پنجاب کے شہر عارف والا میں پولیس نے انسانی زندگیوں کی قاتل دھاتی ڈوریں اور پتنگیں بنانے والی فیکٹری پر چھاپہ مارا ہے۔
اے آر وائی نیوز کے مطابق عارف والا میں تھانہ صدر کی پولیس نے کئی انسانی جانوں کے خاتمے کا سبب بننے والی دھاتی ڈوروں اور پتنگیں بنانے والی فیکٹری پر چھاپہ مار کر ایک ملزم گرفتار کیا۔
پولیس کے مطابق یہ فیکٹری نواحی گاؤں میں قائم تھی۔ فیکٹری سے دھاتی ڈوریں، پتنگیں، کیمیکل، مشینری اور دیگر سامان بھی برآمد کر لیا ہے۔
پولیس کا کہنا ہے کہ گرفتار ملزم قصور کا رہائشی حاجی محمد ہے جس سے تحقیقات جاری ہیں۔
واضح رہے کہ دھاتی پتنگ بازی میں دھاتی ڈوروں کے استعمال کے باعث اب تک درجنوں قیمتی جانیں ضائع ہو چکی ہیں۔
گزشتہ ماہ پنجاب حکومت نے صوبے میں پتنگ بازی پر مکمل پابندی عائد کرتے ہوئے اس کو ناقابل ضمانت جرم قرار دے دیا تھا اور پتنگ اڑانے پر 3 سے 7 سال تک کی سزا کا بل منظور کیا تھا۔
https://urdu.arynews.tv/punjab-bans-kite-flying-across-province-under-new-law/
