Tag: ذکا اشرف

پی سی بی کے سربراہ ذکا اشرف نے روایتی حریفوں کے درمیان میچ دیکھنے کے لیے بھارت جانے سے قبل پاکستانی شائقین کو بڑی خوشخبری سنادی۔

ذکا اشرف نے جے شاہ سے اپنی بات چیت کا حوالہ دیتے ہوئے بتایا کہ پاکستانی شائقین کو جلد بھارتی ویزوں کے اِجرا کی نوید ملے گی۔ پڑوسی ملک میں ورلڈ کپ دیکھنے کے خواہشمند شائقین کرکٹ کو جلد بھارتی ویزے جاری کیے جائیں گے۔

ذرائع ابلاغ سے گفتگو میں پی سی بی مینجمنٹ کمیٹی کے چیئرمین نے کہا کہ (بی سی سی آئی) کے سیکریٹری اور ایشین کرکٹ کونسل (اے سی سی) کے صدر جے شاہ سے اس معاملے پر میری گفتگو ہوئی ہے۔

انھوں نے کہا کہ قومی شائقین کو بھارت میں عالمی کپ کے میچز دیکھنے کے لیے ویزے جلد جاری ہوں گے۔ کرکٹ امن کا پیغام ہے اور پاکستان نے ہمیشہ امن کا پیغام دیا ہے۔

سربراہ پی سی بی ذکا اشرف کا مزید کہنا تھا کہ مجھے بھارت جانے کے لیے پہلے ہی ویزا مل گیا تھا تاہم صحافیوں کے ویزوں کا انتظار تھا۔

ذکا اشرف نے گرین شرٹس کی پرفارمنس کے حوالے سے کہا کہ قومی ٹیم کی کارکردگی خوش آئند ہے، آگے بڑے میچز ہیں۔ بھارت اور پاکستان کے درمیان کرکٹ مقابلے ہوں گے تو اس سے امن ہوگا۔

اپنی دی گئی تجویز پر ان کا کہنا تھا کہ جناح گاندھی کرکٹ ٹرافی کی تجویز بہت پرانی ہے، اس معاملے پر دوبارہ سے گفتگو کی جائے گی۔

کرکٹ ورلڈ کپ 2023 میں پاک بھارت مقابلہ دیکھنے اور قومی ٹیم کو سپورٹ کرنے کے لیے چیئرمین پی سی بی مینجمنٹ کمیٹی ذکا اشرف کل بھارت جائیں گے۔

چیئرمین مینجمنٹ کمیٹی ذکا اشرف نے ایک بیان میں کہا ہے کہ پاکستانی کرکٹ ٹیم ورلڈ کپ میں عمدہ کارکردگی دکھارہی ہے۔

انہوں نے کہا کہ پی سی بی مینجمنٹ کمیٹی اور پوری قوم کھلاڑیوں کے ساتھ ہے، بھارت جانے کا مقصد پاکستانی ٹیم کی حوصلہ افزائی کرنا ہے۔

ورلڈ کپ ویزوں کے لیے بھارت کے پاکستانی صحافیوں سے رابطے

دوسری جانب پاکستان کرکٹ بورڈ کی کوششیں رنگ لے آئیں اور اسلام آباد میں بھارتی ہائی کمیشن نے پاکستانی صحافیوں سے ویزوں کے لیے رابطے شروع کر دیے ہیں اور انہیں ویزوں کے حصول کے لیے اپنے پاسپورٹ فوری طور پر بھارتی سفارتخانے میں جمع کرانے کی ہدایت کی ہے۔

واضح رہے کہ پاکستانی شائقین اور صحافیوں کو ویزوں میں تاخیر پر خود بھارت میں آوازیں اٹھ رہی ہیں اور مودی حکومت کو تنقید کا نشانہ بنایا جا رہا ہے۔

دوسری جانب انٹرنیشنل کرکٹ کونسل (آئی سی سی) کا اس حوالے سے کہنا تھا کہ انڈین کرکٹ بورڈ تقریباً 60 پاکستانی صحافیوں کو ویزا جاری کروانے کے لیے کوشش کر رہا ہے۔

پی سی بی مینجمنٹ کمیٹی کے چیئرمین ذکا اشرف کا کہنا ہے کہ بابر جیسا چاہتے تھے ویسی ہی ٹیم بنائی اور ایشیا کپ میں ہارنے کے باجود رد وبدل سے گریز کیا۔

چوہدری ذکا اشرف کا اپنے انٹرویو میں کہنا تھا کہ حالیہ ایشیا کپ میں پاکستان کرکٹ ٹیم کی پرفارمنس کا جائزہ لیا گیا تھا تاہم کپتان بابر اعظم نہیں چاہتے تھے کہ اس وقت ٹیم میں تبدیلی کی جائے۔

بھارت میں قومی ٹیم کی عمدہ کارکردگی کے لیے پرامید سربراہ پی سی بی نے بھارت جانے کے حوالے سے سوال پر کہا کہ میں بھارت کیسے جا سکتا ہوں؟ ہمارے شائقین کرکٹ اور صحافی بھارتی ویزے کا انتظار کر رہے ہیں۔

انھوں نے کہا کہ چاہتا ہوں کہ بھارت میں پاکستان کی یہ ٹیم اچھی پرفارمنس دے، اسی بات کو مدِ نظر رکھتے ہوئے بابر اعظم کو مکمل اعتماد دیا اور ان کی ہر بات مانی۔

ذکا اشرف نے بتایا کہ انھوں نے قومی کپتان کو اپنے بھرپور تعاون کا یقین دلایا کیوں کہ وقت کا تقاضہ یہی تھا۔ تاہم عالمی کپ میں پرفارمنس کو دیکھ کر مشکل اور بڑے فیصلے کرنا ہوئے تو ضرور کریں گے۔