لندن : مسلم لیگ ن کے قائد نوازشریف نے عمران خان کودہشت گرد قرار دے دیا اور کہا عمران خان فراڈیا تو تھا لیکن یہ دہشت گرد بھی ہوگا یہ نہیں معلوم تھا۔
تفصیلات کے مطابق مسلم لیگ ن کے قائد نواز شریف نے لندن میں صحافیوں سے گفتگو کرتے ہوئے کہا کہ حکومت نے عمران خان کیخلاف جےآئی ٹی بنائی ہے جو چھان بین کرے گی، سنگین واقعات ہیں جن کی انکوائری کی جائے گی۔
نواز شریف کا کہنا تھا کہ یہ ہیرا پھیری اور فراڈ یا بندہ توپہلے ہی تھا ساری دنیاجانتی تھی لیکن یہ دہشت گرد بھی تھا اس کا کسی کوعلم نہیں تھا۔
مسلم لیگ ن کے قائد نے کہا کہ ایسی ویسی دہشت گردی، اب واسطہ پڑا ہے تو یہ سامنے آیا ہے، اس سے بڑا فراڈیا اور دہشت گرد پاکستان کی سیاست میں نہیں دیکھا۔
زمان پارک میں پیٹرول بموں کے استعمال پر ان کا کہنا تھا کہ پیٹرول بم کس لیےپھینکےگئے،تاکہ پولیس والے جل کر مر جائیں، پولیس والوں پرپیٹرول بم پھینکنا کس نے سکھایا ہے، پہلی بار کسی سیاسی جماعت کی طرف سے ایسی حرکت ہوئی ہے۔
نواز شریف نے مزید کہا کہ پیٹرول بم پھینکنا ناقابل برداشت ہے،ہم نے کیا پاکستان کو ڈبونا ہے؟ ایسے لوگوں کے خلاف بھرپور ایکشن ہونا چاہیے۔
