Tag: دہشت گرد

ہیگ: دہشت گردوں کی جانب سے لڑنے کی صلاحیت بڑھانے اور وحشیانہ تشدد و سفاکیت ابھارنے والی ادویات کے استعمال کا انکشاف ہوا ہے، نیدر لینڈ کی لیبارٹری میں ایسی ایک دوا کی کھیپ پکڑی گئی جس کے بعد پولیس دو مشکوک افراد کو تلاش کررہی ہے۔

بی بی سی کے مطابق نیدر لینڈ(ہالینڈ) کے شہر ہیگ کی پولیس کو گزشتہ ماہ اس دوا کے متعلق علم ہوا تھا، پولیس کو شبہ ہے کہ یہ دوا ’’کیپٹاگون‘‘ شدت پسندوں کو فائدہ دیتی ہے تاہم ابھی اس بات کا تعین نہیں کیا جاسکا کہ یہ دوا مشرق وسطی بھیجی جارہی تھی۔

پولیس کا کہنا ہے کہ انھیں ’’کیپٹاگون‘‘ کی گولیاں ملک کے جنوبی صوبے لیمبرگ سے ملی تھیں جس کے بعد فارنزک لیبارٹری میں ان گولیوں کی جانچ پڑتال کی جا رہی ہے۔

شدت پسندوں کی ایک دوا ٹراما ڈال لیبیا بھیجی جارہی تھی

اسی ضمن میں اٹلی کی پولیس نے بھی انکشاف کیا ہے کہ اسے ایک دوسری ’’ٹراماڈال‘‘ نامی دوا کی 3 کروڑ 75 لاکھ گولیاں ملی ہیں جنھیں شدت پسند استعمال کرتے ہیں ، یہ گولیاں کارگو کے ذریعے لیبیا بھیجی جا رہی تھیں۔

ٹراما ڈال بھارت سے آئی، جنگجوؤں کی مزاحمت بڑھاتی ہے

خیال رہے کہ ’’ٹراماڈال‘‘ نامی منشیات درد کش دوا کے طور پر استعمال ہوتی ہیں،پولیس کے مطابق یہ کھیپ بھارت سے آئی تھی اور اس کے دو مقاصد ہو سکتے ہیں، پہلا مقصد دہشت گردوں کی مالی مدد اور دوسرا جنگجوؤں کی مزاحمت بڑھانا ہے۔

دوا وحشیانہ تشدد اور سفاکیت پیدا کرتی ہے

رواں برس جاری کی جانے والی ایک رپورٹ کے مطابق ’’ٹراماڈال‘‘ کے استعمال کا مقصد نائجیریا میں سرگرم بوکو حرام کے جنگجوؤں کی صفوں میں وحشیانہ تشدد ابھارنا اور سفاکیت کو بڑھانے میں کردار ادا کرنا ہے۔

غیر قانونی منشیات ساز ادارے تیار کرتے ہیں

‘کیپٹاگون’ نامی ادویات کا مرکزی ترکیبی جزو عام طور پر ایمفیٹامین ہوتا ہے لیکن غیر قانونی منشیات ساز اکثر اس میں کیفین یا دوسرے مادے شامل کرتے ہیں۔

کیپٹا گون نامی دوا سے لڑنے کی صلاحیت بڑھتی ہے

اطلاعات ہیں کہ ‘کیپٹاگون’ نامی ادویات کھانے سے جنگجوؤں کی لڑنے کی صلاحیت بڑھتی ہے۔