ممبئی: بالی ووڈ کی آنجہانی اداکارہ سری دیوی کی صاحبزادی جھانوی کپور نے اپنی پہلی فلم والدہ کے نام کردی جبکہ پاکستان میں بھی دھڑک کو اسکرینگ کی اجازت مل گئی۔
بھارتی میڈیا کے مطابق فلم کے آغاز پر جھانوی کپور کا ماں کے نام لکھا گیا خط شامل کیا جائے گا جس میں وہ اپنی والدہ کو خراجِ عقیدت پیش کریں گی، بالی ووڈ ذرائع کے مطابق فلم کے پہلے سیشن میں کچھ ایسا جذباتی منظر ہوگا جسے دیکھ کر شاید ہی کوئی اپنے جذبات پر قابو رکھ سکے۔
اس ضمن میں جھانوی کا کہنا تھا کہ ’اس فلم کو بالی ووڈ کا تسلسل قرار نہیں دیا جاسکتا کیونکہ یہ روایتی کہانی پر مبنی نہیں ہے، میں نے کالج کی طالبہ کا کردار ادا کیا جو راجھستان کے اعلیٰ گھرانے سے تعلق رکھتی ہے اور اُسے کلاس کے عام لڑکے سے پیار ہوجاتا ہے۔
اُن کا کہنا تھا کہ بالی ووڈ فلموں میں ویسے تو عام طور پر رمانوی کردار اور ذات پات کا فرق دکھایا جاچکا البتہ اُن کا اختتام اچھا ہوتا ہے مگر دھڑک میں ایسا کچھ نہیں بلکہ یہ خوفناک انداز میں ختم ہوگی۔ فلم 20 جولائی سے سینیما گھروں میں نمائش کے لیے پیش کی جائے گی۔
دوسری جانب سینسر شپ بورڈ نے دھڑک کو پاکستان میں ریلیز کرنے کی اجازت دے دی، پنجاب فلم سنسر بورڈ کے اراکین نے تفصیلی جائزے کے بعد اسکرین کرنے کی اجازت دی۔
واضح رہے کہ دھرما پروڈکشنز کے بینر تلے بنائی جانے والی فلم میں دو نئے چہرے جھانوی کپور جھانوی کپور اور ایشان کھاتر مرکزی کردار ادا کررہے ہیں۔
خیال رہے کہ آنجہانی اداکارہ نے اعلان کیا تھا کہ وہ اپنی بیٹی کی آنے والی پہلی فلم کی تشہیر خود کریں گی البتہ 5 فروری کو اُن کی حادثاتی موت ہوگئی تھی۔
یاد رہے کہ جھانوی کپور نے اپنی ماں سری دیوی انتقال کے چند روز بعد ایک جذباتی خط لکھا تھا جس نے پڑھنے والوں کی آنکھوں کو نم کردیا تھا۔
اپنی تحریر میں انہوں نے لکھا تھا کہ ’آپ کے جانے کے بعد میں اندر سے کھوکھلی ہوچکی ہوں اور مجھے اسی کھوکھلے پن کے جینا سیکھنا ہوگا۔ اس خالی پن کے باوجود آپ کی محبت میرے اندر روشن ہے‘۔
جھانوی نے لکھا کہ تھا کہ مجھے محسوس ہوتا ہے آپ مجھے غم اور تکلیف سے بچا رہی ہیں۔ ’میں جب بھی اپنی آنکھیں بند کرتی ہوں تو مجھے آپ کے ساتھ گزارا ہوا اچھا وقت یاد آتا ہے‘۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
