واشنگٹن : امریکا نے اسامہ بن لادن کے بیٹے حمزہ کو دہشت گردوں کی فہرست میں شامل کرلیا ، ایف بی آئی کا کہنا ہے حمزہ بن لادن القاعدہ سے تعلق پر امریکا کو مطلوب ہے، وہ پاکستان، افغانستان، ایران یا شام میں ہوسکتا ہے۔
تفصیلات کے مطابق امریکہ نے اسامہ بن لادن کے بیٹے حمزہ کو فیڈرل بیورو آف انویسٹی گیشن (ایف بی آئی) کی دہشت گردوں کی فہرست میں شامل کر لیا ، ایف بی آئی کا کہنا ہے حمزہ سے متعلق مزید معلومات درکارہیں، حمزہ بن لادن پاکستان،افغانستان،ایران یاشام میں ہوسکتاہے۔
حمزہ بن لادن القاعدہ سے تعلق اور کھلے عام امریکا کو دھمکیاں دینے پر امریکہ کو مطلوب ہیں۔
یاد رہے رواں سال مارچ کے آغاز میں امریکا نے اسامہ بن لادن کے بیٹے حمزہ کی معلومات فراہم کرنے والے کو 10 لاکھ ڈالر انعام دینے کا اعلان کیا تھا، امریکی دفتر خارجہ کا کہنا تھا حمزہ بن لادن اسلامی عسکریت پسند گروہ کے اہم رہنما کے طور پر سامنے آئے ہیں۔
مزید پڑھیں : امریکا کا اسامہ بن لادن کے بیٹے کی معلومات فراہم کرنے پر 10 لاکھ ڈالر انعام کا اعلان
امریکی دفتر خارجہ کے مطابق حمزہ بن لادن نے اپنے والد کی موت کا بدلہ لینے کے لیے آڈیو اور ویڈیو پیغامات بھی جاری کی، جس میں انہوں نے امریکا اور اس کے حامی مغربی ممالک پر حملہ کرنے کے لیے کہا ہے۔
بعد ازاں سعودی عرب نے عالمی دہشت گرد تنظیم القاعدہ کے سابق سربراہ اسامہ بن لادن کے بیٹے کی شہریت منسوخ کردی تھی۔
واضح رہے کہ امریکا پہلے ہی حمزہ بن لادن کو سرکاری طور پر عالمی دہشت گرد قرار دے چکا ہے۔
خیال رہے کہ اسامہ بن لادن کو امریکی اہلکاروں نے خفیہ آپریشن کے ذریعے 2011 میں قتل کردیا تھا۔
