کراچی: شہر قائد کے دو مختلف علاقوں میں گزشتہ رات دو افراد کو فائرنگ کر کے جانوں سے محروم کر دیا گیا، پولیس کا کہنا ہے کہ دونوں واقعات ذاتی دشمنی کا شاخسانہ معلوم ہوتے ہیں۔
تفصیلات کے مطابق کراچی کے علاقے اتحاد ٹاؤن، گلشن غازی میں فائرنگ سے ایک شخص جاں بحق اور ایک زخمی ہو گیا ہے، مقتول کی شناخت 35 سالہ حبیب رحیم کے نام سے ہوئی ہے۔
پولیس کا کہنا ہے کہ فائرنگ کا واقعہ ذاتی دشمنی کا شاخسانہ معلوم ہوتا ہے، لاش اور زخمی کو قریبی اسپتال منتقل کیا گیا، ملزمان فائرنگ کے بعد فرار ہو گئے تھے، جائے وقوعہ سے گولیوں کے خول اور شواہد جمع کیے گئے ہیں۔
پولیس کے مطابق عینی شاہدین کے بیان قلم بند کیے گئے ہیں، جب کہ قتل کی واردات کے بعد فرار ہونے والے ملزمان کی تلاش شروع کر دی گئی ہے۔
اگلے 36 گھنٹوں کے دوران شہر کو 100 ملین گیلن پانی کی کمی ہوگی، ترجمان واٹر کارپوریشن
دوسرا واقعہ کراچی کے علاقے بلدیہ سیکٹر 14 سی میں پیش آیا، جس میں فائرنگ سے ایک شخص جاں بحق ہوا، جس کی شناخت 50 سالہ محمد ندیم کے نام سے ہوئی ہے، لاش اسپتال منتقل کر دی گئی۔
پولیس کا کہنا ہے کہ مقتول سے کسی قسم کی لوٹ مار نہیں کی گئی، واقعہ ذاتی دشمنی کا شاخسانہ معلوم ہوتا ہے، جائے وقوعہ سے شواہد اکٹھےکر لیے ہیں، اور واقعے کی تمام پہلوؤں سے تحقیقات کی جا رہی ہے۔
