دنیا میں موجود تمام کامیاب اور دولت مند افراد کی کچھ عادات مشترک ہوتی ہیں۔ دراصل یہ عادات ہی ہوتی ہیں جو لوگوں کو کامیاب بناتی ہیں۔
مثال کے طور پر اگر آپ صبح دیر سے اٹھنے کے عادی ہیں تو آپ بے حد نقصان اٹھا سکتے ہیں۔ آپ کی کلاسز چھوٹ سکتی ہیں۔ آپ اپنی ملازمت پر دیر سے پہنچیں گے۔ صبح آپ کسی سے کاروباری ملاقات نہیں کرسکتے کیونکہ آپ جانتے ہیں آپ صبح نہیں اٹھ سکیں گے۔
اس طرح آپ ایسے بہت سے مواقع ضائع کردیں گے جو آپ کی کامیابی کے لیے سیڑھی بن سکتے ہیں۔
یاد رکھیں کہ اگر آپ اپنی صبح کا آغاز صحیح انداز سے کریں گے تو آپ کا سارا دن اچھا گزرے گا۔ یہی وجہ ہے کہ کامیاب افراد اپنی صبحوں کا آغاز بہترین طریقوں اور عادات سے کرتے ہیں۔
کیا آپ جاننا چاہتے ہیں کہ وہ کون سی عادات ہیں جو کامیاب اور دولت مند افراد صبح اٹھ کر انجام دیتے ہیں؟
:سب سے پہلے اٹھنا
صبح اس وقت اٹھنا جب سب سو رہے ہیں شروع میں تو مشکل لگے گا، لیکن دنیا کے 90 فیصد کامیاب افراد اسی عادت کے پابند ہیں۔ صبح کا وقت تخلیقی صلاحیتوں کے استعمال کے لیے بہترین ہے۔ اس وقت کوئی چیز آپ کے کام میں خلل نہیں ڈالتی اور آپ پرسکون ہو کر بڑے سے بڑا کام سر انجام دے سکتے ہیں۔
صبح جلدی اٹھ جانے سے آپ کو دن کے کئی گھنٹے اضافی مل جاتے ہیں اور آپ اپنے کئی کام مکمل کر سکتے ہیں۔ یہی نہیں آپ اپنے آفس یا کسی دوسرے کام پر جانے کے لیے ذہنی اور جسمانی طور پر آرام سے تیار ہوسکتے ہیں۔
:جسم کو متحرک کرنا
اگر آپ صبح جلدی اٹھ گئے ہیں لیکن نیند میں ہیں تو جلدی اٹھنے کا کوئی فائدہ نہیں۔ نیند بھگانے اور فوری توانائی حاصل کرنے کا بہترین طریقہ ورزش کرنا ہے۔
ضروری نہیں کہ آپ کوئی بھاری بھرکم ورزش کریں جو آپ کو تھکا دے۔ اس کے لیے ہلکی پھلکی چہل قدمی بھی کافی ہوگی۔ صبح ورزش آپ کے جسم کے بند اعضا کو کھول دیتی ہے اور وہ بہترین طور پر اپنے افعال انجام دیتے ہیں۔
:بھرپور ناشتہ
صبح کا ناشتہ بے حد ضروری ہے۔ جدید تحقیق کے مطابق یہ نہ صرف آپ کی توانائی میں اضافہ کرتا ہے بلکہ آپ کو موٹاپے سے بھی بچاتا ہے۔
اکثر افراد صبح بھوک نہ لگنے کی شکایت کرتے ہیں جس کے باعث وہ ناشتہ نہیں کرتے اور یوں سارا دن غنودگی اور تھکن کا شکار رہتے ہیں۔ صبح ہلکی پھلکی ورزش سے آپ کو بھوک بھی لگ جائے گی اور آپ ایک بہترین ناشتے کے ساتھ اپنے دن کا آغاز کر سکیں گے۔
اپنے ناشتہ میں پروٹین جیسے مچھلی، انڈے، دلیہ وغیرہ شامل رکھیں اور غیر صحت مند غذائی اجزا سے پرہیز کریں۔
:باخبر رہنا
صبح گھر سے نکلنے سے پہلے حالات سے ضرور باخبر رہیں۔ اکثر آدھی رات میں کوئی ایسا واقعہ رونما ہوجاتا ہے جو اگلی صبح سب کی زبانوں پر ہوتا ہے۔ اگر آپ اخبار نہیں پڑھیں گے تو آپ بے خبر رہیں گے۔
ناشتے کے دوران سرسری سا اخبار پڑھنے کو اپنی عادت بنالیں۔
:فہرست بنانا
اپنے دن بھر میں سر انجام دیے جانے والے کاموں کی فہرست بنائیں۔ یہ کام آپ اس وقت کریں جب آپ صبح صادق میں اٹھیں۔ اس سے ایک تو آپ کو کاموں کو نمٹانے میں آسانی ہوگی۔ دوسرا آپ اپنے لیے ٹارگٹ سیٹ کر سکیں گے کہ فلاں کام آج ہر حال میں انجام دینا ہے۔
دن کے اختتام پر اس فہرست کو دیکھیں اور جب آپ دیکھیں گے کہ آپ یہ تمام کام انجام دے چکے ہیں تو آپ کو طمانیت کا احساس ہوگا۔
:طویل المعیاد منصوبہ بندی
صرف ایک دن کی منصوبہ بندی کرنے کے ساتھ ساتھ طویل المعیاد منصوبہ بندی بھی کریں۔ اپنی زندگی کا ایک واضح مقصد بنائیں اور ہر روز اس تک پہنچنے کے لیے قدم قدم آگے بڑھیں۔
یاد رکھیں، امیر اور کامیاب ترین لوگ ایک رات میں ہی اس مقام تک نہیں پہنچتے۔ ان کی کامیابی کے پیچھے برسوں کی محنت، رت جگے اور کٹھن دن ہوتے ہیں جو عموماً لوگوں کی نظروں سے اوجھل رہتے ہیں۔
:نیا دن ۔ نئی امید
ہر نیا طلوع ہوتا سورج نئی امیدیں اور مواقع لے کر آتا ہے۔ کبھی بھی یہ مت سوچیں کی آج آپ کا برا دن ہے۔ ہوسکتا ہے دن کے اختتام پر آپ کے لیے کوئی بہترین چیز موجود ہو۔
اگر کوئی دن ایسا بھی ہے جو آپ کے خیال میں برا ہے تو اس کے بارے میں زیادہ مت سوچیں۔ اگلے دن میں یقیناً آپ کے لیے کچھ بہترین ہوگا۔ مایوسی اور ناامیدی سے دور رہیں اور ہر حال میں خوش رہنے کی کوشش کریں۔
