اسلام آباد : چیئرمین پی ٹی آئی دہشت گردی کے پانچ مقدمات میں پیش نہ ہوئے، جس پر عدالت نے چیئرمین پی ٹی آئی کو دوبارہ طلب کرلیا۔
تفصیلات کے مطابق اسلام آباد کی انسداد دہشتگردی کی عدالت میں جوڈیشل کمپلیکس حملہ ودیگر دہشتگردی کے 5 مقدمات کی سماعت ہوئی، جج ابو الحسنات ذولقرنین نے سماعت کی۔
طلبی کے باوجود چیئرمین پی ٹی آئی سمیت دیگررہنماپیش نہ ہوئے، عمران خان کے وکیل سردار مصروف نے عدالت کو بتایا کہ ہمیں کل رات کو میڈیا سے پتہ چلا ،کوئی آئندہ تاریخ مقرر کر دیں، کوئی ایک تاریخ مقرر کردیں تاکہ عدالت میں پیش ہو سکیں۔
جس پر عدالت نے ریمارکس دیئے کہ میں جب طلب کروں آپ سب نے پیش ہونا ہے، میں چاہتا ہوں ان کیسز کو نمٹایا جائے ، کیسز کے شواہد ریکارڈ کرکے نمٹایا جائے۔
عدالت نے آئندہ سماعت پر چیئرمین پی ٹی آئی سمیت دیگر ملزمان کو دوبارہ طلب کرتے ہوئے حاضری یقینی بنانے کی ہدایت کر دی ۔
عدالت نے تھانہ رمنا میں درج دو مقدمات کی سماعت 13 جولائی تک ملتوی کر دیے جبکہ تھانہ گولڑہ میں درج مقدمہ 14 جولائی ، تھانہ سی ٹی ڈی میں درج مقدمہ 20 جولائی اور تھانہ سنگجانی میں درج مقدمہ 21 جولائی تک ملتوی کر دیا گیا ہے۔