Tag: دورہ چین

  • چینی صدر کا پاکستان کی خود مختاری اور علاقائی سالمیت کی غیر متزلزل حمایت کا اعادہ: اعلامیہ

    چینی صدر کا پاکستان کی خود مختاری اور علاقائی سالمیت کی غیر متزلزل حمایت کا اعادہ: اعلامیہ

    بیجنگ: وزیر اعظم عمران خان اور چینی صدر شی جن پنگ کے درمیان ملاقات کا اعلامیہ جاری کردیا گیا، ملاقات میں چینی صدر نے پاکستان کی خود مختاری اور علاقائی سالمیت کی غیر متزلزل حمایت کا اعادہ کیا۔

    تفصیلات کے مطابق وزیر اعظم عمران خان اور چینی صدر شی جن پنگ میں ملاقات کا اعلامیہ جاری کردیا گیا، اعلامیے کے مطابق چینی صدر نے وزیر اعظم عمران خان اور وفد کے اعزاز میں ظہرانہ دیا۔ آرمی چیف جنرل قمر جاوید باجوہ، ڈی جی آئی ایس آئی، وزیر خارجہ، وزیر منصوبہ بندی، وزیر ریلوے اور مشیر تجارت بھی موجود تھے۔

    اعلامیے کے مطابق وزیر اعظم عمران خان نے مقبوضہ کشمیر میں بھارتی جارحیت سے بھی آگاہ کیا۔ ملاقات میں وزیر اعظم نے خطے میں امن کے لیے فوری طور پر مقبوضہ وادی سے کرفیو اٹھانے پر زور دیا۔

    وزیر اعظم نے کہا کہ بھارت مقبوضہ کشمیر سے فوری طور پر کرفیو اٹھائے۔ بھارت نے مقبوضہ کشمیر میں انسانیت سوز صورتحال پیدا کر رکھی ہے۔

    اعلامیے کے مطابق وزیر اعظم کا کہنا تھا کہ مقبوضہ کشمیر میں لاکھوں لوگوں کا لاک ڈاؤن جاری ہے، کشمیر میں انسانی بحران جنم لے رہا ہے۔ اہم قومی امور پر چین نے ہمیشہ پاکستان کی حمایت کی۔ پاکستان کی اقتصادی ترقی میں چین کا کردار اہم ہے، سی پیک کی جلد تکمیل ہماری پہلی ترجیح ہے۔

    وزیر اعظم عمران خان نے چین کو تمام اہم امور پر مکمل حمایت کے عزم کا اعادہ کیا۔

    ملاقات میں چینی صدر نے سماجی و معاشی ترقی پر مبنی حکومتی ایجنڈے کو بھی سراہا۔ چینی صدر کا کہنا تھا کہ چین کے پاکستان کے ساتھ تعلقات مضبوط اور مستحکم ہیں۔

    اعلامیے کے مطابق دونوں ممالک کے مابین تعلقات مزید مضبوط اور وسیع تر کرنے پر اتفاق ہوا۔ صدر شی جن پنگ نے سی پیک منصوبوں میں تیزی لانے پر پاکستان کی کوششوں کو سراہا۔ انہوں نے کہا کہ سی پیک سے قومی و علاقائی معاشی ترقی کے عمل میں مدد ملے گی۔

    چینی صدر نے دہشت گردی کے خلاف جنگ میں پاکستان کی کوششوں کی تعریف کی۔ انہوں نے کہا کہ معاشی اصلاحات سے پاکستان مستحکم معاشی ترقی کی راہ پر گامزن ہے۔

    چینی صدر نے پاکستان کی خود مختاری اور علاقائی سالمیت کی غیر متزلزل حمایت کا اعادہ بھی کیا۔ دونوں رہنماؤں نے افغان مسئلے کے پر امن حل پر اتفاق کیا۔

    ملاقات میں دونوں ممالک کے درمیان مختلف شعبوں میں تعاون پر اظہار اطمینان کیا گیا جبکہ دونوں ممالک کے درمیان اعلیٰ سطحی روابط کے مزید فروغ پر بھی اتفاق ہوا۔

  • پاک چین دوستی امن و ترقی کی علامت ہے: فردوس عاشق اعوان

    پاک چین دوستی امن و ترقی کی علامت ہے: فردوس عاشق اعوان

    اسلام آباد: وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ پاک چین دوستی خطے اور دنیا میں ایک مثال اور امن و ترقی کی علامت ہے۔ دونوں ممالک کے رہنماؤں کی ملاقات دو طرفہ تعاون میں مزید وسعت کا باعث بنے گی۔

    تفصیلات کے مطابق وزیر اعظم کی معاون خصوصی برائے اطلاعات و نشریات فردوس عاشق اعوان نے سماجی رابطے کی ویب سائٹ ٹویٹر پر اپنے ٹویٹ میں کہا کہ چین کے وزیر اعظم لی کی چیانگ اور وزیر اعظم عمران خان کا گرمجوشی کا انداز آئرن برادرز کی عظیم دوستی کا مظہر ہے۔

    فردوس عاشق اعوان کا کہنا تھا کہ یہ دوستی خطے اور دنیا میں ایک مثال اور امن و ترقی کی علامت ہے۔ وزیر اعظم عمران خان کا عظیم عوامی ہال آمد پر چین کے وزیر اعظم کی جانب سے پرتپاک استقبال دونوں سدا بہار دوستوں کے لازوال اور گہرے رشتے کا درخشاں باب ہے۔

    انہوں نے کہا کہ دونوں رہنماؤں کی ملاقات مختلف شعبوں میں دو طرفہ تعاون میں مزید وسعت کا باعث بنے گی۔ چینی وزیر اعظم نے عمران خان کے سی پیک منصوبوں پر تیز رفتاری سے تکمیل کے عزم اور پیشرفت پر شکریہ ادا کیا۔

    اپنے ٹویٹ میں معاون خصوصی کا کہنا تھا کہ سی پیک اتھارٹی کا قیام اس امر کا ثبوت ہے کہ حکومت سی پیک منصوبوں پر تیز تر اور مؤثر عمل درآمد کو یقینی بنانے کے لیے پرعزم ہے۔

    انہوں نے مزید کہا کہ وزیر اعظم کا ملاقات میں مقبوضہ جموں کشمیر میں انسانی حقوق کی سنگین صورتحال اور انسانی بحران پر گفتگو آئینہ دار ہے کہ عمران خان ہر محاذ پر کشمیریوں کے حق کے لیے ڈٹ کر کھڑے ہیں۔

  • چین کا دورہ سفارتی لحاظ سے کامیاب رہا ہم مطمئن لوٹ رہے ہیں: وزیر خارجہ

    چین کا دورہ سفارتی لحاظ سے کامیاب رہا ہم مطمئن لوٹ رہے ہیں: وزیر خارجہ

    اسلام آباد: وزیر خارجہ شاہ محمود قریشی کا کہنا ہے کہ چین کا دورہ سفارتی لحاظ سے کامیاب رہا ہم مطمئن لوٹ رہے ہیں، کوئی بھی تیسرا پاکستان اور چین کے تعلقات پر اثر انداز نہیں ہوسکتا۔

    تفصیلات کے مطابق وزیر خارجہ شاہ محمود قریشی نے اے آر وائی نیوز سے خصوصی گفتگو کرتے ہوئے کہا کہ دورہ چین کی اہمیت سے سب واقف ہیں، چین میں دونوں نشستیں مکمل ہوچکی ہیں، کل چینی وزیر اعظم سے دو طرفہ تعلقات پر بات ہوئی۔

    وزیر خارجہ کا کہنا تھا کہ چینی وزیر اعظم سے سی پیک منصوبوں اور اقتصادی ترقی پر بات ہوئی، چینی وزیر اعظم کل کی ملاقات میں مطمئن اور خوش نظر آئے۔ آج چینی صدر سے دوسری نشست ہوئی۔

    انہوں نے کہا کہ آج علاقائی اور اسٹریٹجک صورتحال پر بات ہوئی، چینی صدر سے نشست میں مقبوضہ کشمیر کی صورتحال پر بات ہوئی۔ چین نے پاکستان کے مؤقف کو تسلیم کیا جس پر ان کا شکریہ ادا کیا۔ چین کو بھی بھارت کے 5 اگست کے اقدامات سے بہت اعتراضات ہیں۔

    وزیر خارجہ کا کہنا تھا کہ مجھے یقین ہے چینی صدر کے دورہ بھارت میں اس پر بات ہوگی، چینی صدر پاکستان کا نقطہ نظر پوری طرح سمجھ چکے ہیں۔ وزیر اعظم عمران خان نے چینی صدر کو ہماری قومی امنگوں کا احساس دلایا۔ کوئی بھی تیسرا پاکستان اور چین کے تعلقات پر اثر انداز نہیں ہوسکتا۔

    انہوں نے کہا کہ چینی صدر نے دورہ بھارت سے پہلے ہمیں اعتماد میں لیا، وزیر اعظم عمران خان نے پاکستانی مؤقف پر اعتماد میں لیا۔ چین کا دورہ سفارتی لحاظ سے کامیاب رہا ہم مطمئن لوٹ رہے ہیں۔

    وزیر خارجہ کا مزید کہنا تھا کہ مختلف چینی سرمایہ کاروں سے بات ہوئی ہے، چینی بزنس مینوں کو سرمایہ کاری کے فوائد سے آگاہ کیا۔ پاکستان میں سرمایہ کاری کے لحاظ سے کافی پیش رفت ہوئی ہے۔

  • پاک چین وزرائے اعظم ملاقات، چین کا پاکستان کے اہم مسائل پر تعاون کے عزم کا اعادہ

    پاک چین وزرائے اعظم ملاقات، چین کا پاکستان کے اہم مسائل پر تعاون کے عزم کا اعادہ

    بیجنگ: وزیر اعظم عمران خان نے چینی وزیر اعظم سے ملاقات کی، ملاقات کے بعد اعلامیہ جاری کیا گیا، جس میں کہا گیا ہے کہ چینی وزیر اعظم نے پاکستان کے اہم مسائل پر تعاون کے عزم کا اعادہ کیا۔

    تفصیلات کے مطابق آج وزیر اعظم عمران خان نے چینی وزیر اعظم سے ملاقات کی، انھوں نے کہا پاک چین شراکت داری بنیادی مفادات کو تحفظ فراہم کرتی ہے، یہ شراکت داری خطے میں امن، ترقی اور استحکام کی ضامن ہے۔

    وزیر اعظم عمران خان کا کہنا تھا سی پیک منصوبوں کی بر وقت تکمیل حکومت کی اوّلین ترجیح ہے، سی پیک پاکستان کی اقتصادی ترقی اور خطے میں خوش حالی کا سبب ہے۔

    چینی وزیر اعظم لی کے چیانگ نے اس موقع پر کہا کہ سی پیک کا دوسرا مرحلہ چینی سرمایہ کاری کی نئی راہیں کھولے گا، اور معیشت مستحکم کرنے میں معاون ثابت ہوگا۔

    یہ بھی پڑھیں:  وزیراعظم عمران خان کی چین کے گریٹ ہال آمد پر شاندار استقبال

    دریں اثنا وزیر اعظم عمران خان نے چینی ہم منصب کو دورہ پاکستان کی دعوت دی، اس سے قبل وزیر اعظم عمران خان کی چین کے گریٹ ہال آمد پر شان دار استقبال کیا گیا اور انھیں گارڈ آف آنر پیش کیا گیا۔

    ملاقات کے اعلامیے میں کہا گیا ہے کہ دونوں ممالک میں دو طرفہ تعلقات کے فروغ سمیت اقتصادی شراکت داری کو مزید مضبوط بنانے پر تبادلہ خیال کیا گیا، وزیر اعظم نے چینی ہم منصب کو سی پیک منصوبوں اور گوادر کے ترقیاتی کاموں میں میں تیزی سے متعلق آگاہ کیا۔

    ملاقات میں معاشی اور اقتصادی شعبوں میں مضبوطی کے لیے مختلف معاہدوں پر بھی دستخط کیے گئے، دونوں رہنماؤں نے ریلویز، اسٹیل، آئل اینڈ گیس اور سائنس و ٹیکنالوجی میں تعاون بڑھانے پر گفتگو کی، دو طرفہ حکمت عملی پر مبنی شراکت داری کو نئی بلندیوں تک پہنچانے کا عزم کیا گیا۔

    دونوں ملکوں کے درمیان عوامی رابطوں کو تقویت دینے کےعزم کا بھی اظہار کیا گیا، دریں اثنا، چینی وزیر اعظم نے سی پیک منصوبوں کو آگے بڑھانے پر عمران خان کا شکریہ ادا کیا۔

    اس موقع پر آرمی چیف جنرل قمر جاوید باجوہ، ڈی جی آئی ایس آئی بھی موجود تھے، دو طرفہ مذاکرات کے بعد چینی وزیر اعظم نے گریٹ ہال میں ظہرانہ دیا۔ جب کہ وزیر اعظم عمران خان نے چین کے 70 ویں قومی دن پر مبارک باد پیش کی۔

  • چین کو بھرپور سیکیورٹی کی یقین دہانی کرائی گئی ہے: شاہ محمود قریشی

    چین کو بھرپور سیکیورٹی کی یقین دہانی کرائی گئی ہے: شاہ محمود قریشی

    بیجنگ: وزیر خارجہ پاکستان شاہ محمود قریشی نے کہا ہے کہ پاکستان اور چین کے تعلقات بہترین ہیں، چین کو بھرپور سیکیورٹی کی یقین دہانی کرائی گئی ہے، سی پیک کے تحت کام کرنے والے چینی باشندوں کی سیکیورٹی ہماری ذمہ داری ہے۔

    ان خیالات کا اظہار انھوں نے بیجنگ میں پریس کانفرنس میں کیا، شاہ محمود نے کہا وزیر اعظم عمران خان کا چین کا یہ تیسرا دورہ ہے، پاکستان کا چین کے ساتھ اعتماد کا رشتہ ہے، چین نے وزیر اعظم کا بڑی گرم جوشی سے استقبال کیا۔

    وزیر خارجہ کا کہنا تھا ہم اہم علاقائی اور عالمی امور پر ایک دوسرے کو اعتماد میں لیتے ہیں، سی پیک سے نہ صرف پاکستان اور چین بلکہ خطہ بھی مستفید ہوگا، چین کو اس سلسلے میں بھرپور سیکیورٹی کی یقین دہانی کرائی گئی ہے۔

    تازہ ترین:  چاہتے ہیں چینی سرمایہ کار پاکستان آئیں اور منافع حاصل کریں: وزیر اعظم

    شاہ محمود قریشی نے کہا سی پیک کے تحت کام کرنے والے چینی باشندوں کی سیکیورٹی ہم پر لازم ہے، چینی اعلیٰ قیادت کو بتایا اب سی پیک اتھارٹی قائم کرنی ہے، چینی سرمایہ کاروں کو پاکستان آنے کی بھی دعوت دی۔

    واضح رہے کہ وزیر اعظم عمران خان وفد کے ہم راہ چین کے تیسرے دورے پر بیجنگ میں ہیں، آج انھوں نے پاک چین تجارت و سرمایہ کاری کانفرنس سے خطاب میں کہا چینی سرمایہ کار پاکستان آئیں اور منافع حاصل کریں، چین نے اپنی غلطیوں سے سبق سیکھا، ہم بھی سیکھ رہے ہیں۔

  • وزیر اعظم  عمران خان کے دورہ چین سے سی پیک پر کام کی رفتار بڑھے گی، تاجر رہنما

    وزیر اعظم عمران خان کے دورہ چین سے سی پیک پر کام کی رفتار بڑھے گی، تاجر رہنما

    وزیر اعظم عمران خان کے چین کے دورے سے دونوں ممالک کے مابین تعلقات کے نئے دور کا آغاز ہو گا جبکہ دنیا کے سب سے بڑے ترقیاتی منصوبے سی پیک پر کام کی رفتار بڑھ جائے گا۔

    یہ بات اسلام آباد چیمبر کے سابق صدر شاہد رشید بٹ نے اپنے ایک بیان میں کہی، انہوں نے کہا کہ وزیر اعظم کے چین کے دورے کا مرکزی نقطہ سی پیک پر کام کی رفتار بڑھانا ہے جو حکومت کی مالی مشکلات اور بیوروکریسی کی سستی کی وجہ سے متاثر ہوا ہے۔

    شاہد رشید بٹ کا مزید کہنا تھا کہ بیوروکریسی نیب سے خوفزدہ ہے جس کی وجہ سے ملک بھر کی معیشت کی طرح سی پیک پر بھی کام کی رفتار متاثر ہوئی۔

    انھوں نے کہا کہ آرمی چیف جنرل قمر جاوید باجوہ، وزیر اعظم عمران خان اور سینیٹ کی قائمہ کمیٹی برائے تجارت کے سربراہ مرزا محمد آفریدی کی جانب سے کاروباری برادری کی حوصلہ افزائی او ران کے اعتماد کی بحالی کی کوششیں قابل قدر ہیں۔

     ان کی بے اطمینانی کی وجہ سے معیشت کی افزائش بری طرح متاثر ہوئی ہے جس سے لاکھوں افراد بے روزگار اور بہت سے فیکٹریاں بند ہو گئی ہیں۔

    مزید پڑھیں : وزیراعظم عمران خان چین کے تین روزہ دورے پر روانہ ہوگئے

    واضح رہے کہ ملک کی خوشحالی، خطے کے امن اور مسئلہ کشمیر کو عالمی فورم پر اجاگر کرنے کے مشن پر وزیراعظم عمران خان آج تین روزہ دورے کیلئے چین کیلئے روانہ ہوگئے۔

    دورے کے دوران معیشت اور اقتصادیات کے ساتھ مسئلہ کشمیر بھی زیربحث آئے گا، اس حوالے سے ذرائع کا کہنا ہے کہ دورہ چین میں ایم ایل ون کا بھی فیصلہ ہوگا، معیشت اور اقتصادیات کے ساتھ مسئلہ کشمیر بھی زیربحث آئے گا، اس دوران معیشت سے متعلق اہم فیصلے ممکن ہیں۔

  • وزیراعظم عمران خان آج تین روزہ دورے پر چین جائیں گے

    وزیراعظم عمران خان آج تین روزہ دورے پر چین جائیں گے

    اسلام آباد: وزیراعظم عمران خان آج تین روزہ دورے پر چین جائیں گے، اس دوران معیشت اور اقتصادیات کے ساتھ مسئلہ کشمیر بھی زیربحث آئے گا۔

    تفصیلات کے مطابق دورہ چین کے موقع پر وفاقی وزرا شاہ محمود قریشی، عبدالحفیظ شیخ، شیخ رشید اور خسروبختیار بھی وزیراعظم عمران خان کے ہمراہ ہوں گے۔

    دورہ چین میں ایم ایل ون کا بھی فیصلہ ہوگا، معیشت اور اقتصادیات کے ساتھ مسئلہ کشمیر بھی زیربحث آئے گا، اس دوران معیشت سے متعلق اہم فیصلے ممکن ہیں۔

    وزیراعظم کے دورہ چین میں متعدد مفاہمتی یادداشتوں پر بھی دستخط ہوں گے جبکہ وہ چینی صدر شی جن پنگ سمیت اعلیٰ قیادت سے ملاقات کریں گے۔

    وزیراعظم کے دورہ چین میں پاک چین جوائنٹ کوآرڈی نیشن کمیٹی کےامور بھی زیر غور آئیں گے جبکہ عمران خان کی جمعرات کو وطن واپسی ہوگی۔

    وزیراعظم عمران خان کے دورہ چین کو حتمی شکل دے دی گئی

    یاد رہے چند روز قبل وزیراعظم عمران خان اعلیٰ سطح اجلاس کی صدارت کرتے ہوئے کہا تھا کہ سی پیک منصوبہ پاک چین دوستی کامظہر ہے، سی پیک کےتحت جاری منصوبوں میں رکاوٹیں دور کررہے ہیں, منصوبوں کی بروقت تکمیل حکومت کی اولین ترجیح ہے۔

    وزیراعظم کا کہنا تھا کہ آئندہ چند روز میں چین کا دورہ کروں گا، دورے میں چینی قیادت سے ملاقاتیں ہوں گی، ملاقاتیں پاک چین دوستی مزید مستحکم کرنے میں مدد گار ہوں گی، اہم دورہ دوطرفہ تعاون کو فروغ دینے میں معاون ثابت ہوگا۔

  • وزیراعظم عمران خان کے دورہ چین کو حتمی شکل دے دی گئی

    وزیراعظم عمران خان کے دورہ چین کو حتمی شکل دے دی گئی

    اسلام آباد : وزیراعظم عمران خان کے دورہ چین میں  تین وفاقی وزرا اور ایک مشیر ان  کے ہمراہ جائیں گے ، وزیراعظم پیر کی رات دورہ چین کےلئے روانہ ہوں گے۔

    تفصیلات کے مطابق وزیراعظم عمران خان کے دورہ چین کو حتمی شکل دے دی گئی ہے، عمران خان کے ہمراہ تین وفاقی وزرا اور ایک مشیر ہوں گے ، جن میں وزیر خارجہ شاہ محمود قریشی، وزیر ریلوے شیخ رشید، وزیرمنصوبہ بندی خسروبختیار اور مشیر خزانہ عبدالحفیظ شیخ شامل ہیں۔

    وزیراعظم عمران خان پیر کی رات دورہ چین کے لئے روانہ ہوں گے ، دورے کے دوران پیک ایم ایل ون اور دیگر اہم معاملات پر ملاقاتیں ہوں گی اور مسئلہ کشمیر کے حوالے سے بھی چینی حکام سے بات چیت ہوگی۔

    وزیراعظم کے دورہ چین میں متعدد مفاہمتی یادداشتوں پر بھی دستخط ہوں گے جبکہ وہ چینی صدر شی جن پنگ سمیت اعلیٰ قیادت سے ملاقات کریں گے۔

    وزیراعظم کے دورہ چین میں پاک چین جوائنٹ کوآرڈی نیشن کمیٹی کےامور بھی زیر غور آئیں گے جبکہ عمران خان کی جمعرات کو وطن واپسی ہوگی۔

    مزید پڑھیں : سی پیک منصوبہ پاک چین دوستی کا مظہر ہے، وزیر اعظم عمران خان

    یاد رہے چند روز قبل وزیراعظم عمران خان اعلیٰ سطح اجلاس کی صدارت کرتے ہوئے کہا تھا کہ سی پیک منصوبہ پاک چین دوستی کامظہر ہے، سی پیک کےتحت جاری منصوبوں میں رکاوٹیں دور کررہے ہیں, منصوبوں کی بروقت تکمیل حکومت کی اولین ترجیح ہے۔

    وزیراعظم کا کہنا تھا کہ آئندہ چند روز میں چین کا دورہ کروں گا، دورے میں چینی قیادت سے ملاقاتیں ہوں گی، ملاقاتیں پاک چین دوستی مزید مستحکم کرنے میں مدد گار ہوں گی، اہم دورہ دوطرفہ تعاون کو فروغ دینے میں معاون ثابت ہوگا۔

    خیال رہے امریکہ روانگی سے قبل 17 ستمبر کو وزیراعظم عمران خان سے چینی سفیر نے ملاقات کی تھی، یا جینگ نے چینی صدر شی جن پنگ کی طرف سے نیک خواہشات کا پیغام پہنچایا، جس پر وزیراعظم نے اس پیغام پر ان کا شکریہ ادا کیا۔

    وزیراعظم کو پیغام میں چینی صدر شی جن پنگ کا کہنا تھا کہ مستقبل میں مل کر کام کرنے کا اعادہ کرتے ہیں، پاکستان اورچین کی روایتی دوستی چٹان کی طرح مضبوط ہے۔

    اس سے قبل مئی میں وزیر اعظم عمران خان سے چین کے نائب صدر نے ملاقات ہوئی تھی، اس موقع پر پاکستان اور چین میں وفود کی سطح پر مذاکرات کا دور بھی ہوا، بعد ازاں پاکستان اور چین کے درمیان مفاہمت کی یاد داشتوں پر دستخط کئے گئے تھے۔

    واضح رہے اپریل میں وزیراعظم نے چینی صدرکی دعوت پر4روزہ سرکاری دورہ کیا تھا ، اس دوران وزیراعظم کی چینی صدراورہم منصب سمیت عالمی رہنماؤں سےملاقات ہوئی جبکہ عمران خان نے چین کےاعلیٰ حکام،سرمایہ کار، تاجروں کے وفود سے ملاقاتیں کیں تھیں۔

    وزیراعظم کے دورے کے دوران میں سرمایہ کاری کے14معاہدوں پردستخط کئے گئے تھے۔

  • وزیراعظم عمران خان کے دورہ چین کا اعلامیہ جاری

    وزیراعظم عمران خان کے دورہ چین کا اعلامیہ جاری

    اسلام آباد: وزیراعظم عمران خان کے دورہ چین کا اعلامیہ جاری کردیا گیا ، جس میں کہا گیا دونوں ملکوں کے درمیان چودہ معاہدوں پردستخط ہوئے اور وزیراعظم نےچینی سرمایہ کاروں کوپاکستان میں سرمایہ کاری کی دعوت دی ، قیادت نے پاک چین دوستی کونئی بلندیوں پرلے جانے کے عزم کا اظہارکیا اور کہا علاقائی یابین الاقوامی تبدیلی پاک چین تعلقات پراثراندازنہیں ہوگی۔

    تفصیلات کے مطابق حکومت کی جانب سے وزیراعظم عمران خان کے چارروزہ سرکاری دورہ چین کا اعلامیہ جاری کردیا، جس میں کہا گیا وزیراعظم نےچینی صدرکی دعوت پر4روزہ سرکاری دورہ کیااور بیلٹ اینڈروڈفورم اور بین الاقوامی نمائش میں شرکت کی۔

    اعلامیہ میں کہا گیا وزیراعظم نےبیلٹ اینڈروڈفورم کےافتتاحی سیشن میں کلیدی خطاب کیااور چین میں عالمی رہنماؤں کی گول میزکانفرنس میں بھی شرکت کی، جس میں ترقی کےنئےوسائل کےموضوع پرخصوصی خطاب کیا جبکہ بیلٹ اینڈروڈ فورم کی کامیابی کے لئے تجاویز بھی پیش کیں۔

    دورہ چین پر اعلامیہ کے مطابق وزیراعظم کی چینی صدراورہم منصب سمیت عالمی رہنماؤں سےملاقات ہوئی جبکہ عمران خان نے چین کےاعلیٰ حکام،سرمایہ کار، تاجروں کے وفود سے ملاقاتیں کیں۔

    اعلامیہ میں کہا گیا وزیراعظم، شرکا کے اعزاز میں چینی صدرکی جانب سے عشایئے کا اہتمام کیاگیا، جس میں سی پیک منصوبےسمیت دو طرفہ تعلقات کی مضبوطی کابغورجائزہ لیاگیا اور دونوں رہنماؤں نےترقی کےشعبوں میں شراکت داری بڑھانےپراتفاق کیا۔

    اعلامیے کے مطابق دونوں ممالک کاخطےکی مجموعی اورعلاقائی سیکیورٹی صورتحال اور افغانستان میں قیام امن اورجنوبی ایشیاوعالمی معاملات پرتبادلہ خیال کیا گیا۔

    حکومتی اعلامیہ میں کہا گیا دونوں ممالک کےوزرائےاعظم کی ملاقات میں اہم معاہدوں پردستخط ہوئے ، پاک چین آزادتجارت اورایم ایل ون منصوبےپردستخط کیےگئے۔

    اعلامیہ کے مطابق وزیراعظم نےدورےمیں انتہائی اہم سائڈلائن ملاقاتیں کیں، انھوں نے ایم ڈی آئی ایم ایف اورسی ای اوورلڈبینک سے ملاقات کی جبکہ تاجکستان، ازبکستان، ایتھوپیا، ملائیشیا کے سربراہان سے بھی ملاقاتیں ہوئیں۔

    وزیراعظم نےچینی صدرکیساتھ انٹرنیشنل ہارٹیکلچرل ایکسپوکادورہ کیا اور عالمی رہنماؤں کیساتھ چینی اورپاکستانی اسٹال کادورہ کیا ، وزیراعظم نے پاکستانی اورچینی بزنس مین وسرمایہ کاروں کی تقریب میں بھی شرکت کی اور چینی سرمایہ کاروں کوپاکستان میں سرمایہ کاری کی دعوت دی۔

    وزیراعظم کی موجودگی میں سرمایہ کاری کے14معاہدوں پردستخط کئے ، وزیراعظم نےچین کادوسری مرتبہ سرکاری دورہ کیاہے اور چینی قیادت سے2طرفہ تعلقات،علاقائی مسائل پرتبادلہ خیال کیاگیا، دونوں ممالک کی قیادت نےسی پیک دوسرےمرحلےپرپیشرفت کاجائزہ لیا اور خطےمیں سماجی ترقی اورصنعتی تعاون کےفروغ پربھی بات چیت کی گئی۔

    قیادت نےپاک چین دوستی کونئی بلندیوں پرلےجانےکےعزم کااظہارکیا، علاقائی یابین الاقوامی تبدیلی پاک چین تعلقات پراثراندازنہیں ہوگی۔

  • چین 20 ہزار پاکستانی طلبا کو اسکالر شپ دے گا، چینی سفیریاؤ جنگ

    چین 20 ہزار پاکستانی طلبا کو اسکالر شپ دے گا، چینی سفیریاؤ جنگ

    اسلام آباد : چینی سفیریاؤ جنگ کا کہنا ہے وزیراعظم عمران خان بیلیٹ اینڈروڈ فورم سے خصوصی خطاب کریں گے ، دورہ چین میں دونوں ممالک میں تجارتی معاہدے پردستخط کا امکان ہے، تین سال میں بیس ہزار پاکستانی طلبا کو اسکالرشپ دی جائیں گی۔

    تفصیلات کے مطابق چینی سفیریاؤ جنگ نے اسلام آباد میں بیلٹ اینڈ روڈ فورم پرپریس کانفرنس سے خطاب میں کہا کہ بیلیٹ اینڈروڈ فورم پچیس سے ستائیس اپریل تک بیجنگ میں ہوگا، وزیراعظم عمران خان فورم سے خصوصی خطاب کریں گے۔

    چینی سفیر کا کہنا تھا وزیراعظم عمران خان ستائیس اپریل کوچینی نائب صدرسے ملاقات کریں گے، دونوں ممالک میں تجارتی معاہدے پردستخط کا امکان ہے۔چین دھابیجی میں دوسرا خصوصی اقتصادی زون قائم کرنا چاہتا ہے۔پاکستان سے صنعتی تعاون کا مزید فروغ چاہتے ہیں۔

    یاؤ جنگ نے مزید کہا پاکستان سے صنعتی تعاون کا مزید فروغ چاہتے ہیں، تین سال میں بیس ہزار پاکستانی طلبا کو اسکالرشپ دی جائیں گی۔

    مزید پڑھیں : وزیر اعظم عمران خان 25 سے 27 اپریل تک چین کا دورہ کریں گے

    خیال رہے دفتر خارجہ کی جانب سے جاری کردہ بیان میں کہا گیا تھا وزیر اعظم عمران خان 25 سے 27 اپریل تک چین کا دورہ کریں گے، وزیر اعظم چین کے صدر شی جن پنگ کی دعوت پر دورہ کر رہے ہیں، وزیر اعظم بیلٹ اینڈ روڈ فورم میں شرکت کریں گے اور چین کے صدر اور وزیر اعظم سے بھی ملاقات کریں گے۔

    وزیر اعظم کے دورہ چین کے دوران باہمی تعاون کے فروغ کے لیے مفاہمتی یادداشتوں اور معاہدوں پر دستخط ہوں گے جبکہ وہ عالمی ہارٹی کلچر نمائش میں بھی شرکت کریں گے۔