کراچی: اے آر وائی فلمز کے زیر اہتمام بننے والی فلم ’دوبارہ پھر سے‘ کا کراچی میں شاندار پریمیئر منعقد کیا گیا۔ پریمیئر میں فلم کی کاسٹ سمیت متعدد فنکاروں نے شرکت کی۔

کراچی کے ایک سینما میں منعقد ہونے والے دوبارہ پھر سے کے پریمیئر میں مختلف فنکاروں نے بڑی تعداد میں شرکت کی۔ فنکاروں نے پاکستانی فلم انڈسٹری کی بحالی کے لیے اے آر وائی کی کوششوں کو سراہا۔

فلم کی ہدایت کاری کے فرائض جیکسن ہائیٹس اور رام چند پاکستانی جیسے منفرد پروجیکٹس کی ہدایت کار مہرین جبار نے ادا کیے ہیں۔

:ریویو

فلم کا آغاز حماد (عدیل حسین) سے ہوتا ہے جو ایک فیری پر ایک اجنبی لڑکی (حریم فاروق) کو دیکھ کر اس سے متاثر ہوجاتا ہے۔

اسی روز اس کے دوست ثمر (صنم سعید) اور واسع (علی کاظمی) اسے اپنے گھر پارٹی میں مدعو کرتے ہیں جہاں ثمر اسے اپنی دوست نتاشا (طوبیٰ صدیقی) سے ملواتی ہے۔ یہیں حماد کو وہ اجنبی لڑکی یعنی زینب بھی نظر آجاتی ہے اور ان کے درمیان شناسائی کا آغاز ہوتا ہے۔

زینب شادی شدہ ہوتی ہے اور اس کا شوہر (شاذ خان) اپنے باپ کی بے اعتنائی کا شکار ایک بد مزاج شخص ہوتا ہے۔ دونوں اس شادی سے خوش نہیں ہوتے اور فلم میں بہت جلدی ان کی علیحدگی دکھا دی گئی ہے تاہم اپنے بیٹے کے لیے وہ وقتاً فوقتاً ملاقات پر مجبور ہوتے ہیں جس کا اختتام ہر بار بدمزگی پر ہوتا ہے۔

دوسری طرف حماد زینب کو پسند کرنے لگتا ہے اور اس کے لیے وہ نتاشا سے بھی اپنا تعلق ختم کردیتا ہے، لیکن ان دونوں یعنی حماد اور زینب کا ملنا اتنا آسان نہیں ہے اور یہی مشکل پوری فلم پر محیط ہے۔

فلم میں تمام کرداروں نے بہترین اداکاری کا مظاہرہ کیا ہے۔ حریم فاروق پاکستانی انڈسٹری کی ابھرتی ہوئی اداکارہ ہیں جو مختلف ڈراموں میں بھی اپنی اداکاری کے جوہر دکھا چکی ہیں۔

صنم سعید کی اداکاری میں بھی کوئی کلام نہیں، ان کے ڈرامے نہ صرف پاکستان بلکہ بھارت میں بھی بے حد پسند کیے گئے۔

اسی طرح علی کاظمی اور عدیل حسین نے بھی شاندار اداکاری کا مظاہرہ کیا اور یہ فلم ان کے کیریئر کو بلندی پر پہنچانے کا ذریعہ ثابت ہوگی۔

فلم کا بہترین حصہ اس کی موسیقی ہے جو شیراز اپل نے ترتیب دی ہے۔ فلم میں بھارتی گلوکارہ ریکھا بھردواج کی آواز میں گایا ہوا گانا بھی شامل ہے۔

فلم دوبارہ پھر سے مجموعی طور پر پاکستانی فلم انڈسٹری کا ایک بہترین اضافہ ہے۔ فلم کو 25 نومبر کو ریلیز کردیا جائے گا۔

اے آر وائی فلمز کے زیر اہتمام بننے والی فلم ’دوبارہ پھر سے‘ کی ٹیم آج کل اپنے مداحوں کی جانب سے دیے گئے چیلنجز کو پورا کر رہی ہے۔ یہ چیلنجز فلم کی تشہیری مہم کے لیے ’ٹرتھ اور ڈیئر‘ کا حصہ ہیں جس میں مداح ان سے مختلف سوالات پوچھ رہے ہیں یا انہیں کوئی ٹاسک دے رہے ہیں۔

کراچی کے ایک شاپنگ مال میں اس وقت دلچسپ صورتحال پیش آئی جب فلم کے مرکزی کرداروں میں سے ایک صنم سعید نے مرکزی دروازے پر کھڑے ہوکر آنے والے افراد کو سلام کرنا شروع کردیا۔

یہ ٹاسک دراصل ان کے مداح اور پاکستانی نژاد امریکی گلوکار شاذ خان کی جانب سے دیا گیا ہے جس کے تحت انہیں گارڈ کے ساتھ کھڑے ہو کر اندر آنے والے افراد کو سلام کرنا ہے۔

اسی طرح ماڈل نادیہ حسین نے پوری ٹیم کو گینگنم اسٹائل میں ڈانس کرنے کا ٹاسک دیا جسے ٹیم نے بخوبی پورا کیا۔

فلم کے مرکزی کرداروں میں شامل حریم فاروق نے اپنے ساتھی اداکار علی کاظمی کو فلم ’لاہور سے آگے‘ کے گانے ’قلاباز دل‘ پر ڈانس کرنے کا ٹاسک دیا۔

عدیل حسین کو بغیر پانی کے سبز مرچیں کھانے کا ٹاسک دیا گیا جو انہوں نے ہزار دقت کے ساتھ پورا کر ہی لیا۔

اداکارہ طوبیٰ صدیقی نے ایک مداح کی جانب سے دیے گئے آئس بکٹ چیلنج کو پورا کیا۔

رومانس، ڈرامہ اور کامیڈی کے عناصر پر مشتمل فلم ’دوبارہ پھر سے‘ 25 نومبر کو سینما گھروں میں نمائش کے لیے پیش کردی جائے گی۔

اے آر وائی فلمز کے زیر اہتمام بننے والی فلم ’دوبارہ پھر‘ سے کا ایک اور گانا ’لڑ گیاں‘ جاری کردیا گیا ہے۔ گانے میں شاندار مناظر اور رقص پیش کیا گیا ہے۔

معروف ہدایت کار مہرین جبار کی ہدایت کاری میں بننے والی فلم ’دوبارہ پھر سے‘ اے آر وائی فلمز کی کاوش ہے اور اس کے پروڈیوسر اے آر وائی کے سربراہ سلمان اقبال ہیں۔

اس سے قبل فلم کا ٹائٹل سونگ بھی جاری کیا جا چکا ہے جسے شائقین کی جانب سے بے حد پذیرائی حاصل ہوئی۔

فلم کے دوسرے گانے ’لڑ گیاں‘ کو شیراز اپل اور زرش حفیظ نے گایا ہے جبکہ اس کی شاعری شکیل سہیل کی تخلیق کردہ ہے۔

رنگوں اور رقص سے بھرپور یہ گانا پاکستانی میوزک انڈسٹری میں ایک بہترین اضافہ ثابت ہوگا۔

فلم کے مرکزی کرداروں میں عدیل حسین، علی کاظمی، حریم فاروق اور صنم سعید شامل ہیں جبکہ دیگر کرداروں میں طوبیٰ صدیقی، شاذ خان اور عتیقہ اوڈھو اپنی اداکاری کے جوہر دکھائیں گے۔ فلم میں رومانس، ڈرامہ اور کامیڈی کے عناصر شامل ہیں۔

فلم ’دوبارہ پھر سے‘ 25 نومبر کو سینما گھروں میں نمائش کے لیے پیش کردی جائے گی۔

اب آپ اپنے پسندیدہ اداکاروں سے کوئی بھی سوال پوچھ سکتے ہیں یا انہیں کوئی بھی چیلنج دے سکتے ہیں۔

اے آر وائی فلمز کے زیر اہتمام بننے والی فلم ’دوبارہ پھر سے‘ کی ٹیم نے اپنے پرستاروں کو دعوت دی ہے کہ وہ ان سے کوئی سوال پوچھیں یا انہیں کوئی چیلنج دیں۔

اس کے لیے فیس بک پر اے آر وائی فلمز کا آفیشل صفحہ لائیک کریں۔ اپنی 30 سیکنڈ کی ویڈیو صفحہ کو بھیجیں جس میں آپ اپنے پسندیدہ اداکار سے کوئی بھی سوال پوچھ سکتے ہیں یا انہیں چیلنج کر سکتے ہیں۔

اپنا نام بتائیں اور اس اداکار کا نام بتائیں جسے آپ چیلنج کرنا چاہتے ہیں۔ آپ کے پسندیدہ اداکار آپ کو جواب دیں گے۔

معروف ہدایت کار مہرین جبار کی ہدایت کاری میں بننے والی فلم ’دوبارہ پھر سے‘ اے آر وائی فلمز کی کاوش ہے اور اس کے پروڈیوسر اے آر وائی کے سربراہ سلمان اقبال ہیں۔

فلم کے مرکزی کرداروں میں عدیل حسین، علی کاظمی، حریم فاروق اور صنم سعید شامل ہیں جبکہ دیگر کرداروں میں طوبیٰ صدیقی، شاذ خان اور عتیقہ اوڈھو اپنی اداکاری کے جوہر دکھائیں گے۔ فلم میں رومانس، ڈرامہ اور کامیڈی کے عناصر شامل ہیں۔

فلم ’دوبارہ پھر سے‘ 25 نومبر کو سینما گھروں میں نمائش کے لیے پیش کردی جائے گی۔