پاکستان اور جنوبی افریقہ کے درمیان سیریز کا آغاز منگل 10 دسمبر سے ہو رہا ہے پروٹیز اسپنر تبریز شمسی نے پاکستانی بلے باز کو نشانے پر رکھ لیا ہے۔
پاکستان اور جنوبی افریقہ کے درمیان کل سے ٹی ٹوئنٹی سیریز کا آغاز ہو رہا ہے۔ وکٹ کیپر بیٹر محمد رضوان ٹیم گرین شرٹس کی قیادت کر رہے ہیں۔ محمد رضوان، صائم ایوب، عبداللہ شفیق کی حالیہ پرفارمنس اچھی ہے تاہم اسٹار بیٹر بابر اعظم کی طویل عرصے سے فارم غائب ہے اور ان کا بلا رنز نہیں بنا پا رہا ہے۔
تاہم جنوبی افریقی اسپنرز تبریز شمسی خراب فارم کے باوجود بابراعظم کو سب سے بڑا خطرہ سمجھتے ہیں اور ان کا کہنا ہے کہ سیریز میں ان کا بڑا ہدف بابر اعظم ہوں گے۔
ایک کرکٹ ویب سائٹ کو انٹرویو میں تبریز شمسی نے کہا کہ وہ ہوم سیریز کے دوران عظیم پاکستانی بیٹر کو قابو کرنے کی حکمت عملی اینالسٹ کے ساتھ بیٹھ کر بنائیں گے۔
تبریز شمسی نے کہا کہ بابر اعظم عظیم کھلاڑی ہیں۔ ان کو آؤٹ کرنے کی اب تک کوئی پلاننگ نہیں بنائی مگر میں ان کے خلاف پہلے بھی کھیل چکا ہوں، اسلیے ذہن میں آئیڈیا ہے کہ کیا کرنا ہوگا تاہم حتمی حکمت عملی اینالسٹ کے ساتھ بیٹھ کر ہی بناؤں گا۔
تبریز شمسی نے جنوبی افریقی بورڈ کے معاہدے کو قبول نہیں کیا اور اب وہ بطور فری لانسر کرکٹ کھیل رہے ہیں۔
اس حوالے سے ان کا کہنا تھا کہ فری لانس ایک ذاتی انتخاب تھا جو میں نے مختلف وجوہات کی بنا پر کیا، لیکن جنوبی افریقہ کی نمائندگی ہمیشہ اولین ترجیح رہی ہے اور اپنے ملک کے لیے کھیلنا سب سے زیادہ اہم ہے۔
واضح رہے کہ پاکستان تین ٹی ٹوئنٹی، تین ون ڈے اور دو ٹیسٹ میچز کی سیریز کھیلنے جنوبی افریقہ پہنچ چکی ہے اور سیریز کا آغاز کل سے ہو رہا ہے۔
