سعودی وزیر سرمایہ کاری نے وزیراعظم شہباز شریف سے گفتگو میں کہا ہے کہ ہم سب آپ کی کارکردگی اور کام کرنے کی رفتار سے آگاہ ہیں۔
تفصیلات کے مطابق وزیراعظم پاکستان شہباز شریف سعودی عرب کے دورے پر ہیں جہاں ان سے سعودی وزیر سرمایہ کاری اور وزیر خزانہ نے ملاقات کی۔ ملاقات میں سعودی وزیر سرمایہ کاری نے ان کی کام کرنے کی رفتار کو سراہاتے ہوئے کہا کہ آپ پاکستان کی ترقی کے مشن کو لے کر چل رہے ہیں۔
وزیراعظم سے سعودی وزیر صنعت بندر بن ابراہیم الخیریف نے بھی ملاقات کی، ملاقاتیں عالمی اقتصادی فورم کے خصوصی اجلاس کی سائیڈ لائینز پر ہوئیں۔
وزیراعظم نے پاکستان کا ہرمشکل میں ساتھ دینے پر سعودی قیادت کا شکریہ ادا کیا۔ شہباز شریف نے کہا کہ سعودی عرب کی حمایت اور مدد کی بدولت ہمارے معاشی حالات بہتر ہوئے، سعودی عرب اور پاکستان ایک دوسرے کے اسٹریٹجک پارٹنرز ہیں۔
خالد آل فالیح نے وزیراعظم سے گفتگو کرتے ہوئے کہا کہ ہم سب آپ کے ساتھ ہیں، آپ کا مشن ہمارا مشن ہے۔ سعودی وزیر سرمایہ کاری نے کہا کہ سعودی سرمایہ کاروں کا وفد جلد پاکستان کا دورہ کرے گا۔
وزیرسرمایہ کاری خالد آل فالیح نے کہا کہ سرمایہ کاری کیلئے پاکستان ہماری ترجیح ہے۔ زراعت، آئی ٹی اور توانائی کے شعبے میں بھرپور تعاون جاری رہے گا۔
انھوں نے کہا کہ پاکستانیوں نے سعودی عرب کی ترقی میں نمایاں کردارادا کیا، سعودی عرب پاکستان میں سرمایہ کاری کے مزید مواقع تلاش کرے گا۔
سعودی وزیر خزانہ نے پاکستان کی اقتصادی ترقی کے لیے اپنی حمایت کا اعادہ کیا، انھوں نے کہا کہ پاکستان کی ترقی سعودی عرب کی ترقی ہے، سعودی عرب نے ویژن 2030 کیلئے مشکل فیصلے کیے ہیں۔
سعودی وزیر صنعت کی جانب سے زراعت، معدنیات، آئی ٹی اور دیگر شعبوں میں دلچسپی کا اظہار کیا گیا، انھوں نے کہا کہ سعودی کمپنیوں سے پاکستان میں سرمایہ کاری کیلئے رابطے میں ہوں،
بندربن ابراہیم الخیریف نے کہا کہ سعودی نجی کمپنیاں بہت جلد پاکستان کا دورہ کریں گی، نجی شعبوں کے درمیان اشتراک ہماری اولین ترجیح ہے۔
