اگر آپ دنیا بھر کا سفر پر سکون کرنا چاہتے ہیں اور طویل پرواز پسند نہیں تو اب ٹرین کے ذریعہ آپ کا یہ خواب پورا ہو سکتا ہے۔
لوگوں کی اکثریت دنیا دیکھنے کی شوقین ہوتی ہے، مگر ان میں کئی ایسے بھی ہوں گے جنہیں پرواز یا پر ہجوم ایئرپورٹس پسند نہ ہوں اور وجہ سے اپنی یہ خواہش پوری کرنے سے قاصر ہوں۔
اگر آپ کا شمار بھی اسی قبیل کے افراد میں ہوتا ہے تو یہ خوشخبری ہے کہ بغیر فضائی سفر کے دنیا کی سیر اب ٹرین سے بھی ممکن ہے۔
جی ہاں ایڈونچرز بائی ٹرین نامی کمپنی کی جانب سے 100 دن کے اندر دنیا کے مختلف مقامات کی سیر کے نئے اور منفرد تجربے کی پیشکش کی ہے۔
غیر ملکی میڈیا رپورٹ کے مطابق مذکورہ ٹور آپریٹر کمپنی ٹرین کےذریعے دنیا کی سیر کا آغاز آئندہ برس 17 مارچ 2026 سے کرے گی اور 12 افراد کو 100 دن میں دنیا کی سیر کرائے گی۔
اس دلچسپ سیاحت کے لیے سیاحت کے شوقین افراد کو اپنی جیب خالی کرنا ہوگی، کیونکہ فی فرد ٹکٹ کی قیمت ایک لاکھ 46 ہزار 184 ڈالرز (4 کروڑ پاکستانی روپے سے زائد) ہے۔
تاہم اگر کوئی جوڑا اس سفر کی بکنگ کراتا ہے تو فی کس ایک لاکھ 16 ہزار 468 ڈالرز ادا کرنا ہوں گے۔
کمپنی کے ڈائریکٹر جم لوتھ نے بتایا کہ اب زیادہ سے زیادہ افراد ماحول دوست انداز سے سفر کرنا چاہتے ہیں اور ان کی جانب سے طیاروں سے خارج ہونے والی کاربن ڈائی آکسائیڈ پر تحفظات کا اظہار کیا جاتا ہے۔
انہوں نے مزید بتایا کہ تو ہم دنیا کی سیر کے ایسے ماحول دوست طریقے کی پیشکش کر رہے ہیں جس کے لیے کسی پرواز میں سوار ہونے کی ضرورت نہیں۔
