Tag: دھماکے

کراچی : شکار پور میں ہونے والے ہولناک واقعے پر سیاسی اور مذہبی شخصیات نے شدید الفاظ میں مذمت کرتے ہوئے گہرے دکھ اور افسوس کا اظہار کیاہے۔

 تفصیلات کے مطابق صدرپاکستان ممنون حسین اور وزیرداخلہ چوہدری نثاراحمد نے امام بارگاہ دھماکے کے نتیجے میں قیمتی انسانی جانوں کے ضیاع پر گہرے دکھ اور افسوس کا اظہار کیا

  وزیراعلیٰ سندھ سید قائم علی شاہ نے دھما کے کی مذمت کرتے ہو ئے اسے انسان دشمنی سے تعبیر کیا ۔ ۔شکار پور دھماکے پر ایم کیو ایم کے قائد الطاف حسین کا کہنا تھا کہ دھماکا کرنیوالے انسان نہیں حیوان ہیں۔ ان کا کہنا تھا کہ دہشت گرد معصوم لوگوں کو نشانہ بنا کر خوف کی فضا قائم کرنا چاہتے ہیں۔

تحریک انصاف کے چئیرمین عمران خان نے امام بارگاہ میں دھماکے کی شدید مذمت کرتے ہوئے کہا کہ عبادت گاہوں پر حملے انتہائی درجے کی سفاکیت ہے۔

پاکستان عوامی تحریک کے سر براہ ڈاکٹر طاہر القادری نے شہید ہونیوالوں کے لواحقین سے اظہار ہمدردی کرتے ہوئے کہا کہ ملک میں حکومت کی رٹ کا وجود ہی نہیں ہے ،امن کی مسلسل دھجیاں بکھیری جا رہی ہیں ۔

دھماکے کے حوالے سے امیر جماعت اسلامی سراج الحق،اسپیکر قومی اسمبلی سردار ایاز صادق سمیت دیگر سیاسی اور مذہبی رہنماؤں نےدھماکے پر گہرےدکھ اور افسوس کا اظہار کیا ہے۔