمد

    کنگ خان کی لیجنڈ اداکار دلیپ کمار کے گھر آمد

    ممبئی: کروڑوں مداحوں کے دلوں پر راج کرنے والے اداکار شاہ رخ خان بالی وڈ کے لیجنڈری اداکار دلیپ کمار کی عیادت کے لیے اُن کے گھر پہنچے۔

    تفصیلات کے مطابق دلیپ کمار جو گزشتہ کئی برسوں سے علیل ہیں اُن کی عیادت کے لیے بالی وڈ کی دیگر شخصیات کے بعد اب شاہ رخ خان ان کی رہاہش گاہ پہنچے۔

    شاہ رخ خان کی آمد پر دلیپ کمار خود اور ان کی اہلیہ سائرہ بانو بے حد خوش ہوئیں اور کنگ خان کا شکریہ ادا بھی کیا۔

    دلیپ کمار کے منہ بولے بیٹے شاہ رخ نے علالت کے بعد اب تک لیجنڈری اداکار کے گھر کا دو بار دورہ کیا، قبل ازیں ہونے والی ملاقات کی تصویریں بھی سوشل میڈیا پر وائرل ہو چکی ہیں۔

    دلیپ کمار کو نمونیا کی تشخیص

    شاہ رخ خان جہاں دلیپ کمار کو اپنا آئیڈیل مانتے ہیں وہیں لیجنڈ اداکار نے بھی بالی وڈ بادشاہ کو اپنا منہ بولا بیٹا بنا رکھا ہے، دونوں اداکاروں کا یہ رشتہ اس قدر مضبوط ہے کہ لیجنڈری اداکار کی کنگ خان کو دیکھ کر طبیعت خوش گوار ہوجاتی ہے۔

    ملاقات کے دوران لی گئی تصویر میں دیکھا جاسکتا ہے کنگ خان لیجنڈ اداکار کا ہاتھ تھامے کھڑے ہیں اور دلیپ کمار علالت اور ضعیف العمری کے باعث بہت کمزور ہوچکے ہیں۔

     

    خیال رہے دونوں اداکار ماضی میں فلم ’’دیو داس‘‘ کے لیے کام کرچکے ہیں، فلم میں بہترین اداکاری پر شاہ رخ خان کو دلیپ کمار نے تالیاں بجا کر خراج تحسین بھی پیش کیا تھا۔

    دلیپ کمار کی طبیعت ناساز، اسپتال منتقل

    واضح رہے کہ 95 سالہ دلیپ کمار کی صحت رواں برس سے تیزی سے گر رہی ہے جس کی وجہ سے انہیں کئی بار اسپتال میں داخل کیا جاچکا ہے۔

    گذشتہ برس دسمبر میں بھی انہیں دائیں پاؤں میں سوجن کے باعث اسپتال لےجانا پڑا تھا، جس کے بعد سے وہ مزید بیمار رہنے لگے ہیں۔

    یاد رہے کہ دلیپ کمار نے کئی بالی ووڈ فلموں میں اپنی اداکاری کے جوہر دکھائے تاہم اُن کی کامیاب فلموں میں مغلِ اعظم، شکتی، رام اور شیام وغیرہ شامل ہیں، لیجنڈری اداکار کی آخری فلم قلع 1998 میں ریلیز ہوئی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔