Tag: ذی الحج کے چاند

کراچی : محکمہ موسمیات نے 2 اگست کو ذی الحج کا چاند نظر آنے کی پیش گوئی کردی ، جس کے بعد عید الالضحیٰ 12 اگست 2019 کو ہونے کا امکان ہے۔

تفصیلات کے مطابق محکمہ موسمیات نےذی الحج کےچاندکی پیشگوئی کرتے ہوئے کہا دو اگست کو چاند نظر آنے کے قوی امکانات ہیں، چاند نظر آنے کی صورت میں عیدالالضحیٰ 12 اگست 2019 کو ہوگی۔

محکمہ موسمیات کا کہنا ہے کہ دو اگست کوبیشترعلاقوں میں مطلع جزوی طور پر ابرآلود رہنے کا امکان ہے ، 7:17منٹ پر سورج طلوع ہو جائےگا، غروب آفتاب کے بعد چاند 53 منٹ تک افق پر دیکھا جاسکےگا، چاند کی عمر 35گھنٹے 29 منٹ ہوگی۔

یاد رہے وزیرسائنس اینڈ ٹیکنالوجی فواد چوہدری نے کہا تھا کہ ہجری کیلنڈرکےمطابق عیدالاضحیٰ سوموار12 اگست کوہوگی اور محرم یکم ستمبر بروز اتوار کو ہو گا۔

مزید پڑھیں : عیدالاضحیٰ اورمحرم کب ہیں، فوادچوہدری

خیال رہے وزارت سائنس و ٹیکنالوجی نے قمری کیلنڈر تیار کیا تھا ، جس میں 2019 تا 2024 عید الفطر، عید الاضحی، رمضان المبارک اور دیگر اسلامی مہینوں کے چاند نظر آنے کی تاریخیں طے کی گئی تھیں۔

بعد ازاں وفاقی وزیر برائے سائنس اینڈ ٹیکنالوجی فواد چوہدری نے چاند دیکھنے والی ایپ متعارف کرائی تھی اور اس کا لنک انہوں نے اپنے سوشل میڈیا اکاؤنٹ پر بھی شیئر کیا تھا۔

واضح رہے چیئرمین رویت ہلال کمیٹی مفتی منیب اور فواد چوہدری کے درمیان نوک جھونک بھی ہوئی تھی، قمری کلینڈر بنانے کے اعلان پر مفتی منیب نے وفاقی وزیر پر برہمی کا اظہار کیا تھا۔ اُن کا کہنا تھا کہ قمری کلینڈر کے مطابق عید پانچ جون کو ہے جبکہ رویتِ ہلال کمیٹی پہلے ہی چار جون کو عید کا چاند دیکھنے کے لیے اجلاس طلب کرچکی۔

ماہرین کے مطابق عیدین اور رمضان کے چاند کا تنازع اس سال بھی حل ہوتا نظر نہیں آرہا کیونکہ فی الحال مرکزی رویت ہلال کمیٹی اور مسجد قاسم بھی اس معاملے پر متفق نہیں جبکہ اسلامی نظریاتی کونسل نے ایپ اور کلینڈر پر غور کرنے کے لیے عید کے بعد کا وقت مانگا ہے۔