Tag: دھرنے

کراچی: ملک بھر میں احتجاجی دھرنوں کے باعث قومی ایئر لائن سمیت غیر ملکی ایئر لائنز کی اندرون اور بیرون ملک کی 50 سے زائد پروازیں منسوخ کر دی گئیں۔

تفصیلات کے مطابق سانحہ مچھ کے لواحقین سے اظہار ہم دردی کے لیے شہر کراچی سمیت ملک بھر میں دھرنوں کا سلسلہ جاری ہے، کراچی میں 28 سے زائد مقامات پر دھرنوں کی وجہ سے تمام اہم شاہراہیں ٹریفک کے لیے بند کی گئی ہیں۔

4 روز سے جاری دھرنوں کی وجہ سے فضائی آپریشن بری طرح متاثر ہو گیا ہے، پی آئی اے سمیت غیر ملکی ایئر لائنز کی درجنوں پروازیں منسوخی کا شکار ہو گئی ہیں۔

ایئر پورٹ حکام کا کہنا ہے کہ ایئر لائنز کے فضائی عملے سمیت مسافروں کو ایئر پورٹ جانے میں مشکلات پیش آ رہی ہیں جس کی وجہ سے پروازیں منسوخ اور تاخیر کا شکار ہو رہی ہیں۔

کراچی میں راستوں کی بندش، پی آئی اے کا پروازوں کیلیے اہم اقدام

حکام کے مطابق غیر ملکی ایئر لائنز کی کراچی سے بنکاک، دبئی، شارجہ، دمام، کویت اور کولمبو کی 21 دو طرفہ پروازیں منسوخ کی گئیں، جب کہ پی آئی اے کی کراچی سے لاہور، پشاور، کوئٹہ، اسلام آباد کی دو طرفہ 8 پروازیں منسوخی کا شکار ہو گئی ہیں۔

اسلام آباد سے غیر ملکی ایئر لائنز کی اسلام آباد سے جدہ، بینکاک، بیجنگ، قسیم کی 8 پروازیں منسوخی کا شکار ہوئی ہیں، جب کہ پی آئی اے کی اسلام آباد سے اسکردو، دبئی، جدہ، گلگت، چترال کی دو طرفہ 10 پروازیں منسوخی کا شکار ہو چکی ہیں۔

پی آئی اے کی لاہور سے کراچی اور دبئی کی دو طرفہ 4 پروازیں منسوخ ہوئیں، نجی ایئر لائنز کی اندرون و بیرون ملک کی دو طرفہ 8 پروازیں منسوخی کا شکار ہوئی ہیں۔

کراچی: ملک بھر میں جگہ جگہ سانحہ مچھ کے پس منظر میں مظاہرین کے دھرنوں کے باعث راستے بند ہو گئے ہیں، شہر قائد میں بھی راستوں کی بندش کے باعث دیگر مسائل سمیت شہر میں دودھ کے بحران کا بھی خدشہ پیدا ہو گیا ہے۔

اے آر وائی نیوز کے مطابق آج نائب صدر ڈیری فارمرز اشرف گجر نے اپنے ایک بیان میں خبر دار کیا ہے کہ آج صبح بھی مختلف علاقوں میں دودھ سپلائی نہ ہو سکا، راستے بند ہونے سے شام کو دودھ کی سپلائی ممکن نہیں۔

ڈیری فارمرز ایسوسی ایشن کے مطابق جانوروں کے چارے اور خوراک کے ٹرک نہیں پہنچ سکے ہیں، اندرون سندھ سے آنے والے چارے کے ٹرک قومی شاہراہوں پر کھڑے ہیں۔

اشرف گجر کا کہنا تھا کہ کراچی کے علاقوں سرجانی، میمن گوٹھ، ناگوری سوسائٹی میں باڑوں میں جانوروں کی خوراک کی قلت ہو گئی ہے، اگر سپلائی کے لیے راستہ نہ ملا تو ہزاروں لیٹر دودھ خراب ہو کر ضائع ہو جائے گا۔

کراچی میں راستوں کی بندش سے ایکسپورٹ معطل، کنٹینرز روک دیے گئے

واضح رہے کہ کراچی کے مختلف مقامات پر راستوں کی بندش سے کینو کی ایکسپورٹ بھی معطل ہو گئی ہے، 400 سے زائد کنٹینرز کراچی اور سندھ کے داخلی راستوں پر رک چکے ہیں، اس سلسلے میں کینو ایکسپورٹرز کا کہنا تھا کہ کنٹینرز اگر بندرگاہ تک نہ پہنچے تو برآمد کنندگان کو نقصان ہوگا۔

کینو ایکسپورٹرز کے مطابق 400 کنٹینرز میں 46 لاکھ ڈالر سے زائد مالیت کا کینو موجود ہے، سڑکوں پر کھڑے سیکڑوں کنٹینرز کا مال خراب ہونے کا خدشہ ہے، کنٹینرز، جہازوں کی قلت سے کینو شپمنٹ 4 گنا زائد فریٹ پر ایکسپورٹ ہو رہی ہے۔

کینو ایکسپورٹرز نے وفاقی حکومت سے اپیل کی ہے کہ اس مسئلے کا فی الفور حل نکالا جائے۔