پشاور: خیبر پختونخوا کی حکومت نے دینی مدارس کی گرانٹ 30 ملین سے بڑھا کر 100 ملین کر دی۔
مشیر اطلاعات کے پی حکومت بیرسٹر سیف نے بتایا ہے کہ وزیر اعلیٰ علی امین گنڈاپور کی زیر صدارت اعلیٰ سطح اجلاس میں دینی مدارس کے گرانٹ میں اضافے کی منظوری دی گئی ہے۔
انھوں نے کہا کہ دینی مدارس کے طلبہ بھی ملک کا قیمتی سرمایہ ہیں، اور دینی و عصری تعلیم کا امتزاج وقت کی اہم ضرورت ہے، طلبہ کو مذہبی تعلیم کے ساتھ جدید تقاضوں سے ہم آہنگ کیا جا رہا ہے۔
بیرسٹر سیف کا کہنا تھا کہ بانی پی ٹی آئی کے وژن اور وزیر اعلیٰ کے پی کی قیادت میں صوبے میں دینی و عصری تعلیم کو فروغ دیا جا رہا ہے، اور صوبائی حکومت اسکولوں کے ساتھ مدارس پر بھی خصوصی توجہ دے رہی ہے۔
افغانستان کیساتھ بات چیت میں شامل کیا جائے، کے پی حکومت کا وفاق سے مطالبہ
یاد رہے کہ دو دن قبل افغانستان کے ساتھ حکومتی بات چیت کے حوالے سے مشیر اطلاعات کے پی بیرسٹر سیف نے کہا تھا کہ وفاق کا افغانستان کے ساتھ بات چیت شروع کرنا دیر آید درست آید ہے، خطے میں پائیدار امن کے لیے پڑوسی ملک سے بات چیت ناگزیر ہے۔ تاہم انھوں نے مطالبہ کیا کہ کے پی سمیت تمام اسٹیک ہولڈرز کو اس بات چیت میں شامل کیا جائے، اس سلسلے میں صوبائی حکومت کو نظر انداز کرنا غیر سنجیدگی کا مظاہرہ ہے۔
