اسلام آباد: ڈان لیکس کے معاملے پر برطرف ہونے والے سابق پرنسپل انفارمیشن آفیسر راؤ تحسین علی کو ڈائریکٹر جنرل ریڈیو پاکستان تعینات کرنے کی منظوری دے دی گئی۔
ذرائع کا کہنا ہے کہ راؤ تحسین کی بطور ڈائریکٹر جنرل ریڈیو پاکستان تعینات کرنے کے احکامت فواد حسن فواد کے دستخط سے جاری کیے گئے۔ وزیر اعظم شاہد خاقان عباسی نے راؤ تحسین کی تعیناتی کی منظوری 10 مئی کو دی تھی۔
ذرائع کے مطابق اسٹیبلشمنٹ ڈویژن اور سیکریٹری اطلاعات نے احکامات ماننے سے انکار کردیا ہے۔
خیال رہے کہ ڈان لیکس کا تنازعہ گزشتہ برس اس وقت سامنے آیا جب انگریزی اخبار ڈان میں صحافی سرل المیڈا کی جانب سے وزیر اعظم ہاؤس میں ہونے والے اجلاس سے متعلق دعویٰ کیا گیا کہ اجلاس میں کالعدم تنظیموں کے معاملے پر عسکری اور سیاسی قیادت میں اختلافات ہیں۔
مزید پڑھیں: ڈان لیکس کیا ہے؟
خبر پر سیاسی اور عسکری قیادت نے سخت ردعمل دیتے ہوئے اسے قومی سلامتی کے منافی قرار دیا۔ ڈان لیکس کے معاملے پر وفاقی وزیر اطلاعات پرویز رشید کو ان کے عہدے سے فارغ کیا گیا۔
بعد ازاں ڈان لیکس سے متعلق رپورٹ میں طارق فاطمی اور پرنسل انفارمیشن افسر راؤ تحسین کے خلاف کارروائی کی سفارش کی گئی تھی جس کے بعد دونوں کو ان کے عہدے سے برطرف کردیا گیا۔
برطرفی کے بعد راؤ تحسین نے اپنے اوپر لگنے والے الزامات اسلام آباد ہائیکورٹ میں چیلنج کردیے تھے۔
عدالت میں دائر اپنی درخواست میں راؤ تحسین کا کہنا تھا کہ ڈان لیکس اسکینڈل میں انہیں قصور وار قرار دے کر ان کا کیریئر داغدار کردیا گیا۔
اس سے قبل راؤ تحسین نے عہدے سے ہٹائے جانے کے خلاف ڈان لیکس کی تحقیقاتی کمیٹی، وزارت داخلہ اور سیکریٹری اسٹیبلشمنٹ کو لیگل نوٹس بھی روانہ کیا تھا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
