بیجنگ : وزیر خارجہ وانگ یی کےدورہ پاکستان پر چینی دفترخارجہ نے بیان میں کہا کہ عالمی منظرنامہ کچھ بھی ہو، پاک چین دوستی لازوال رہے گی۔
چین کے وزیر خارجہ وانگ یی کے دورۂ پاکستان پر بیجنگ کی جانب سے اہم بیان سامنے آیا ہے، چینی دفترِ خارجہ کے ترجمان نے کہا ہے کہ عالمی منظرنامہ خواہ کچھ بھی ہو، پاکستان اور چین کی روایتی دوستی لازوال، غیر متزلزل اور ناقابلِ تسخیر رہے گی۔
ترجمان کا کہنا تھا کہ چین ہمیشہ پاکستان کا انتہائی قابلِ بھروسہ اور مضبوط دوست رہا ہے۔
اسلام آباد میں وزیرِاعظم شہباز شریف اور چینی وزیرِ خارجہ وانگ یی کی ملاقات بھی ہوئی جس میں دوطرفہ تعلقات اور تعاون کے مختلف پہلوؤں پر تبادلۂ خیال کیا گیا۔
وزیراعظم شہباز شریف نے اسلام آباد میں ایک تقریب سے خطاب کرتے ہوئے کہا تھا کہ وہ جلد چین کا دورہ کریں گے جس کا مقصد پاکستان میں سرمایہ کاری اور جدید ٹیکنالوجی لانا ہے تاکہ ملک کو اس سمت لے جایا جا سکے جہاں آئندہ قرض لینے کی ضرورت نہ پڑے۔
مزید پڑھیں : فیلڈ مارشل سے چینی وزیر خارجہ کی اہم ملاقات
انھوں نے بتایا تھا کہ چین سے 300 پاکستانی ایگری گریجویٹس کا پہلا بیج جدید تربیت حاصل کرکے وطن واپس آ گیا ہے۔ ان طلبہ کا انتخاب چاروں صوبوں سے میرٹ پر کیا گیا جبکہ بلوچستان کا حصہ 10 فیصد زیادہ رکھا گیا۔
ان کا کہنا تھا کہ میرٹ پر منتخب ایک ہزار طلبہ کو چین بھیجا جائے گا، جو زراعت اور لائیو اسٹاک کے شعبوں میں جدید تربیت حاصل کریں گے۔ شہباز شریف کے مطابق یہ طلبہ چینی ٹیکنالوجی کے ذریعے پاکستان کی معیشت اور ترقی میں اہم کردار ادا کریں گے۔
خیال رہے دورہ پاکستان کے دوران وزیر خارجہ وانگ یی نے پاکستانی صدر آصف علی زرداری، وزیر اعظم شہباز شریف اور چیف آف آرمی سٹاف عاصم منیر سے ملاقات کی اور نائب وزیر اعظم اور وزیر خارجہ محمد اسحاق ڈار کے ساتھ مل کر چین پاکستان وزرائے خارجہ اسٹریٹجک ڈائیلاگ کے چھٹے دور کی شریک صدارت کی۔
