لاہور: کرتارپور کی ذہنی معذور خاتون گلشن بی بی کی میت پاکستان کے حوالے کر دی گئی، 3دن قبل کرتار پور کے قریب گلشن بی بی غلطی سے سرحد پار کر گئی تھی، جس کے بعد بی ایس ایف نے فائرنگ کرکے زخمی کردیا تھا۔
تفصیلات کے مطابق کرتارپور کی ذہنی معذور خاتون گلشن بی بی کی میت واہگہ بارڈر پر بی ایس ایف کی جانب سے پاکستانی حکام کےحوالے کردی گئی۔
یاد رہے 3دن قبل کرتار پور کے قریب گلشن بی بی غلطی سے سرحد پار کر گئی تھی، جس کے بعد بی ایس ایف نے فائرنگ کرکے زخمی کردیا تھا اور گلشن بی بی کو بدترین تشدد کا نشانہ بنایا گیا تھا۔
حالت غیر ہونے پر بھارتی حکام نے امرتسر کے اسپتال میں داخل کرایا گیا ، جہاں گلشن بی بی زخموں کی تاب نہ لاتے ہوئے اسپتال میں دم توڑ گئی۔
گلشن کی ماں نے بتایا ہے چوبیس سال کی گلشن بی بی دو دن پہلےغلطی سے سرحد پار چلی گئی تھی، اس کا ذہنی توازن درست نہیں تھا۔
خیال رہے دو روز قبل بھارتی شرپسندی کے پیش نظر ایل او سی سے ملحقہ علاقوں کے شہریوں کیلئے ہدایات جاری کی تھی ، ہدایات آزاد کشمیر حکومت نے 6 اضلاع کی ضلعی انتظامیہ کو دیں۔
حکومت آزادکشمیر کا ہدایت نامے میں کہنا تھا کہ شہری صرف محفوظ مقامات سےگزرنے والے راستے اختیار کریں اور کسی بھی جگہ ہجوم بننے اور غیر محفوظ راستے سے اجتناب کیاجائے۔
آزاد کشمیرحکومت نے ایل اوسی کی قریبی آبادیوں میں بنکرز تعمیر کرنے کی ہدایت کی اور کہا رات کوغیر ضروری طور پر روشنی سے بھی گریز کیا جائے، ایل او سی کے قریب چراگاہوں میں مویشیوں کو لے جانے سےگریز کیا جائے۔
واضح رہے کہ پاکستان اور بھارت کی افواج کے درمیان کنٹرول پر کشیدگی برقرار ہے ، اشتعال انگیزی کے نتیجے میں متعدد افراد شہید اور زخمی ہوچکے ہیں جبکہ پلوامہ حملے کے بعد دونوں ملکوں کے درمیان باہمی تعلقات بھی کشیدہ ہیں۔
کشمیر کو منقسم کرنے والی حد بندی لائن پر تعینات دونوں ملکوں کی افواج، غلطی سے سرحد عبور کرنے والوں کو اپنے ملکوں کو واپس کردیتی ہیں۔
