اسلام آباد: وزیر داخلہ چوہدری نثار نے 31 اکتوبر کے واقعات کا ذمہ دارتحریک انصاف کو قرار دے دیا۔ انہوں نے تشدد کی سیاست کرنے والوں کے لیے خود کو آمر قرار دے دیا۔

اسلام آباد میں وفاقی وزیر داخلہ چوہدری نثار نے نیوز کانفرنس کرتے ہوئے کہا کہ نادرا میں قابل افراد کام کر رہے ہیں صرف چند افراد کی وجہ سے ادارہ بدنام ہوتا ہے۔ ان کے سدباب کے لیے آن لائن شکایت سیل قائم کیا جارہا ہے۔ جعلی شناختی کارڈوں کے خلاف کافی عرصہ پہلے سے مہم شروع کی جاچکی ہے۔

انہوں نے ہدایت کی کہ نادرا میں شناختی کارڈ بنوانے کے لیے آنے والوں بزرگوں، بچوں اور خواتین کا خیال کیا جائے اور کسی کو لائن توڑنے کی اجازت نہ دی جائے۔

چوہدری نثار نے بتایا کہ ایف آئی اے کو جعلی نوٹیفیکشن کے حوالے سے ہدایت کردی ہے۔ سوشل میڈیا پر زیادہ چیزیں جھوٹی پھیلائی جاتی ہیں۔

تحریک انصاف کے دھرنے کے حوالے سے ایک سوال پر انہوں نے کہا کہ اگر میں کوئی آمر ہوتا تو 2 نومبر کو پرویز خٹک اور ان کے ساتھ ہزاروں افراد کو اسلام آباد نہ آنے دیتا۔

ان کا کہنا تھا کہ اگر وہ انتشار، تشدد اور لاک ڈاؤن کے منصوبے کے لیے اسلام آباد آئیں گے تو قانون حرکت میں آئے گا اور میں ان کے لیے آمر بن جاؤں گا۔ البتہ اگر پرامن دھرنوں، جلسوں اور سیاسی سرگرمیوں کے لیے آئیں گے تو ساری سڑکیں ان کے لیے کھلی ہوں گی۔

چوہدری نثار کا کہنا تھا کہ 31 اکتوبر کو صوابی اور اسلام آباد میں ہونے والی شیلنگ اور نقصان کی ذمہ دار خود تحریک انصاف ہے۔ پارٹی قیادت نے کارکنوں کو اکسایا جس کے بعد وہ بے قابو ہوگئے۔

واضح رہے کہ گزشتہ ماہ تحریک انصاف کے چیئرمین عمران خان کے دھرنے کی کال پر اسلام آباد آنے والے مظاہرین پر پولیس نے شیلنگ کی تھی جس سے تحریک انصاف کے 2 کارکن اور ایک نومولود بچہ جاں بحق ہوگئے تھے۔ تحریک انصاف نے بعد ازاں دھرنے کو یوم تشکر میں تبدیل کر کے اسلام آباد میں جلسہ کیا تھا۔

اسلام آباد: پاکستان تحریک انصاف  نے کل اسلام آباد پیریڈ گراؤنڈ میں یوم تشکر منانے کا اعلان کردیا ِ عمران خان کا کہنا ہے کہ سپریم کورٹ نے ہمارا مقصد پورا کردیا۔

 تحریکِ انصاف کے سربراہ نے بنی گالہ میں کارکنان سے خطاب کرتے ہوئے کہا کہ میں پورے پاکستان کی جانب سے سپریم کورٹ کو خراجِ تحسین پیش کرتا ہوں جس نے جمعرات سے وزیراعظم نواز شریف کی تلاشی شروع کرنے کا اعلان کیا ہے۔

سپریم کورٹ نے فریقین سے تحریری جواب طلب کرلیا

انہوں نے وہاں جمع عوام کی کثیر تعداد سے خطاب کرتے ہوئے کہا کہ 20سال کی جدوجہد میں جومیرے ساتھ چلے میں ان سب کا شکرگزارہوں اور خیبر پختونخواہ کے وزیراعلیٰ اوران کے ساتھ موجود کارکنان کو خراجِ تحسین پیش کرتا ہوں جنہوں جمہوریت کے لیے شیلنگ کو برداشت کیا۔

ان کا کہنا تھا کہ جب سے پانامہ لیکس کا انکشاف ہوا ہے اس کے خلاف ہر پلیٹ فارم سے جدوجہد کی لیکن کہیں بھی انصاف نہیں ملا لیکن سپریم کورٹ کے حکم پر اب پہلی بار طاقتور کی تلاشی لی جارہی ہے۔

عمران خان کا کہنا تھا کہ پہلے ہم نے جمہوریت کے لیے جدو جہد کی تھی اب ہم کرپشن کے خلاف نکلے ہیں ،ہم نے فیصلہ کیا تھا کہ کہ ہم اسلام آباد آئیں اور اسلام آباد لاک ڈاؤن کریں جب 10لاکھ عوام آئے تو لاک ڈاؤن ہوجائے گا۔

انہوں نے کہا کہ ہمارے ملک کی تاریخ میں کبھی طاقتور نے اپنی تلاشی نہیں دی ‘ پولیس والے بھی کمزور موٹر سائیکل والےکو روک کر پیسے لیتے ہیں۔ ہم نے دو آپشنز دیے یا نوازشریف استعفی دے یا تلاشی دے۔

یاد رہے کہ تحریک انصاف نے 2 نومبر کو پناما کرپشن کے خلاف دھرنے کا اعلان کررکھا تھا جس کے سبب وفاقی حکومت نے اسلام آباد آنے والے تمام تر راستے کنٹینر لگا کرسیل کردیے تھے اوراسلام آباد آنے والے کارکنان کی پکڑدھکڑ اور انہیں روکنے کے لیے شدید شیلنگ بھی کی گئی تھی۔

  شیلنگ کے سبب خیبرپختونخواہ کے وزیراعلیٰ پرویزخٹک جو کہ 500 گاڑیوں کا قافلہ لے کر اسلام آباد آرہے تھے صوابی کے مقام پررکنے پرمجبور ہوگئے تھے۔

پاناما لیکس کی تحقیقات سے متعلق دائردرخواستوں پرچیف جسٹس آف پاکستان انورظہیر جمالی کی سربراہی میں پانچ رکنی بینچ سماعت کررہا تھا، سپریم کورٹ کے بینچ میں جسٹس آصف سعید کھوسہ،جسٹس امیرہانی مسلم،جسٹس عظمت سعیداورجسٹس اعجازالحسن شامل ہیں۔

 سپریم کورٹ نے پانامہ لیکس کی تحقیقات اور وزیراعظم کی نااہلی کیلئے درخواستوں پر سماعت میں وزیراعظم اوران کے اہلخانہ کو2 دن میں جواب داخل کرانے کا حکم دیا اور فریقین سے ٹی اوآرز اور کمیشن کی تجویز تحریری طور پر طلب کرتے ہوئے کرتے ہوئے کیس کی سماعت 3 نومبر تک ملتوی کردی

اسلام آباد : دونومبر کو ہونے والے دھرنے کو ناکام بنانے کے لیے وفاقی حکومت کی جانب سے کیے گئے اقدامات کے باعث پیدا ہونے والی کشیدگی پر ملک کی مخلتف سیاسی جماعتوں نے مذمت کرتے ہوئے اسے غیر جمہوری اور غیر آئینی عمل قرار دیا.

اسلام آباد میں پیدا ہونے والی کشیدگی اور امن و امان کی مخدوش حالت کی لمحہ بہ لمحہ تفصیلات بتانے کے لیے اے آر وائی نیوز کی براہ راست نشریات کے پینل سے بات کرتے ہوئے پیپلز پارٹی کے سینیٹر اعتزاز احسن نے کہا ہے کہ نواز شریف نے آج وفاق پر بڑی ضرب لگائی ہے، شریف برادران نے آج پنجاب کو وفاق سے علیحدہ کردیا۔

انہوں نے مزید کہا کہ پنجاب تو مہمان نواز صوبہ ہے ، لوگوں کو کیوں روکا جارہا ہے ،پنجاب سے کے پی کے تک شلینگ کی جارہی ہے،نواز شریف نے وفاق پر بڑی ضرب لگائی اور شریف برادران نے آج پنجاب کو وفاق سے علیحدہ کردیا۔

یہ بھی پڑھیں : ملک سول وار کی طرف بڑھ رہا ہے، نواز شریف استعفی دیں،شیخ رشید

قبل ازیں شیخ رشید نے اے آر وائی نیوز سے بات کرتے ہوئے وزیراعظم پاکستان نے مستعفی ہونے کا مطالبے کرتے ہوئے کہا تھا کہ ملک سول وار کی جانب بڑھ رہا ہے اور ملک کی صورت حال کشیدہ اور انتہائی تشویش ناک ہے۔

پیپلز پارٹی کے رہنما اور مشیر اطلاعات سندھ مولا بخش چانڈیو نے بھی اپنے ردعمل میں کہا کہ حکومت طاقت کے نشے میں مست ہاتھی بن گئی ہے، وزیراعلیٰ خیبر پختونخواہ کو تشدد کے ذریعے روک کر کیا پیغام دیا جارہاہے۔

انہوں نے کہا کہ نواز شریف اقتدار بچانے کےلیے وفاق کو دائو پر لگار ہے ہیں،وزیراعلیٰ پر تشدد کرنے سے وفاق کمزور ہوجائے گا،ملک کو مخصوص ٹولے کی ملکیت بنایا جارہا ہے۔

اسی طرح ایم کیو ایم پاکستان کے سربراہ فاروق ستار نے کہا کہ وفاقی حکومت کے اقدام سے ملک غیر مستحکم ہورہا ہے، اسلام آباد میں موجود فریقین ہوش مندی کا مظاہرہ کریں، سیاسی جاعتوں کو پرامن احتجاج کی اجازت دی جائے۔

اسلام آباد: دھرنے کے شرکا سے نمٹنے کے لیے حکومت نے حکمت عملی تیار کرلی۔ اے آر وائی نیوز نے پلان کی کاپی حاصل کرلی۔

دھرنے کے شرکا کو رونے کے لیے حکومت نے حکمت عملی تیار کرلی ہے۔

حکمت عملی کے مطابق مختلف علاقوں میں پولیس اور فرنٹیئر کانسٹیبلری کے اہلکار تعینات ہوں گے۔ قیدیوں کو لے جانے والی گاڑیاں اور شیلنگ کے لیے الگ الگ ٹیمیں ہوں گی۔

پولیس اور ایف سی اہلکاروں کو 2 شفٹوں میں تعینات کیا جائے گا۔ اسلام آباد پولیس کو لاہور، ملتان، فیصل آباد، بہاولنگر پولیس کی مدد حاصل ہوگی۔ آزاد کشمیر سے بھی پولیس کے دستوں کو اسلام آباد بلایا گیا ہے۔

واضح رہے کہ تحریک انصاف کی 2 نومبر کے دھرنے اور حکومت کو اس دھرنے کو ناکام بنانے کی تیاریاں جاری ہیں۔

آج صبح اسلام آباد ہائی کورٹ نے اسلام آباد لاک ڈاؤن سے متعلق مقدمات کا فیصلہ جاری کرتے ہوئے کہا ہے کہ تحریک انصاف پریڈ گراؤنڈ پر دھرنا دے سکتی ہے اور اگر عوام زیادہ ہوئی تو ایکسپریس وے پر دھرنا دینے کی اجازت ہے، اس کے علاوہ کسی اور مقام پر دھرنا دینے کی اجازت نہیں ہے۔ عدالت نے کسی کو گرفتار نہ کرنے اور عمران خان کے پروگرام میں خلل نہ ڈالنے کا حکم بھی دیا ہے۔

دو روز قبل اسلام آباد ہائی کورٹ تحریک انصاف کے کارکنوں کو گرفتار نہ کرنے اور شہر کے داخلی و خارجی راستوں سے کنٹینر ہٹانے کا حکم بھی دے چکی ہے تاہم عدالتی حکم کی خلاف ورزی بھرپور طریقے سے جاری ہے۔

حکومت کی جانب سے تحریک انصاف کے کارکنوں کے خلاف کریک ڈاؤن کیا جارہا ہے اور اب تک سینکڑوں کارکنوں کو گرفتار کیا جاچکا ہے۔ دوسری جانب اسلام آباد کے داخلی راستوں پر کنٹینرلگا دیے گئے ہیں اور شیریں مزاری سمیت تحریک انصاف کے رہنماؤں اور کارکنوں کو اسلام آباد میں داخلے سے روکا جارہا ہے۔