امیر جماعت اسلامی کراچی حافظ نعیم الرحمٰن نے کہا کہ کل 5جنوری کو وزیراعلیٰ ہاؤس کے باہر دھرنا دیں گے۔
اے آر وائی نیوز کے مطابق کراچی میں پریس کانفرنس کے دوران امیر جماعت اسلامی کراچی حافظ نعیم الرحمٰن کا کہنا تھا کہ ہمیشہ جعلی ووٹر لسٹیں بنانے والے اب الیکشن سے بھاگ رہے ہیں، فیس سیونگ دینے کیلئے الیکشن نہ کرانا قابل قبول نہیں ہے۔
حافظ نعیم الرحمان کا کہنا تھا کہ کراچی کے بلدیاتی انتخابات وقت پر ہونے چاہئیں، وزیراعلیٰ ہاؤس کے باہر دھرنا الیکشن ہونے کیلئے ہے، اگر پیپلز پارٹی الیکشن چاہتی ہے تو کل دھرنے میں آکر اعلان کردے، پہلے کی طرح اس بار بھی ہمارا دھرنا پر امن ہوگا۔
انہوں نے کہا کہ گورنر ہاوس کو سازشوں کا اڈا نہ بنائیں ایم کیوایم ماضی کی طرح موجودہ حکومت میں بھی شامل رہی، پیپلز پارٹی اور ایم کیو ایم نورا کشتی کررہے ہیں، ایم کیو ایم اور پیپلز پارٹی نے شہرکا بیڑہ غرق کیا ہے۔
حافظ نعیم الرحمان نے کہا کہ کراچی کی سڑکوں کابرا حال ہے، ہمیں مل کر اس شہر کو چلانا ہے، جماعت اسلامی نے ہمیشہ شہر کے حق، امن کیلئےہمیشہ قربانیاں دی ہیں۔
