کراچی: شہر قائد کے علاقے حسین آباد میں بائیک رائڈر کے مبینہ قاتل نے خود کو پولیس کے حوالے کر دیا۔
تفصیلات کے مطابق کراچی کے علاقے حسین آباد میں دوست کو قتل کرنے والے ملزم نے گرفتاری دے دی، از خود گرفتاری دینے والے ملزم دلاور کا ویڈیو بیان بھی سامنے آ گیا ہے۔
ملزم دلاور نے اپنے ویڈیو بیان میں کہا ہے کہ مقتول حارث اس کا بچپن کا دوست تھا، حارث باڑے میں آیا، جہاں میرا لوڈڈ پستول رکھا تھا، مجھ سے انجانے میں گولی چل گئی، جان بوجھ کر کچھ نہیں کیا۔
ملزم دلاور نے کہا ’’میں خود حارث کو اسپتال لے کر گیا، وہ راستے میں مجھ سے باتیں بھی کر رہا تھا، حارث کے اہلخانہ اور سب لوگوں سے معافی مانگتا ہوں۔‘‘
خوفناک حادثہ : زخمی پروفیسر مرنے سے قبل ٹریلر کے نیچے دبے اپنا نام پتہ بتاتے رہے
دوسری طرف پولیس حکام کا کہنا ہے کہ ملزم کے اسلحے کا لائسنس سامنے نہیں آیا ہے، جب کہ ملزم کے دوستوں نے غلط بیان دے کر پولیس کو گمراہ کیا تھا۔
پولیس کے مطابق ملزم دلاور کے خلاف قانونی کارروائی کا آغاز کر دیا گیا ہے، بائیک رائڈر حارث کو جمعہ کی صبح فائرنگ کر کے قتل کیا گیا تھا، اور وہ عزیز آباد 2 نمبر کا رہائشی تھا۔
